انا عايز اشتري هوندا سي بي ار

**HOTSHOT** · 03-03-2009 04:52 PM

بجد الموقع جامد موت . شباب زي الفل
يا جماعة انا معروض عليا هوندا سي بي ار 400 موديل 2005 و ماشي 3000 كيلو يعني جديد . مطلوب فيه 45000 جنية
حد يدلني يا ولاد الحلال و يديني رأيه . علي فكرة انا من اسكندرية . حد يعرف معارض موتسيكلات هوندا او ياماها في القاهرة ؟

**CRX** · 04-03-2009 12:05 PM

اسكندرية أجدع ناس :)

انا شايف ان المكنة دي حكمها حكم الجديدة نوفي بس الحقيقة بخصوص السعر ده ما عنديش فكرة ممكن حد من اخوانا الاعضاء يفيدنا اكتر

لازم تعس بنفسك وتديها زيارة للمعارض

والمعارض هنا كتيرة

أيمن فوزي في مصطفى النحاس مدينة نصر
بليد في شيراتون
تامركو جسر السويس
فيه واحد عند انبي مدينة نصر
ماتركس في المعادي
عادل زيدان في الدقي

**star_is_mesho** · 04-03-2009 03:00 PM

شكرا على المعارض
بس ياريت لو تعرف العناوين بالضبط
وكان فى واحد فى العجوزه اسمه محمد فهمى
لو تعرف عنوانه
وشكرا

**CRX** · 05-03-2009 02:19 PM

أيمن فوزي : 82 ش مصطفى النحاس

بليد: شيراتون هليوبوليس عمارات صقر قريش الشارع اللي موازي لصلاح سالم وفي وش النساجون الشرقيون -مش عارف اسمه ايه بالظبط-

تامركو: اخر جسر السويس ناحية روكسي وفي الجهة المقابلة الحريف بتاع الكباب والكفتة :) طعمه حلو ابقى اشتري من عنده

اللي عند انبي هاتلاقيه في امتداد شارع عباس العقاد نفسه قبل التقاطع مع شارع انبي بعمارة اللي على صف الحديقة الدولية

وفيه واحد جديد فاتح في العمارة اللي قصاد أيمن فوزي على الشارع الرئيسي برده -مش حاطط يافطة-

الباقي مش عارف بالظبط

بالتوفيق

**HOTSHOT** · 05-03-2009 05:37 PM

ميرسي لكل اللي رد عليا . انا بجد مش عارف اقول ايه . علي كل حال . انا إن شاء الله حخلص في هوندا ستيد 2001 vls مش vlx . غالي شوية 28000 بس حالتة حكاية .
ادعولي يمكن اعرف انزل من تمنو شوية.

**HOTSHOT** · 10-03-2009 06:24 PM

ممكن اخد رايك اشتري من بالظبط لاني قربت اجنن
1-شادو 400 american classic edition و دة سعره 28000
2- steed vls 400 اللي هوا بفرش و عكاز من قدام و مقاس العجلة اللي قدام 21 . و دة سعره 25000 .

اشتري مين مع العلم ان الاتنين حالتهم ممتازة و انا لسة اول مرة اركب .
مين اللي مش حخسر كتير و يكون اسهل في بيعة. و هل فعلا الواحد حيزهق منز بسرعة ؟؟ انا طولت عليك.
اخوك مزنوق.

**CRX** · 11-03-2009 11:10 AM

انتا أول الموضوع يا باشا كنت بتتكلم على CBR 400

وفي الاخر بتتكلم على Steed و Shadow

والفرق بينهم في السعر والاستايل كبير

وغالبا اللي بيسأل على الريس بيبقى عايز يركب ريس

واللي بيسأل على كاستم بيبقى عايز كاستم

فانتا شكلك كده عايز تركب وخلاص مش فارقة معاك ريس ولا كاستم

ولو المسألة كده بصراحة.. (وده عادي يعني)

أنا أرشحلك الـ Steed

بس حاول تنزل فيه شوية ،، وكده كده مش فارقة كتير انتا ركيب مش تاجر

بس أنا رأيي تمشي مع الأرخص طالما كله عاجبك

أولا علشان تتعلم عليه

ثانيا علشان لو زهقت منه تخلص منه بسرعة وما تتجرحش فيه اوي

وابقى طمنا علشان نباركلك

سلام

**Mohoo** · 12-03-2009 12:27 AM

El Makana Dih MAwgooda 3and Meme El Tayeb????? law heya 3ala barket ellah

**HOTSHOT** · 12-03-2009 10:10 AM

ميمي بتاع كيلوبترا شارع ابوقير؟ لا حاليا ماعندوش غير ريس .

**HOTSHOT** · 12-03-2009 10:16 AM

زي ما قلتلك يا crx اني ما ركبتش قبل كدة . و الواحد لازم يشوف و يسال . و مش عيب ان الواحد يرجع في قرار شايف انو غلط . بس هيا مش ركوبة و السلام . انا عايزة اركب لاني قرفت من الزحمة. انا عندي ماتريكس اوتوماتك. حخليها بس حشتري إن شاء الله الشادو 400 . و شكرا يا جماعة علي المساعدة اللي من غيرها كنت مش حعمل حاجة.. و حبقا ابلغ يا crx يوم السبت باللي حصل
ادعولي