انطباعي عن ركوب جين 2 اول مره

السلام عليكم

ازيكم يا ملاك البروتون


بصراحه الموضوع في دماغي من فتره كبيره

عربيه صغيره بامكانيات وثبات كويس بالاضافه الى سعر كويس

لو جينا نقول عربيه صغيره وثبات حلو هنلاقي الموضوع صعب

مابين فيرنا لنيو اكسنت ل سيريون لويرا لعربيات كتير اقل من 85 الف كلهم ثباتهم عادي وامان ضعيف نسبيا وفرامل مش قويه اوي باختصار اداء عادي

وليا صديق في الجامعه تقريبا تاني واحد اشتري جين 2 في مصر واتقلب بيها والي قالوا ان الكاوتش طار لوحده ..؟؟؟

وبعدها اشتري صني وباعها ورجع جاب جين تو بس المره دي جابها اوتو مش مانيوال

قابلته بالجين 2008 قدام الجامعه قالي تعالى يامحمد اسمعك شويه مزيكا جداد في العربيه

ركبت معاه ودي اول مره اركب جين تو واتكلمت معاه عليها
مبدايا انا شوفت الكبوت تقفيل كويس ومحترم وعجبني اوي اوي الفلتر بتاعه واخد زي حرف u تقريبا وتقفيله كويس

من جوا العربيه بصراحه كلها بلاستيك في بلاستيك
وجوده مابين المتوسط والعادي يعني مفيهاش حاجه رديئه بس مفيهاش خامه كويسه برضو
بس طبعا شكل تابلوه حلو والعدادات حلوه برضو والفتيس ظريف مفيهوش مشاكل

عجبني الصاج بتاع العربيه والاكصدام محمي بشاسيه اكصدام محترم والواد قعد يحكيلي على شويه كام خبطه
اثبتوا ان العربيه صاج محترم
بالاضافه الى ان عربيته الى اتقلبت شوفت صورها على الفيس بوك اتقبلت تقريبا 10 مرات والعربيه برضو من جوا كويسه وصحيح انها اتكهنت مش مكنش منظرها منظر العربيات الى مقلوبه ومتعرفش تحدد نوعها ايه

بصراحه انا مرضتش اقوله اجرب عربيتك عشان مليش علاقه جامده بيه ف قولت محرجوش
بس قولتله اطلع اجري شويه بالعربيه وريني بقى السر الي خلاك تشتري العربيه دي مرتين
جربنا العربيه على طريق اكتوبر وهو طريق معفن وكله مطبات هوا وتنطيط على كيفك
من اول ما طلع بالعربيه وهي اوتو صوت الماتور اعلى صوت ماتور شوفته في الفئه دي فعلا
هو بالنسبه لي مزعج وصوته غير رياضي هو صوت مزعج صوته زي ميكون في جعره الفلتر الرياضي
ده ممكن يكون ناتج من ماسوره الفلتر الطويله
بس رايي بصراحه انه مزعج شويه ومش رياضي
وانا لما قارنته كان بصوت النيو اكسنت عندي هو عادي
بس مفيهوش النعره القويه الي موجوده في الجين
المهم
الواد اول ما طلع بالعربيه كنا في حته رمليه سنه
اولاني و 60 وراح رافع هاند وهاتك يا تخميس
انا قاعد جمبه حاسس انه متحكم ومتمكن بالعربيه
وتحت سرعه 70 كان بيعرض بالعربيه وبطريقه مفاجئه
انا كنت جمبه شعوري كويس ومستريح
مش زي معظم العربيات الهاند يترفع من هنا والي قدام يتقلب ورا
طلعنا على الطريق هو مسمح اننا عشان الزحمه
بس العربيه لحد سرعه 100 طبيعيه بتطلع وتنزل على مطبات الهوا عادي احنا قاعدين جوا العربيه مرتاحين مش متدايقين
لحد بقى 130 تغيير المسارات المفاجي والغرز كويسه جدا خصوصا انها في فئه العربيات الصغيره وقاعده عجلاتها مش كبيره اوي ف تعتبر على الحجم ده كويسه جدا جدا بصراحه سرعه 130 وغرز وقاعدين عادي في العربيه زي الفل
فرامل مجربناهاش متكيناش عليها بس شكلها كويس
الفتيس اوتو حاسس انه بينقل متاخر والكيك داون برضو متاخر بس لما نيجي نتكلم على الطبيعه
في كتير فتيسات اوتو بتعمل كده
وبالنسبه للشباب الجراي الحوار ده مفيد من ناحيه انه يحرق ويسيب رجله من البنزين والعربيه تفضل على نفس النقله بيبقى ممتع ويقدر يخليك تجري في ضهر حد ولما يفتح الطريق تطلع منه وانت لسه على نفس النقله وحارق باختصار الفتيس ممكن التعود عليه
العفشه احنا معديناش على مطبات كتير بس هي ناشفه ولكن باحترام يعني مفيش صوت ترزيع بس المساعدين ناشفين مش طراي
في التجربه مكنش في اي صوت جوا العربيه من طقطقه والكلام ده بس برضو العربيه اكيد عامله اقل من 20 الف ف لسه تعتبر زيرو
استهلاك بنزين متحسبش طبعا دي تجربه بسيطه
مركبش حد ورا عشان نشوف نسبه الراحه في الخلف
بس انا بقول من مشي العربيه هتبقى في العادي
مش مزعجه ومش مريحه اوي الي هو تركب تنسى الدنيا
انا بصراحه العربيه عجبتني من ناحيه السعر مقابل الامكانيات كويسه واحسن من العربيات الي في حجمها
انا ركبت عربيات كتير في الحجم ده لكن مش بمستوى الثبات ده
طبعا الواد قعد يتكلم كتير على العربيات وقالي لوتس شركه محترمه والعربيه اساسا مصممه للتخميس والكلام ده الله اعلم ايه مدى صحه الكلام ده
وقعد يقولي الفتيس برضو قاعدته معموله بطريقه محترمه مش بتخلي العربيه تنتش وكده
وعامه كانت الركوبه في العربيه مش مريحه اوي لكن كويسه
بالمقارنه بالسيفيك ركبتها برضو ونفس الطريق
طبعا السيفيك ثباتها احسن وجريها احسن
لكن في كلا العربيتين انت برضو حاسس انك راكب عربيه خفيفه مش تقيله اوي
ولما نتكلم على المازدا 3 عربيه زهقت اساسا من كتر ركوبها وسواقتها
المازدا محترمه اكتر منهم هما الاتنين من ناحيه العفشه
والعامل الرائع جدا جدا هو راحه الراكب الخلفي في المازدا 3 مع مطبات الهوا واي حاجه بيبقى قاعد في البيت واحساسك وانت راكب ووانت سايق مازدا انك راكب عربيه متزنه جدا

ممكن برضو لو قارنا النيو اكسنت بالجين تو
الاكسنت تقفيل ممتاز
جري افضل
صوت ماتور افضل
فتيس اوتو ممكن برضو نقول افضل
بس الجين على كلام الواد تصميم الفتيس والقاعده بتاعته كويسين مفيهومش نتش وكده وده انا برضو حسيته بس نرعج ونقول العربيه زيرو
العفشه مقدرش احكم على الجين عشان مش متمرس فيها بس نقدر نقول انها كويسه
برضو اللاكسنت عفشه ناشفه مع تركيب صدادين في المساعدين الامامي بقت مفيهاش ترزيع وبقت كويسه


عامه انا من محبي السيارات الصغيره خاصه في البلد دي
وفعلا يوم ما اجي اغير عربيتي اول حاجه هجرب جين 2 واسوقها ولو احساسي وانا قاعد جنك السواق لقيته هو هو وانا سايق هشتريها بدون تردد
بس اتمنى انها تكون عربيه معمره يعني مثلا عفشه تقعد مش اقل من 100 الف للمقصات والمساعدين
كبالن مش اقل برضو من 150 او اكتر
عشان برضو نيو اكسنت بتاعتي هاريها جري وتخميس
وماشيه 130 عمري حتى ما غيرت جلبه كوبلن وزي الفل
وسمعت برضو ان في كزا جين غيروا كبالن

اتمنى مكنش طولت اوي عليكم

ويارب اكون افدت باي معلومه

تقيم رائع بصراحة ,وأعتقد كان حيكون أروع لو كنت جربت تسوقها
أنا فعلا حسيت بكل اللي أنت قلته
ما عدا إن الاوتو في الكيك دوان الاربي ام بيعلى قوي وردة الفعل بطيئة من ناحية التسارع اللي المفروض كانت تجري بسرعة توازي الصوت وعدد لفات الموتور

دي كانت ملحوظتي عليها بالاضافة للي قلته وانا مركبتش المانيوال بصراحة

إنما شهادة حق , أنا شايف انها العربية الوحيدة اللي في السوق اللي قيمتها تساوي ثمنها

اقتباس:

---

المشاركة الأصلية كتبت بواسطة abou_ruqi

تقيم رائع بصراحة ,وأعتقد كان حيكون أروع لو كنت جربت تسوقها
أنا فعلا حسيت بكل اللي أنت قلته
ما عدا إن الاوتو في الكيك دوان الاربي ام بيعلى قوي وردة الفعل بطيئة من ناحية التسارع اللي المفروض كانت تجري بسرعة توازي الصوت وعدد لفات الموتور

دي كانت ملحوظتي عليها بالاضافة للي قلته وانا مركبتش المانيوال بصراحة

إنما شهادة حق , أنا شايف انها العربية الوحيدة اللي في السوق اللي قيمتها تساوي ثمنها

---

+1000000000000 قيمة تساوى المقابل ابتدت الصورة توضح :S_thum1[1]:
ربنا يوفق

تقيم جميل بس المفروض مش تقارن الهوندا والمازدا
بالجين 2 لانهم مش من نفس السعر او الفئة

اقتباس:

---

المشاركة الأصلية كتبت بواسطة eslamwega

تقيم جميل بس المفروض مش تقارن الهوندا والمازدا
بالجين 2 لانهم مش من نفس السعر او الفئة

---

اولا انا بشكركم على ردودكم

ثانيا انت معاك حق في كلامك

بس انا بقارن من ناحيه الثبات والتسارع والاتزان

والسبب انه في ناس بتطلع من 128 تركب ريو موديل 2000 يقولك دي ثبات خرافي
ده طبعا هسهسه وفي لخبطه كتير

ف برضو ملاك جين 2 بيقولوا ثبات خرافي
ف من هنا جت المقارنه بالسيفيك والمازدا
والجين اقل منهم طبعا
بس بالنسبه للحجم مقابل الثبات فهي متفوقه فعلا عن العربيات الي في سعرها وهجمها

يعني انت رأيك ايه
النيو اكسنت زيرو و نصرف عليها الفرق لحد الجين 2 كماليات
ولا جين 2 افضل؟؟؟؟:U_thin1[1]:

شكرا على التقييم 10\10 بس عايز اقلك انو الاميركاني والتخميس بتسبب اضرار ومشاكل كبيرة بالعربية ولو مشيت صح بدون حركات مضرة زي دي ان شاء الله مابتغير اي قطعة قبل ماينتهي عمرها الافتراضي تحياتي لحضرتك

هو الحكم الوحيد بين العربيتين(وجهه نظري) هو الجوده مع الايام
الاكسنت معمره ومفيهاش اي مشاكل في اي حاجه وصالونها جوده افضل

الجين تو صالون رياضي بس بجوده ضعيفه

الاكسنت ثباتها كويس بس شنتطلها العاليه مبهدلاها في التنطيط
والموضوع ده سهل حله جنوط او سوست رياضيه كده العمليه خصلت


الجين افضل مافيها ثباتها على حجمها والكماليات

الجين بتطلع فيها مشاكل مختلفه في عربيات مختلفه برضو
والى حد كبير اعتماديتها وعمرها لسه مبانوش قوي
العمليه عايزه عربيه سايقها واحد مجرم مش همه طرق المحروسه
ومشي بقيها مش اقل من 150 الف كيلو بمعدل 50 الف كل سنه
نشوف بقى ساعتها ايه باز عنده غير ايه وايه سليم وايه بايز
وقتها نعرف اذا كانت الجين كفء انها تشتري وانت مطمن ولا لا
وعموما حساب اعتماديه العربيه بيتحسب بالكيلو مش بالسنين
يعني مش واحد شاري عربيه بقالها 5 سنين ويادوب ماشي 60 الف تعتمد شهاده من حيث الاعتماديه بتاعه العربيه

---------
بالنسبه للكماليات الاكسنت مش هتبقى زي الجين في الايرباج وال abs
لكن ممكن يركب لها كاسيت بريموت صغير زي المالتي فاكشن ويتحط في الدركسيون

اقتباس:

---

المشاركة الأصلية كتبت بواسطة samer19901

شكرا على التقييم 10\10 بس عايز اقلك انو الاميركاني والتخميس بتسبب اضرار ومشاكل كبيرة بالعربية ولو مشيت صح بدون حركات مضرة زي دي ان شاء الله مابتغير اي قطعة قبل ماينتهي عمرها الافتراضي تحياتي لحضرتك

---

كلام سليم 100%100
بس برضو الحاجات الي زي دي مع انها تافهه في وجهه بس برضو دي من افضل الطرق في تقييم العربيه انك تجيب عربيه متبهدله ماشيه كتير
وتشوف ايه سليم وايه بايز وايه اتغير فيها
ساعتها
مهو الصيني لو مشيت بيها كويس زي الفل
بس ممكن تلبس مطب واحد تغير في العفشه كلها

تقييم رائع برضو
وانا ليا واحد صاحبى معاه جين2 موديل 2008 مانيول
قالى عيوبها
1- مع الجرى بتسحب منو بنزين جامد
2- جلد الباب بيتخلع وكل شوية بيركبو (انا عربية والدى البيجو موديل 76 محصلش فيها الحوار ده الا قليل)
3- الفتيس والهاند بريك من كتر المسك قشرت
4- الكنبة اللى ورا فيها طقطقة غريبة
5- الكنبة الخلفية ضيقة كدة ولو رجع الكرسى كتير محدش يعرف يقعد ورا
6- الازار الكهربة علق كذا مرة وصلحو فى التوكيل
غير كدا بيقولى مميزاتها
1- تسارع جامد جدا
2- ثبات وهمى (هوا مقارنش بعربيات تانية)
3- السى دى والسوند سيستم حلو اخر حاجة
4- فعلا عربية على قد سعرها

بس هوا بيقولى انا كنت جبت صنى احسن
عموما هيا عربية كويسة بس لما يمر عليها كام سنة كدة عشان نعرف اعتماديتها
واسف للطويل

اقتباس:

---

المشاركة الأصلية كتبت بواسطة حماده المصري

والسبب انه في ناس بتطلع من 128 تركب ريو موديل 2000 يقولك دي ثبات خرافي
ده طبعا هسهسه وفي لخبطه كتير

ف برضو ملاك جين 2 بيقولوا ثبات خرافي
ف من هنا جت المقارنه بالسيفيك والمازدا
والجين اقل منهم طبعا
بس بالنسبه للحجم مقابل الثبات فهي متفوقه فعلا عن العربيات الي في سعرها وهجمها

---

تقييم يا أستاذ حمادة جميل و فيه حاجات كتير دقيقة

بالنسبة للنقطة التانية بتاعة الثبات
الحمد لله أحنا مكنش راكبين 128 قبل الجين 2
أنا لما وصفت الجين 2 بالثبات الخرافي لأني لما عملت مقارنة في الثبات كانت بأوبل فيكترا و أوكتافيا .... و فورد أسكورت .....

و أنا جربت المازدا 3 .... موتورها أنعم و تسارعه أحسن تحت 80 كم -س
و الثبات يعتبر متساوي

اقتباس:

---

المشاركة الأصلية كتبت بواسطة mahmoudzaied

تقييم رائع برضو
وانا ليا واحد صاحبى معاه جين2 موديل 2008 مانيول
قالى عيوبها
1- مع الجرى بتسحب منو بنزين جامد
جري على سرعة كام ؟؟ فوق 120 أي عربية هاتسحب بنزين كتير
2- جلد الباب بيتخلع وكل شوية بيركبو (انا عربية والدى البيجو موديل 76 محصلش فيها الحوار ده الا قليل)
جلد باب الجين 2 معمول كدا بقصد علشان يتم تغييره ... فيه عربيات تانية بيبقى الجلد ملصوق و لو حصله حاجة ... أنسى أنك تغيره
3- الفتيس والهاند بريك من كتر المسك قشرت
طبيعي لأن رأس الفتيس ألوان مش واخدة اللون الطبيعي الأسود بتاع بلاستيك العصايا
4- الكنبة اللى ورا فيها طقطقة غريبة
حلها بسيط و قلنا عليه و هي لف شيكارتون حوالين الحديد اللي بيركب مع بعضه علشان صوت الحديد يروح
5- الكنبة الخلفية ضيقة كدة ولو رجع الكرسى كتير محدش يعرف يقعد ورا
هي تصميمها كدا ...!!!

6- الازار الكهربة علق كذا مرة وصلحو فى التوكيل
فعلا بعض الناس ظهر معهم المشكلة دي
غير كدا بيقولى مميزاتها....
1- تسارع جامد جدا
2- ثبات وهمى (هوا مقارنش بعربيات تانية)
3- السى دى والسوند سيستم حلو اخر حاجة
4- فعلا عربية على قد سعرها
و أحسن من سعرها كمان لأن فيه عربيات في السوق سعرها مبالغ فيه

بس هوا بيقولى انا كنت جبت صنى احسن
فعلا الصني عربية ممتازة و لكن الجين 2 ممتازة أيضا
عموما هيا عربية كويسة بس لما يمر عليها كام سنة كدة عشان نعرف اعتماديتها
مع صاحبي و عامل بيها 105 ألف كم دلوقتي و مدة 3 سنين و مش مغير فيها حاجة جوهرية خالص و تقريبا غير الكاوتش مرتين
واسف للطويل

---

أرجوا قراءة تعليقي أمام كل نقطة

اقتباس:

---

المشاركة الأصلية كتبت بواسطة tutankhamoun

أرجوا قراءة تعليقي أمام كل نقطة

---

والله بعد كلام حضرتك انا مش عارف اقول ايه
فعلا الخبرة طبعا تتفوق
والف شكر على التعليق على مشاركتى

اقتباس:

---

المشاركة الأصلية كتبت بواسطة tutankhamoun

تقييم يا أستاذ حمادة جميل و فيه حاجات كتير دقيقة

بالنسبة للنقطة التانية بتاعة الثبات
الحمد لله أحنا مكنش راكبين 128 قبل الجين 2
أنا لما وصفت الجين 2 بالثبات الخرافي لأني لما عملت مقارنة في الثبات كانت بأوبل فيكترا و أوكتافيا .... و فورد أسكورت .....

و أنا جربت المازدا 3 .... موتورها أنعم و تسارعه أحسن تحت 80 كم -س
و الثبات يعتبر متساوي

---

عيب عليك يا استاذ توت

انا والله العظيم مش قصدي اساءه او تلميح حتة من بعيد ل بعيد
بس انا قولت كده على سبيل المثال لتحديد ايه مدى كلمه ثبات لما هقولها في التقييم
ومع ان الجين ثابته بس والله في فرق واضح لصالح المازدا خصوصا على طريق زي 6 اكتوبر
اصل ده طريق جامعتي 4 سنين رايح جاي كل يوم
المازدا اتقل وارسى بكتير ايضا الاحساس بالسرعه اقل بكتير من الجين وايضا في الغرز المفاجئه المازدا مش بتتهز زي الجين ولو ان الجين مش بتسبب ازعاج للركااب
بس شهاده الحق تتقال

اقتباس:

---

المشاركة الأصلية كتبت بواسطة حماده المصري

عيب عليك يا استاذ توت

انا والله العظيم مش قصدي اساءه او تلميح حتة من بعيد ل بعيد
بس انا قولت كده على سبيل المثال لتحديد ايه مدى كلمه ثبات لما هقولها في التقييم
ومع ان الجين ثابته بس والله في فرق واضح لصالح المازدا خصوصا على طريق زي 6 اكتوبر
اصل ده طريق جامعتي 4 سنين رايح جاي كل يوم
المازدا اتقل وارسى بكتير ايضا الاحساس بالسرعه اقل بكتير من الجين وايضا في الغرز المفاجئه المازدا مش بتتهز زي الجين ولو ان الجين مش بتسبب ازعاج للركااب
بس شهاده الحق تتقال

---

تصدق برضه أن طريق أكتوبر هو اللي أنا عملت عليه التجارب برضه
بُص أنا معرفش ظروف العربية اللي أنت كنت راكبها و ممكن يكون فيها حاجة مش مظبوطة مثلا و ممكن تكون مظبوطة و الله أعلم

على العموم العربيات اللي أنا جربتها برضه جربتها على نفس الطريق ( طريق الواحات المعفن )
و بعدين موضوع التسارع بتاع الموتور ... أركب مانوال و قولي أيه رأيك بعد كدا .... بس أنت اللي تسوقها .

بالنسبة لأحساسك مع الجين 2 و المازدا .... طبعا أنا معرفش أنت حسيت بأيه .
بس أنا جربت المازدا مرة واحدة فقط و علشان كدا مش بتكلم في الموضوع كتير .
إنما عفشة المازدا أنعم من عفشة الجين 2 و ده أكيد بيريح الركاب

و المرة اللي أنا جربت فيها المازدا كان مفيش فروق جوهرية بينها و بين الجين 2 إلا في التقفيل و الخامات الداخلية الممتازة في المازدا.

إنما ثبات .... متساويين ...... و تسارع موتور بتاع المازدا أنعم و تسارعه أحسن لغاية 80 و بعد كدا بيتساووا و الجين 2 بتطلع منها كمان ( بس تكون العربية مانوال )

بس و شكرا على الموضوع و شكرا لردك الجميل .
على فكرة أنا جربت الأكسنت .... ( مرة واحدة فقط )
و رأيي فيها الآتي
موتور ناعم و تسارعه ممتاز ( زي ما هيونداي معودانا ) و أحسن من بتاع الجين 2 في التسارع خصوصا لغاية سرعة 80 إلى 90
تقفيل كويس قوي ( خامات الصالون عادية خالص و كلها بلاستيك ) زي الجين 2 و زي أغلب العربيات في معدل السعر ده .

معجبنيش فيها الآتي :
لما ركبتها حسيت أني نزلت لفئة أقل من فئة الجين 2 من ناحية الثبات و التحكم في العربية .
بتنط و مش ثابتة و إن كان ثباتها أحسن من الفيرنا مثلا .
في الملفات ..... مش بتتحكم فيها خالص و لازم تقلل سرعتك .

هو بالنسبه للجين الي ركبتها كانت تقريبا زيرو
هو شاريها قبل ال 2009 بشهر تقريبا
وكان جايب قبلها صني ومعجبتوش عشان التنطيط

بس عموما المازدا فعلا اكفء بس مش بقلل من الجين
وكزا مرا بالمازدا جرينا بالمازدا مع جين كان الجين بيهدي على الملفات اكتر من المازدا
المازدا اوطى من الجين بالاضافه الى التقل والعفشه

في حالات التهور في السواقه بيبان الفرق


بس الجين المانيوال افضل من المازدا الاوتو في السحب
ومتهيالي ان الاوتو متساوي مع المازدا وممكن والله يكون اعلى كمان بفرق بسيط
من استعمال صديق للجين الاوتو 2006 تقريبا قالي اخرها 180

المازدا بقى اتفرج على وحده ماشيه وبص على الاستابيليتي بار الخلفي اتفرج على حجمه ومنظره المتطور هتعرف العربيه دي ليه محترمه
بالاضافه الى انها عفشه فورد بالكامل والفورد كلها عربيات مريحه جدا
وجامعه بين العفشه الناشفه في التعامل بس المريحه على الركاب
والجين كمان متهيالي عفشتها جامعه الاتنين بس الفرق للمازدا

النيو اكسنت تسارعها مانيوال افضل من الجين المانيوال وانا برضو جريت مع جينات كتير

وكمان متهيالي النيو الاوتو افضل والارقام الي اعلنتها الشركه تحدد كده

0/100 للاكسنت مانيوال 10.5 وانا جبتها في 9.5
الاوتو 12 تقريبا او 11.5 انا مجربتش على الطبيعه

من ناحيه الثبات هي فعلا اقل ثبات من الجين وتحكمها اقل بس انا من اول ما جبتها متعود عليها ولما بجري مع جين على الملفات بدخل معاه عادي او بهدي سنه بس الفرق هو بحس بامان سنه ده طبعا كله فوق 140 وانا عامه بتعافى في الملفات بس بتحس العربيه هتفلت منك بس بمجرد المناوره بين البنزين والدركسيون بتزبط

المشكله الاساسيه في النيو اكسنت ان العفشه الخلفيه قنطره (دنجل) مش ستابيليتي بار او اكسين منفصلين يمين وشمال وده نظام تعليق محترم برضو موجود في الجين
والمشكله دي موجوده بالصني بالاضافه الى ان الاتنين شنطتهم عاليين

بس الاكسنت كمجمل تقفيل وتعمير افضل من الجين ومتنساش انها جنط 14 انا ركبت 15 وجنط بقت افضل بكتيير

عموما الجين لواحد بيجري وعايز امان هتبقى افضل من الاكسنت

الاكسنت هيبقى موتورها قوي ثبات اقل وتقفيل بالكامل افضل من الجين
وعفشه ناشفه ومزعجه سنه

مع ان البلاستيك الموجود في النيو اكسنت افضل جوده من الجين

الا ان كل الموديلات المنتشر فيها البلاستيك دي بتعاني من وجود اصوات الديكورات خصوصا في الشوارع المكسره

وعامه ده شيء موجود في كل العربيات

والناس الي بتحلاظه وتدايق منه بتكون حساسييه زياده

وفي حالات قليله جدا بتكون الاسباب حقيقيه
كان يكون مثلا الدرج في حته مشروخه او مكسوره

أستاذ حمادة
أنا أتكلمت في نقطتين الخلاف ما بين المازا و الجين
و هما .... الثبات و التسارع
أنا لم أشكك لحظة واحدة في المازدا و لكن أنا قلت إن ثبات الجين 2 عالي جدا لأني جربتها و قارنتها بعربيات ثباتها معروف أنه ثبات عالي زي الأوبل فيكترا و برضه أنا جربت المازدا بس كانت مرة واحد و علشان كدا أنا مش عايز أتكلم كتير لأن مرة واحدة و بعربية واحدة مش كفاية أني أحكم على الموديل كله .
و لكن اللي أنا جربتها زي ما قلتلك ....... كانت متساوية مع الجين في الثبات و التسارع لغاية 80 أحسن و بعدين الجين بتطلع منها بس مش بفرق كبير .

بس مين قال أن الجين 2 أخرها 180 ..... ؟؟؟؟؟؟؟؟؟؟؟

أنا جربتها بنفسي و جايب بيها 190 على طريق الواحات المعفن ..... و روحت لغاية الصينية بتاعة المنطقة الصناعية ( و ده كان للتجربة فقط ) أنا مش بشجع على السرعات العالية خالص لأن أحسن سرعة تمشي عليها في أي مكان في العالم و بأي عربية لا يمكن أن تزيد أن 120 ( دي سرعة الأمان لما يكون الطريق يسمح بذلك )
دي بقى شوية صور لعداد الجين 2 و هي جايبة 210 و شوية فكة
http://i32.tinypic.com/2gt1amh.jpg
http://i43.tinypic.com/1ibubn.jpg
و دي سرعة 200

http://i40.tinypic.com/r0qa0z.jpg

ياباشا انا كان كلامي على الاوتو وكمان على الموديل القديم

المفروض ان الجديد في تعديل بيخليها اسرع

انما الكلام كله على الاوتو والقديم كمان وده من واحد معاه العربيه


بس ان كان على الجين المانيوال ف هي بتطلع مستريع من المازدا الاوتو

اقتباس:

---

المشاركة الأصلية كتبت بواسطة حماده المصري

ياباشا انا كان كلامي على الاوتو وكمان على الموديل القديم

المفروض ان الجديد في تعديل بيخليها اسرع

انما الكلام كله على الاوتو والقديم كمان وده من واحد معاه العربيه


بس ان كان على الجين المانيوال ف هي بتطلع مستريع من المازدا الاوتو

---

تمام في نقطة أن الأوتو في الجين 2 أخره بتاع 180 أو 185
( و اللي عايز يركب جين 2 علشان الجري ...يبقى مانوال على طول )

إنما الجديدة .... هي هي القديمة ما عدا تحسين العزم عند 2900 إلى 3200 لفة
إنما التسارع و السرعة القصوى واحدة لأن الموتور ميغروش فيه حاجة غير نظام فلتر الهوا
مع تحياتي

انا عن نفسى ومعايا اوتو والعربية 2006 مافيش مازدا طلعت منى حتى الان بس سرعات عالية مش تسارع من الصفر والى افتكرة اوى الصحراوى وكان مكبر الجنوط وكنت بسيبة يطلع واروح اجيبة كمان حاجة كنت اتعمد اطلع منة فى ملفات الصحراوى الى من ناحيتنا واتفرج علية وكان بتتهز من ورا فى الملف عادى جدااا وكان مش عارف يعمل حاجة
خد بالك الثبات والامان مش هاتحس بية وانت سايق او قاعد فى العربية بس لا ....التجربة الحقيقية لما تقابل مفاجاءة وياسلام لو داخل ملف هاتعرف يعنى اية ثبات خرافى ودة عن تجارب ودة مش افتراء على المازدا لانها فعلا عربية محترمة وبحبها لانها اقرب شكل لجين2 الجميلة :36_9_4:
على فكرة انا جبت بالاوتو 200 مع جين2 لكن العادى 190

ربنا يحميها لنا
ربنا يوفق

أنا حاسس انى باتفرج على مباراة ممتعة
شكرا أ/ حمادة و أ/توت وأ / khpopo

ربنا يباركلكم فى عربياتكم ويحميكم

في حاجه انتوا نسيتوها ان العضو الكريم باختصار ماكانش سايق وده طبعا ليه تأثير كبير على تقييمه
زي مثلا انه مش هيحس بالثبات التقديري للعربيه وهو مالكها في الدريكسيون
وكمان صوت الموتور هيكون مزعج بالنسباله لانه مش متفاعل معاه
كمان انت بتقارن عربيه تمنها ارخص بكتييييييير من اي واحده من اللي قارنتهم بيها
وعلى فكره انا عربيتي اوتو 2008 ماشيه ان شاء الله حاليا 26000 كلم
وكل مشيي بيها 180 واحيانا بتدخل على ال 190 كلم
والطبيعي خالص 140 كلم
وطول الوقت قرص وشد
مش عاوز اقوللك ان كل تغييري الار بي ام على 6500
الا نادرا بيكون 4000 ومع التكييف كمان نفس القياده
اقولك حاجه انا جبت الجين 2 وحاططها تحت الاختبار كعمر افتراضي باسلوب قيادتي دي اللي هي تسمى ظروف صعبه على السياره
لو ماستحملتنيش على الاسلوب ده تبقى عربيه مش عمليه ولا تلزمني
وربنا يباركلي فيها

بجد موضوع يستحق التقدير والاهم انه من ناس فاهمة كويس جدا.
بصراحة انا استفد جدا من الموضوع ده واتمني انه يتم تثبيته لانه اكيد فيما بعد هيكون في مقارنات اكتر ومنقاشات اكتر.

أ / M.Nabil
سؤال لو سمحت
ازاى بتتحكم فى وقت تغيير النقلة فى الاوتو عند ار بى ام معين ....
وسؤال أخر ....هل الاوتوماتيك مش مضايقك فى الجرى والشد وكده
وعلى مهلك وربنا يستر طريقك
وشكرا مقدما
وتقبل تحياتى

عذرا للخطأ
أقصد الاستاذ tweety

مع الشكر

الاخ العزيز الاستاذ مصطفى صديق
مقدار دوسة قدمك على دواسة البنزين هو اللي بيتحكم في النقل عند ار بي ام معين طبعا دي بتيجي من التعود على السياره
والاوتوماتيك احيانا بيكون اشد في القرص والجري من المانيوال بالضغط على دواسة البنزين على اخرها العربيه طبعا مش هتغير الا على الريد لاين 6500
ولو مثلا عاوز تعدي عربيه تانيه دوس بنزين وهتلاقي العربيه جابت الغيار اللي قبل اللي انت ماشي عليه وهتعدي وبعد كده شيل رجللك هتلاقيها رجعت تاني على الغيار اللي بعده
ماقلتلكش بقه ليه احيانا الاوتوماتيك بيكون اشد في القرص والشد
عارف ليه ؟
لان انا لو راكب مانيوال مش هيجيلي قلب اني اوصل الاربي ام على 6500 وهغير بالكتير على 4500
يمكن لاوتوماتيك اللي علمني اني اوصل للمدى ده في لفات الموتور 6500
وربنا يباركلك في سيارتك
اتمنى اكون افدت الجميع

شكرا أ /تويتى
متشكر جدا على اهتمامك وردك وعلى المعلومات دى
معنى كلامك كده ان الاوتوماتيك برده حلو فى الجرى والسحب وكده...مش زى ماكنت واخد فكرة عنه انه استجابته بطيئة والعربية بتنقل بمزاجها

انا كان عندى زمان لانوس اوتوماتيك وكان فيها مفتاح للقيادة الرياضية وكان بيخلى العربية تأخر فى النقلات كلها وبالتالى تسحب اكتر

كلام حضرتك كده معناه انى ممكن اوصل لنفس الطريقة دى مع شئ من التحكم فى وقت النقلات

شاكر جدا ليك وربنا يخليك ويباركلك فى عربيتك انت كمان والاخوة كلهم
وتقبل تحياتى...