الموضوع: اخر شعوزات توفير البنزين في الصني

المشاركة الأصلية كتبت بواسطة sab3aawy

طب خلينى انا اتفق

حبيبى انا لم اقل نهائيا ان الصنى تنفرد بالTPS او الكونترول، اصلا مافيش حاليا غير الماروتى اللى لسة شغالة بكاربراتير، انا اللى قلته ان برنامج الكونترول يدعم هذا المحرك القوى ، فيما معناه انه مصمم بحيث يعمل حقن بكميات كبيرة للبنزين عند احساس الكونترول بحركة ال تى بى اس، يعنى الفرق بينه وبين غيره ليس ان الصنى فيها كونترول وغيرها لأ، لكن ان كونترول الصنى بيرمى بنزين كتير فى حالة التسارع لأن الموتور بيقبل ده وبيحوله لتسارع شديد، يعنى برنامج كونترول رياضى


اما بالنسبة لحكاية الاستهلاك فى الطوالى فباعتبارك راجل على وش بكالوريوس هندسة-نتمنى لك كل التوفيق والتقدير المرتفع باذن الله تعالى- فانت اكيد طبعا عارف تأثير مقاومة الهواء على تسارع السيارة وعارف انه في حين يكون معظم استهلاك الوقود فى السرعات البطيئة موجها لمقاومة الاحتكاك الصلب dry friction فى ،فان معظم قدرة المحرك تضيع فى مقاومة الهواء فى السرعات العالية لأن معامل مقاومة الهواء يتغير بتغير مربع سرعة السيارة فى حين ان معامل الاحتكاك الصلب يتغير مع تغير سرعة السيارة، فيما معناه ببساطة ان قدرة المحرك اللى انت محتاجها لمقاومة الهواء على سرعة 120 كم/لا تساوى 1.33القدرة اللى انت محتاجها على سرعة 90 وانما تساوى مربع 120 مقسوما على مربع 90، اى 1.7، وكما تعرف طبعا فأن القدرة هى ترجمة مباشرة لاستهلاك الوقود(القيمة السعرية للوقود مضروبة فى معدل تدفق الوقود مقسوما على كفائة المحرك المأخوذة من منحنى الكفاءه مقابل الآر بى ام عند نقطة سرعة المحرك المقاسة) وبالتالى فعندما نزيد السرعة من 90 الى 120 فأن استهلاك الوقود يمكن ان يزيد بقيمة تقارب نصف معدله لنفس المسافة ولو وصلنا ل 140 سيزيد للضعف(لاحظ اننا اهملنا الاحتكاك الميكانيكى هنا وبتطبيقه سنصل للقيم التقريبية التى اقترحتها)
الملخص يعنى انك مينفعش تكون بتسوق 140 وتزعل ان الوقود استهلاكه 170 كم فى الصفيحة، جرب تاخد الطريق كله 90 وقول لنا ايه الأخبار

للمزيد عن مقاومة الهواء وكيفية حسابها ممكن تتفضل بزيارة هذة الروابط

http://en.wikipedia.org/wiki/Automob...g_coefficients

http://en.wikipedia.org/wiki/Drag_equation

اخوك الصغنن سبعاوى-مهندس ميكانيكا دفعة 1994

أخويا الكبير باشمهندس سبعاوي :)

مش حسيب الكلام الظريف بتاع الكلية ألاقيه هنا في المنتدى

مفيش خلاف على المعادلات الرياضية بتاعة علاقة السرعة بالمقاومات

كل الحكاية إنه الكلام ده بينطبق على أي عربية مش على الصني بس ... يبقى ليه استهلاكها للبنزين أعلى من كل العربيات اللي في فئتها !!

لو الكنترول زي ما حضرتك بتقول يبقى دي مشكلة في تصميم الكنترول ..

و يا ريت حضرتك تقول لنا مصدر معلومة الكنترول الرياضي دي ... أنا فعلاً عايز أعرف .. مش جدال و الله

شكراً يا بشمهندس

أخوك الصغنن اللي لسة مبقاش مهندس :)

لا يا جماعة الراجل ده مش بيهز انا بسوق بصابع رجلي الصغير و فعلا وفرت كتير في البنزين بس المشكلة اللي بتقابلني انه الصابع بيتزحلق من علي الدواسة كتير فبدوس بظهر رجلي اقصد ببطن رجلي بس من عند المعدة شوية لكن بتجيب كويس