الموضوع: ارجو الرد العاجل :تتقييم برودا كانشيل 99

المشاركة الأصلية كتبت بواسطة mucho

ليه يا استاذ محمود شايف ان الماروتي احسن منها؟

شوف يا سيدى اولا البرودوا ممتازة بس الماروتى احسن للاسباب الاتية من وجهة نظرى:
1- الماروتى منتشرة جدا جدا (ده فيه منها تاكسى) عكس البرودوا
2- توكيل سوزوكى ضفره برقبة هاشم باص اللى الحاجة الوحيدة العدلة اللى بيبيعها هيا الكانشيل والكليسا ومع ذلك هوا مموتهم.
3- قطع غيار الماروتى رخيصة جدا ومتوفرة جدا جدا. البرودوا فى حاجات تروح دمياط علشان تلاقيها وممكن تضطر تروح كمان بورسعيد يا اما تحاول توفقلها من الدايهاتسو.
4- سعر اعادة بيع الماروتى افضل لانها مطلوبة ومعروفة عن البرودوا
5- فى النهاية الماروتى يابانى تقفيل هندى والبرودوا ماليزى تقليد يابانى
وشكرا

المشاركة الأصلية كتبت بواسطة dr_ahmed_abdelghany

1- معاك فيها
2- معرفش حاجة عن توكيل ماروتى لكن فعلا توكيل هاشم باص مش قد كده وأخص بالذكر المبيعات أما المهندسين فزى الفل
3- أختلف معاك : قطع غيار الماروتى مش رخيصة ومش متوفرة (فى بنها) ، وممكن تجيب معظم قطع غيار الكانشيل بنفس الطريقة اللى هتجيب بيها قطع المكاروتى وهى "بالطلب" من أى محل وهو هيجيبها
4- سمعة البرودوا أفضل جدا عند الصنايعية وعند معظم المشترين وأى عربية منها معروضة للبيع بتتباع أسرع من الماروتى (على حسب ما أنا ملاحظ)
5- برودوا يابانى تقفيل ماليزى وماليزيا دلوقت قمة فى التكنولوجيا وبينى وبينك كفاية عندى إنهم مسلمين

من عندى بقى .. حالة الكانشيل بعد 10 سنين شغل جنب ماروتى برضه 10 سنيت شغل : الفرق ملحوظ
الكانشيل أكثر تحملا وصمودا وأفضل أداءا على مر السنين ، ودا لا يعنى إن الماروتى سيئة قطعا لا ، لكن الكانشيل أفضل فى رأيى لما سبق ذكره.

دكتور احمد شكرا على تشريفك لى بالرد ولكن برده انا ليا تعليق على النقط اللى حضرتك كاتبها :
1- احنا متفقين
2- تقريبا احنا متفقين ضمنيا
3- بنها مش مقياس نهائى لسوق قطع الغيار المقياس توافر قطع الغيار فى القاهرة والاسكندرية خاصة القاهرة لانها مركز قطع الغيار فى التوفيقية وشارع زكى ودمشق واحمد حلمى والوكالة وشبرا وغيره كتير. ومن هذا المنطلق الماروتى تكسب بمراحل عن البرودوا. للعلم بنها مليانة ميكروباس سوزوكى الصغير ده و اعتقد لا بد من وجود محلات قطع غيار سوزوكى عندكم لهذا السبب واعتقد لو حضرتك سألت عندهم هتلاقى.
4- مش معاك نهائيا فى هذه النقطة ده فيه صنايعية كتييييييييييييييييييير ميعرفوهاش اصلا واللى يعرفوها بيقولوا قطع غيارها مش متوفرة. اما البيع فليس من المنطقى ان العربية الاقل كثيرا فى الانتشار تتباع اكتر من العربية اللى زى الرز فى الشوارع ديه قاعدة ثابتة فى سوقنا المصرى لا يوجد لها اى استثناءات او شواذ مطلقا.
5- لا يمكن مقارنة ماليزيا باليابان .... بس غلبتنى فى نقطة (كفاية عندى انهم مسلمين) بصراحة فى دى عندك حق.

اخر نقطة بعد 10 سنين اللى بيفرق بين عربيتين هو نضافة الاستعمال والصيانة وبصراحة انا مشفتش كانشيل استعمال 10 سنين علشان احكم عليها (الانتشار ضعيف جدا) بس بصراحة الماروتى القديم بحالته ولو مش بحالته بباكوين بيرجع زيرو بدون مبالغة. وسعيد جدا بمداخلة حضرتك

المشاركة الأصلية كتبت بواسطة mucho

هو احنا كده يا استاذ محمود قدام عربيتين مكونات يابانيه والتقفيل هو اللي مختلف
يعني زي ما حضرتك قلت الماروتي ياباني تقفيل هندي بينما الكانشيل ياباني تقفيل ماليزي
يعني الاختلاف والمقارنه هاتكون من حيث التقفيل (الماليزي-الهندي)
والدولتين بقى ليهم دور مهم اوي في عجلة الصناعه والتطور

راي الخاص كانشيل افضل من ماروتي من حيث

التطور هي متطوره عنها
الصالون اوسع
الصاج اقوى
التحمل اكتر

وماروتي افضل من كانشيل من حيث

انتشار اكتر
قطع غيار وصيانه متوفره اكتر بشويه
سعر اعاده بيعها افضل بالمقارنه بالكانشيل "نفس السعر رغم ان الكانشيل متطوره عنها"

موضوع بعد 10 سنيين العربيه هايكون شكلها ايه هي مش دي المساله هي المساله انك مع الماروتي بعد 5 سنين ممكن تزهق منها ومن شكلها وقلة امكانياتها وانها ضيقه وتتستغنى عنها
لكن مع الكانشيل مش هاتحس بده اوي لانها متطوره وقابله للتطوير اكتر ماتنساش انها بتنزل بتكييف وازاز كهربا وامكانيات تانيه موش متوفره في الماروتي وصعب تتوفر فيها لان مثلا التكيف اذا ضفته عالمروتي العربيه موش هاتستحمل، لو حبيت تجيب ليها كاسيت محتاج تبوظ شوي في شكل التابلوه ويمكن تركب قطعه اضافيه عشان تحط فيه الكاسيت، وغيرو وغيرو

وبيجد الف شكر ليك يا استاذ محمود ويا دكتور احمد احنا كده بقى عندنا مرجع كويس للمقارنه لاي عضور مابين عربيتين اثبتوا جدارتهم عالطريق

العفو يا استاذ موشو ده انا اللى متشكر على كلامك الرقيق والمهذب ومنطقيتك فى الرأ ىولكنى اتحفظ على بعض النقاط كالاتى:
1- انا مش معاك ان العربيتين يابانى لا طبعا الماروتى يابانى من شركة سوزوكى اليابانية ولكن تقفيل هندى اما البرودوا ماليزى تقليد دايهاتسو. خلى بالك فى عربيات صينى كتير بتستخدم مكونات او بتقلد اليابانى مش معنى كده انهم يابانى فى فرق كبير فى الصناعة لصالح الماروتى لانها شركة يابانى مع احترامنا الشديد برده للصناعه الماليزية.
2- الكماليات لا تقاس بها السيارات والا كان الصينى هو رقم واحد فى العالم ومثلا لا تشترى التو ولا كليسا ولا ماروتى ولا كانشيل واشترى شيرى كيو كيو او لوبو او ايديا. ثانيا الماروتى اصلا بتنزل بتكييف بس التوكيل هوا اللى بينزلها من غيره وهو لا يؤثر نهائيا عليها اما الكاسيت فهيا لها كاسيت مخصوص بيركبلها ورخيص وبيركب فى مكانه فى العربية وانا لسة شاريه لعربية زوجتى وممتاز بصراحة كذلك السنتر يمكن تركيبه وكذلك الزجاج الكهرباء وان كان الاخير فقط هوا اللى شكله هيبقى وحش لانه مش معمول حسابه.
3- لو انت هتزهق بعد 5 سنين من الماروتى يبقى هتزهق من البرودوا احنا بنتكلم على عربيتين الاختلافات بينهم طفيفة جدا جدا الشكل قريب جدا والمساحة الفرق فيها مش ملحوظ والامكانيات متساوية اذا العربيتين كانوا فول اوبشن. للعلم انا طول بعرض بارتفاع لما ركبت الماروتى عرفت اسوقها بالعافية اما الكانشيل معرفتش على الرغم من ان الكانشيل فعلا اوسع قليلا لكن وضعية السائق للاحجام الكبيرة والاطوال فى الماروتى افضل من الكانشيل.

وفى النهاية فعلا زى ما حضرتك قولت العربيتين ممتازين وفعلا اللى هيجيب واحدة فيهم لن يندم بس بشرط يكون حجمه طبيعى :)