اولا شكرا ليك يا MoToRiZeR على الاستفتاء الجميل ده فعلا فرصه ان الواحد يعرف اخطاءه
انا اخترت :
1- تعدي السرعات المقررة داخل و خارج المدينة : وده لأن حقيقى الواحد مجرد ما بيطلع من الزحمه بيتشاهد وبيبقى عايز يتمتع بالعربيه والشارع قبل ما يقابل كعبله تانيه
ده غير ان الواحد على الطرق السريعه بيكون مشتاق لاحساس السرعه اللى بيفتقده كل يوم داخل البلد
2- التخطي من اليمين : مش هتكلم على الموقف ده غير بمثال بسيط
من فتره كنت فى طريقى للقاهره الجديده وماشى على الشمال وكان يومها طالب معاى سواقه اوروبيه بمنتهى الالتزام
قصادى تاكسى شاهين على الشمال قلبت له نور بالزوق مش عايز يوسع
وقفلت معاى انى مش هعدى من اليمين علشان غلط ولازم اخليه يوسع لى وفضلت اقلب له نور على امل انه يزهق ولكن كان رد فعله انه مد ايده قفل المرايا الشمال وراح رافع مرايه الصالون فى السقف ومشغلى اشاره شمال
يعنى اخبط دماغك فى الحيط !!! من يومها وانا اقتنعت ان فى مصر التخطى من اليمين مش عيب :)
3- القيادة المتهورة و الغرز : مش قياده متهوره هى غرز بس وبشغل اشارات فيها ومستحيل اخد غرزه تكون زنقه او هربك بيها حد جنبى
وده لأن تلاقى الشارع حارتين وواحد ماشى على اليمين بيتكلم فى التليفون وواحد ماشى على الشمال وحالف ما يجيب التالت وموقفين الدنيا كلها وراهم فلازم الواحد يخلص نفسه من الحصار ده
4- الإلتصاق بالسيارة التي أمامك أثناء القيادة : ده فن قياده مصرى اصيل فى الزحمه والا اى واحد خارج من تقاطع يدخل قدامك او اى واحد فى حاره جنبك ومش عاجبه لون العربيه اللى قدامه يجى ياخد مكانك فى الصف