الموضوع يا أستاذ محمد مش عند ولا تحدي ، على العكس تماما

أنا عايز أوضح فكرة معينة (وجهة نظر) إن الأوتوماتيك مش بالسوء ولا بالضعف اللي معظم الناس متخيلاه ومقتنعه به ، يا راجل انا بأقابل ناس تحلف إن عمرها ما تركب أوتوماتيك لو ببلاش ، وواحد تاني قال سمع من ابن خالته إن جوز أخت جاره في السكن القديم كان ابن عمه عنده عربيه مش أوتوماتيك لا هيدروماتيك والفتيس ما قعدش معاه أكثر من سنة ؟؟!!!!

بكل واقعية أنا بقالي 13 سنة ما بأسوقش غير أوتوماتيك كابريس - كريسيدا - نوبيرا - ليجانزا ، ولم أواجه أي مشكلة على الاطلاق طالما إنك بتغير زيت الفتيس والفلتر في المواعيد المحددة (من 15000-20000كم على الأكثر ) ، الأداء أكثر من رائع - العزم ممتاز ، ومش ممكن حأركب مانيوال على الاطلاق .

انا كنت من سنه تقريبا عند منصور شيفورليه في ش الطيران بأتفرج على الأوبل البائع أخبرني إنها بتنزل دلوقتي أوتوماتيك كتجهيزات أساسية (ستاندر) ومافيش مانيوال (العهدة على البائع) يبقى الألمان بجلالة قدرهم ولهم ما لهم من باع في عالم السيارات لغوا المانيوال من حساباتهم ، نيجي نقول إن الأوتوماتيك ضعيف ووحش وكله عيوب !!!

التقنية الحديثة في الأوتوماتيك للسيارات 2009-2010 تجعل من الأوتوماتيك متعة حقيقية في القيادة وفي القوة والأداء نظرا لتعديل Gear Ratio وتحسينه عن الأول بكثير وأيضا لتعديل زمن النقل سواء في Kickup أو الـ Kickdown وإضافة زرار الـPower للفتيس ودمجه بالمانيوال في الـ TipTronic ....الخ ، الاتجاه الحديث كله الآن للأوتوماتيك والشغل كله والأبحاث والتحديث والمستقبل للأوتوماتيك .

الشاهد في الحديث إن الناس تغير فكرتها القديمة البالية وغير الصحيحة والمغلوطة عن مشاكل الأوتوماتيك التي تحدث إما لسوء الاستخدام أو سوء الصيانة أو سوء وجهل في الاصلاح ....الخ

ومع ذلك إثبات وجهة نظري (مش حأقول تحدي) قائمة ومستعد أثبتها مع أي عربية أخرى مانيوال تكون مماثلة لعربيتي علشان المقارنة تكون عادلة ، ونشوف الأوتوماتيك ممكن يعمل ايه لو متزبط صح وبيتساق صح بغض النظر عن سائق المانيوال محترف أو معوق أو لسه بيتعلم .

واختلاف وجهات النظر لا يفسد للود قضية .

ويحيا الأوتوماتيك