بعد الجزء الاول ازاى تلمع عربيتك ب5 جنيه فقط
دى تبقى الحلقه التانيه من دليلك فى ترويش السياره باقل المصاريف والخساره.

الموضوع المره دى بصراحه جه صدفه مش شطاره منى والتفاصيل كالتالى:-
لو بصينا لمصاريف الكار كير نلاقيها باى حال من الحوال مش هاتقل عن 100جنيه
فبدأت ادور عن الكيماويات اللى بيستعملوها فى الكار كير وده مش موضوعنا دلوقتى لكن هانركز على الجزء الخاص بتنظيف الارضيه والسقف لانه ده مرتبط بموضوعنا
لو معاك اطفال زى حالاتى هاتلاقى بقع غريبه فى ارضيه العربيه ومش هاتعرف جت منيين
فى الكار كير بيفكوا الكراسى ويجيبوا ازازه بلاستيك فيها محلول لونه اخضر وريحته غريبه ويبدأ يدعك الموكيت لغايه ما يرجع زى الجديد ويشفط المياه بالهوفر وينشف الموكيت بالهوا المضغوط والمحلول ده غالبا ما بيسترخصوايشتروا الشامبو المخصص للعمليه دى ويستخدما مزيج من الصابون السائل اللى بيتباع فى البنزينه الزجاجه ب 2.5 جنيه والبنزين عشان بيطير بسرعه وبيطلعوا بيه البقع الصعبه
المهم انا مش مستعد افك كراسى والقلبان ده فقلت خلاص اجيب شامبو تنظيف السجاد واجرب بيه

وبالفعل اشتريت حاجه عباره عن بخاخه وعبوة اقتصاديه (يعنى من غير بخاخه)وبتاخد عليهم التالته هديه ب28 جنيه وبتتباع عند ماى واى (my Way)اللى فى الالف مسكن اللى فى جسر السويس ودى شركه فى العبور بيبيعوا مستحضرات تجميل على منظفات على برفانات على مواد غذائيه وكده
المهم شمرت القميص والبنطلون وهاتك يادعك بالمحلول المخفف بالشامبو ده لغايه ما الموكيت رجع جديد والمفاجأه بقى ايه انه طلع منظف ومعطر للسجاد والموكيت وريحته جميله وشيك جدا جدا جدا تقريبا نفس المعطر المستخدم فى المساجد لتعطير السجاد
طبعا خلصت ونشفت العربيه وسبتها وتانى يوم الريحه هيا هيا
تالت يوم برضه الريحه هيا هيا
حوالى اسبوع لغايه دلوقتى ما عملتش غير انى بخيت مره بالمحلول المخفف ده عشان الريحه تصحصح تانى وبالمعدل ده العبوه هاتكفى من 6 شهور لسنه ان شاء الله
والسلام عليكم ورحمه الله


نقل للكماليات بمعرفتى

مشرف القسم العام