الموضوع: البرايد العصفورة

الف مبروك وربنا يهبك خيرها ويبعد عنك شرها
وقبل كل شى لازم تغير سير الدينمو والكاتينه والبيجوهات ان امكن وزيت المتور والفرامل وفلتر الزيت والهواء علشان تبتدى على نظيف
وياريت تسأل اللى شارى منه العربيه نوع البنزين اللى كان بيحطه ايه علشان طرونبت البنزين ماتبظشى ونوع الزيت كمان اللى الماتور واخد عليه
وديه بعض النصائح البسيطة :

1- يفضل عمل مراجعة على تقفيل العربية بنفسك ويشمل الاتى
تربيط عفشة - تربيط مسامير مفصلات الابواب والتابلوه وتربيط الكراسى ومالى ذلك

2- لو حسيت ان الدبرياج تقيل معاك اظبط وضعيتة من حوض العربية هتلاقية على يمين الموتور ومتعلبش فى اى ريجلاش او حاجة مجرد ظبط السلك ومستوى الشد بتاعة فقط

3- اهتم بالكشف على البطارية شهرياً

4- مهم جدا
عود نفسك على طريقة قيادة العربية لان العربية بتمشى لمجرد انك ترفع رجلك من على الدبرياج فاظبط ارتفاع الدبرياج زى ماقولتلك فوق وخلى رجلك خفيفة على الدبرياج ومتدوسش بنزين الا بعد ما رجلك تترفع من على الدبرايج وبكده تضمن افضل استخدام واطول عمر لاسطوانة الدبرياج - علماً بان ناس كتير فوتت الاسطوانة بتاعة الدبرياج للسبب ده

5- زود مياة الريداتير من القربة دايماً وبلاش من الريداتير نفسة علشان غطاء الريداتير بيبوظ بسرعة

6- اوعى اوعى اوعى تغسل العربية بالجاز لان العربية انجكشن وفيه سنسورز بتبوظ بسرعة من الجاز زى ال TPS وكمان علشان الكاوتش والخراطيم متتأكلش
فالافضل انك تغطى العربية على طول علشان متتوسخش من جوة بسرعة ولما تحب تغسل الحوض يبقى هواء ووممكن فوم ويزال بالهواء ايضاً وبس

7- ربنا يحفظنا جميعاً خد بالك ان العربية جراية جدا وسحبها ماشاء الله ممتاز وارجو ان اكون افتك

المشاركة الأصلية كتبت بواسطة ZAMORA

الف شكر استاذ مدحت و استاذ توفيق شكرا للاهتمام و جزاكم الله خيرا

بس كنت عايز اسأل هو البنزين 92 هو الموصي بي من الشركة و لا ممكن احط 90 او 80 و لا حسب صاحب العربية السابق كان بيحطلها بنزين نوعه ايه؟؟
لان 92 هيبقى غالي شوية
انا على فكرة مونت مرتين بنزين 80 و لسة ممونتش تاني هل ده ليه تاثير على العربية لو مكنش البنزين ده مناسب ليها
و شكرا مرة تانية و تالتة كمان

طبعا ليه تأثير علشان كده اسأل صاحب العربيه السابق نوعه ايه ولو ماعرفتش توصلو يبقى رائى 90