الموضوع: مشكله كهربا

لا داكمان ممكن تكون تعليقه بعد التبطيل فى الكونتاكت

يعني ياباشمهندس سمير دي يكون حلها بسيط ولا ايه والي يحلها يكون كهربائي ولا ميكانيكي؟

خللى كهربائى شاطر يراجع الأول على ريش الكونتاكت....لأن لو فيه تعليقه حتستمر المكنه فى الدوران شويه بعد التبطيل........طالما أنت وطيت كهربة العربيه بتأخير الشراره شويه.....لأن ده بيكون السبب الرئيسى فى أغلب الأحيان .....وياريت تبقه تقولنا على النتيجه علشان نعرف عملت أيه ونطمن ...ويارب يكون مفيش غير السبب ده.....

_ بس برضه عاوز أسألك علشان أكون مطمن معاك قبل متروح لكهربائى....السلانسيه عندك مظبوط وسرعته ثابته ولا المكنه بترعش فى السلانسيه

هيا الصراحه المكنه مش بترعش بس ساعات بلاحظ ان عداد الار بي ام ساعات بيكون فوق الواحد بشويه يعني حوالي 1200
و مع المشي شويه بينزل علي الواحد بالظبط
بس فيه حاجه كمان ياباشمهندس انا نسيت اقول لحضرتك عليها
انا اول لما بدور العربيه بتكون واطيه اوي وبعد كده تعلا اوي لحد 1500 وتفضل علي كده شويه لحد لما تسخن لما ادوس دوسه بنزين تنزل بس ساعات بعد لما تنزل وانا ماشي لما ادوس بنزين واجي انقل الاقيها عليت تاني ولازم اكبس بنزين و اسيب علشان ترجع توطا لحد ما امشي شويه متعملش الحركه ده يعني بحس كده انا دواسه البنزين اوالسلك زي ما يكون بيعلق
مع العلم ان انا خليت ميكانيكي يبص عليها وقالي ده انت التشوك عندك مفصول

لا دا أنت كده مش محتاج كهربائى والكونتاكت سليم

_ أنت فعلا محتاج تعمل صيانه ونظافه للكربراتير ....وبالمره غير كل البيكات وخليه يحكم جوانات الكربراتير كويس علشان مفيش هواء يتسرب من أى مكان .......

بس يا باشمهندس سمير الحكايه دي مش بتحصل غير لما تكون العربيه بارده اوي يعني الصبح بس وبعد كده بتبقي تمام المشكله ان انا بخاف اي ميكانيكي يلعب في الكاربيراتير
و احنا عندنا هنا مفيش حد متخصص في الكاربيراتير لان انا من المحله يعني الميكانيكي بيكون بتاع كله
طيب مش ممكن انا اعمل الحكايه دي و انضف الكاربيراتير وهو في مكانه بالسبراي ده وخلاص؟

يامراحب....برجال الغربيه

_ دا أحنا طلعنا بلديات......على فكره أنا من مركز بسـيون بس بشتغل فى الأسماعيليه وعلى طول كل شويه بأنزل البلد...............لزياره الوالدين والأخوه

- أنت ممكن مبدئيا تحاول تأمن دخول أى هواء من الخارج للكربوراتير (مثلا تعيد رباط تثبيت الكربوراتير على المانيفولد وممكن تلف جوان سيلكون حرارى من الخارج على المربع ده وتستنى لما ينشف وتجرب ) لأن المنطقه دى من أكثر المناطق تأثيرا على آداء الكربوراتير....وممكن يكون الجوان اللى فيها مش كويس......حاول تعمل اللازم معاها الأول.... وجرب قبل ماتخللى حد يفك الكربوراتير وجرب وقولى..............

دا انا ليا الشرف ان حضرتك طلعت من الغربيه
بس لو الكلام زي ما حضرتك بتقول ليه بتعمل كده وهيا بارده بس و بعدين المفروض الار بي ام في السلانسيه بعد ما العربيه تسخن يكون تحت الواحد ولا علي كام؟؟؟
لان عندي لما العربيه بتسخن كويس بيكون علي الواحد بالظبط او اعلا بشويه صغيره
بس انا مش عارف هو كده يكون فيه ايه لان الماتور حالته حلوه ولما بتدور بيجيب ميه من الشكمان كمان
وهل ده ممكن يكون له علاقه بظبط التاكيهات لان انا بسمع صوت التاكيهات وهيا لسه بتسخن لكن بعد كده بيختفي
معلش ياباشمهندس انا متقل علي حضرتك