اشتري بولو 2001 ولا بولو 2003 عيون

**amrhussien87** · 01-03-2009 12:01 AM

يا جماعة الاول ازيكو في الجو الجميل والمطر ده انا يا جماعة عايز اشتري يا بولو 2001 يا بولو 2003 عيون ومحتار بين الاتنين مع اني معجب اكتر بالعيون وعايز اعرف سعر كل واحدة في وسط الاسعار النازله دي وعيوب كل عربية في الاتنين دول واسعار قطع الغيار سمعت انه في تقليد تايواني وللعلم دي هتبقي اول عربية ليا واول مرة اسوق طماع انا يا جماعة في كتر الاسئله بس معلش عايز نصيحتكو ليا شكرا

**snakeson2** · 01-03-2009 07:47 PM

توكل علي الله في 2001 الكل مجربه وبيشكر فيها !
طبعا الاساتذة اتكلموا كتير في الموضوع قبل كدة
والاسعار مقدرش احددهالك قوي لان بقالي كتير مش متابع السوق بس عربيتي 2001 جابت 50000من شهر ومرضتش ابيع .
قطع الغيار معقولة بس اهم حاجة المحافظة لان الحاجة مبتبوظش الا بسب
وربنا يوفقك

**amrhussien87** · 01-03-2009 10:14 PM

ربنا يخليك بس انا مش عارف ايه موضوع البولو العيون ده مع ان شكلها احسن بالنسبه ليا يعني مفيش حد يعرف عيوب جوهرية تخليني فعلا ابعد عنها غير قطع الغيار لان في تقليد كويس عايز اعرف لو حد يعرف عيوب جامده فيها عشان اقتنع اكتر ان 2001 احسن

**XLANS** · 02-03-2009 10:11 AM

المشاركة الأصلية كتبت بواسطة amrhussien87

يا جماعة الاول ازيكو في الجو الجميل والمطر ده انا يا جماعة عايز اشتري يا بولو 2001 يا بولو 2003 عيون ومحتار بين الاتنين مع اني معجب اكتر بالعيون وعايز اعرف سعر كل واحدة في وسط الاسعار النازله دي وعيوب كل عربية في الاتنين دول واسعار قطع الغيار سمعت انه في تقليد تايواني وللعلم دي هتبقي اول عربية ليا واول مرة اسوق طماع انا يا جماعة في كتر الاسئله بس معلش عايز نصيحتكو ليا شكرا

لو هتشترى مستعمل يبقى 2001 دة رأى الميكانيكى بتاعى انها احسن من 2003 بكتيير

**shosny** · 02-03-2009 12:00 PM

بوص يا استاذ عمر انا كان معايا بولو 2001 وطبعا هيا عربية محترمة جدا لا خيلاف على ذلك عيوبها التكيف ضايع مع السحب و ضايقة لو معاك اسرة
انا حاليا معايا بولو 2003 هية موتور 1000 بس 79 حصان 16صباب اداه احسن من 2001 من حيث قوة الموتور على حساب سحب بنزين زيادة -اوسع طبعا يعنى لو قاعدين 3 وارا بيبقو مرتحين جدا - البور بتعها كهرباء- الدبرياج على باكم-السحب مع التكيف معقول جدا .

**umoussa** · 02-03-2009 02:23 PM

بص أنا حقولك المزايا والعيوب بتاعة البولو 2001 و2003 من حيث التجربة:

البولو 2001:
- الموتور 1000 سي سي - سحب ضعيف خصوصاً مع التكييف - 55 حصان
- التكييف ممتاز
- استقرار العربية على الأرض رائع
- العربية لو انت مش رجليك حساسة على بدال البنزين ممكن تطفي منك في الملفات علشان الباور بيحمل على الموتور
- قطع الغيار سواء جديد أصلي أو استيراد متوفرة
- العربية: موتور وشاسيه ألماني تجميع كامل في أسبانيا - يعني عربية أوروبي تنساها بجد...

البولو 2003:
- الموتور 1000 سي سي - سحب أفضل - 78 حصان بس مش حتاخد ال 78 حصان إلا لو حطيت 24% من تانك البنزين كحول - ودي مواصفة علشان العربية برازيلي والعربيات هناك بتمشي بخليط من البنزين والكحول أو الكحول بس أو البنزين بس
- التكييف هو هو
- استقرار العربية على الأرض رائع
- الباور مبيحملش على الموتور والعربية مبتطفيش
العربية: برازيلي قلباً وقالباً
قطع الغيار: متوفرة بس أغلى من البولو 2001
الاستيراد منها قليل جداً ومبيجيش 1000 سي سي من برة كله 1400

من حيث إعادة البيع: شوف في كام عربية بولو 2001 اتباعت في مصر وكام واحدة 2003 اتباعت. يعني مين أكتر في الشارع؟

نصحتي ليك: تجيب بولو 2001 وتحط فيها موتور 1400 بكل حاجاته - عفشة وضفيرة وفتيس وكنترول حيبقى معاك عربية أفضل من البولو العيون دي مليون مرة وكمان قطع الغيار بتاعة الموتور ال 1400 متوفرة جداً ودا لأنه الموتور الموجود في الجولف 4 والبورا 1400 والإبيزا 1400 وعربيات تانية كتير

لو مالكش في التسقيط.. يبقى انصحك تسوق العربيتين الأول وتختار انت

ملحوظة أخيرة: إوعى تشتري قطعة غيار مش أصلي - وإلا تبقى انت الي جبته لنفسك ومترجعش تشتم في فولكس بعد كدا وتقول دول بهايم و و و و و و علشان حتكون أنت السبب مش فولكس.

**amrhussien87** · 02-03-2009 08:37 PM

يبقي اتوكل علي الله واشتري 2001 اضمن وهي المنتشرة اكتر فعلا وطالما الفروق مش كبيرة قوي بينهم الا في موضوع الشد بس
شكرا يا جماعة بجد علي النصايح الهايله دي الف شكر

**snakeson2** · 02-03-2009 08:46 PM

المهندس اسامة قال المضمون !
وانا شايف ان العربيات مش بس شكل وحصان !
البولو ال1000 الي معايا بيجب بيها 150 ومتحسش انك خايف من ثباتها
فية عربيات صيني 1600 واخرها 170
عالعموم ال2001 فعلا كل قطعة فيها الماني حتي قزاز المرايا وشخصيا انا حاسس ان شكلها اجمد من 2003
وبعدين انت هتجيب مستعمل فخليك في المضمون يعني الي ميدوخكش عشان تلاقي قطع غيار لية . وغالبا انت عارف شوارع مصر المحروسة واساتذة خبط العربيات في الشوارع .
وبما انك هتجيب مستعمل خلي بالك انك هتفير بعد فترة ال2001 سوقها تمام و2003 ممكن تتعبك شوية في اعادة البيع فخلي بالك من الموضوع دة لان الانسان بطبيعتة بعد فترة اكيد هيغير حتي لو كان راكب بورش
وربنا يوفقك.

**umoussa** · 02-03-2009 09:09 PM

شوف يافندم لو لقيت عربية 2001 من فضلك ابعتلي وانا حوديك مركز تبعي يكشفولك على العربية بالملي وجنبه واحد بتاع دوكو حبيبي برضو يقولك إذا كانت العربية رشة ولا لأ علشان تبقى في الضمان

بدل متروح تعجبك عربية من برة وتطلع من جوة...........إن شاء الله ربنا يوقعك في حاجة زي الفل

وإذا كنت عايز هدية، عندي بولو 2001 سعرها 52 ألف مفيهاش قلم بوية لونها فراني وعاملة 80 ألف كيلو لو تحب تشوفها كمان تحت أمرك