الموضوع: افضل طريقة لركن سيارة

المشاركة الأصلية كتبت بواسطة Ahmed Hassan

نفرض انك هتركن على اليمين (موازي للرصيف بين عربيتين موازيتين للرصيف). أول حاجه لازم تقدر الأول المكان بين العربيتين يكفيك و لا لأ؟ لو يكفيك اتبع الخطوات التاليه:

1- العربيه اللي قدام هتقف جنبها موازي ليها بالضبط. الخطوه دي مهمه جدا و سر نجاح الخطوات التاليه انك تقرب من العربيه جدا "بس من غير ما تخبطها طبعا "
2- هترجع ورا بشويش و الدريكسيون معدول لغايه ما تشوف البوز الشمال لشنطه العربيه اللي جنبك من الثلث الأخير من زجاج الباب اليمين الخلفي لعربيتك (معلش ركز معايا مش هعرف ارسمهالك).
3- أول ما يظهر بوز الشنطه... تكسر الدريكسيون يمين على الآخر و تكمل رجوع لغايه ما الكاوتش الخلفي يبقى بينه و بين الرصيف حوالي من 10 الي 20 سم (ممكن توطي مرايه الجنب اليمين لتحت علشان تشوف الرصيف) "خليك حذر في المرحله دي و بص على العربيه اللي وراك لأن لو المكان ميكفيش عربيتك هتخبط العربيه اللي وراك"
4- اول ما المسافه بين العجل الخلفي و الرصيف توصل ما بين 10 الى 20 سم فرمل و اكسر الدريكسيون شمال على الآخر و كمل رجوع بشويش "في المرحله دي تبص على العربيه اللي قدامك علشان متخبطهاش بالرفرف الأمامي اليمين لعربيتك.
5- لو المكان ضيق شويه... او كانت الدخله بتاعتك مش صح 100% من الأول ممكن تحتاج تكسر يمين تاني و تطلع قدام شويه.. و بعدين شمال على الآخر و ورا تاني علشان تعدل العربيه.

مع التجربه و التكرار هتلاقي نفسك بتركن اسرع اقرب من الرصيف.

يا ريت اكون قدرت اساعد بحاجه.. و لو اني عارف ان الشرح يلخبط شويه.

الطريقة دي 100 100 و زي ما الكتاب بيقول...

في الخطوة رقم 2 ممكن تستخدم الجزء المثلث الصغير اللي موجود في الشبابيك اللي ورة في معظم العربيات (الشراع) ده لو بتركن ناحية اليمين يعني اول ما بوز العربية اللي وراك يبان في المثلث ده تقف و تكسر الدريكسيون

اما لو بتركن تاحية الشمال خلي بوز العربية اللي وري في الكورنر الشمال التحتاني من الازاج الخلفي (عند ماركة الازاز غالبا) ده طبعا و انت راجع عدل و اول ما بوز العربية اللي وراك يبان تقف و تكسر الدريكسيون