السرقة هي جريمة يعاقب عليها القانون و وزارة الداخلية هي الجهه المنوطة بتنفيذ أحكام القانون . . . . جميل
لا مش جميل لان ده مابيحصلش دا السرقه بقت تقريبا مقننه في بلدنا المحروسة
مثال
سرقه علامات المصنع من علي السيارات علشان السادة سواقين التاكسيات يلزقوها علي عربياتهم فتلاقي التاكسي زي مسابقة مجلات ميكي (اذكر كم نوع سيارة في الصورة) و ممكن كمان يركب شبكة عربية تانيه و العربيات دي بتعدي علي لجان المرور بسلام و من غير مشاكل و اللي مش عاجبه يضرب دماغه في الحيط.
مثال تاني
سرقة الموبيلات ، الحقيقة الموضوع ده مقنن جدا بالذات في العجمي ، اللي يتسرق موبايلة يروح يعمل محضر و بعد اسبوع يروح المحكمة علشان يقدم3 طلبات للتتبع (قال يعني دي محتاجة طلب) و يستني شهر اتنين و يروح يتابع (المفروض يبعتوا ردود الشركات بس مبيحصلش) و لما الشراكات التلاتة يردوا ان لم يستدل علي الموبايل تروح تعمل محضر تاني و اطلبات التتبع تاني ليييييييييييه . . . لان التتبع لمدة 15 يوم فقط.
طبعا سرقة الموبايل سهلة و مربحة و العصابة بتاعة العجمي عاملة نظام حلو تضامنا مع الشرطة الصاحية و ضد المواطن ابن الـ . . . .
يسررقوا الموبايل و يركنوه حوالي 6 شهور و يلموا مجموعة كويسة و يسافروا محافظة تانية و يبيعوهم بأسعار معقولة و لما المواطن الغير شريف (لانه متأكد ان الموبايل ده مسروق لان مالوش ورق و سعرة رخيص قوي) يشغلة يبقي هو اللي يستاهل (ده بفرض ان صاحب الموبايل الحقيقي لم ييأس و مازال يقوم باجراءات التتبع)
ازاي الحال بقاااااااا
تحبوا امثلة تانيه . . . . . كفاية كدة لأن أنا اكتئبت خلاص
الخلاصة :
مصر مصر مصر لك الله يا مصر