الموضوع: تقييم مبدئي جدا للسيمبول الأتوماتيك

يمكن يكون التقييم ده مش دقيق جدا لكن سامحوني أنا كل اللي مشيته بالعربية 800 كم بس لحد دلوقتي

1 مواد التشطيب الداخلي مقبولة جدا
2 كمبيوتر رحلات يوضح عدد الكيلومترات الاجمالي، كيلومترات الرحلة ، الوقود المستهلك، متوسط استهلاك الوقود،استهلاك الوقود الحالي ، المسافة المتبقية تقريبا لآعادة ملء تنك البنزين، متوسط السرعة خلال الرحلة.
3 استهلاك البنزين : 9.5 لتر لكل 100 كم في متوسط سرعة 26.5 كم / ساعة
4 ثبات ملحوظ حتى سرعة 120 كم /ساعة و عند المنحنيات (لم أحاول تخطي السرعة المذكورة أعلاه)
5 مساحات تخزين داخلية واسعة في الأبواب و درج التابلوه
6 مساحة الشنطة كبييييييييييييييييييييييي ييييييييييرة
7 عدد لفات الموتور عند سرعة 100 كم / ساعة = 2,7 * 1000 لفة / دقيقة Rpm
8 عزل الصوت الداخلي ... جيد جدا
9 استقبال الراديو ممتاز في ال Fm و ال Mw داخل المدينة و على الطريق السريع حتى بدون تركيب الأيريال
10 العفشة ناشفة في المطبات و بتدب شوية (لازم أسأل على الموضوع ده في مركز الصيانة).
11 صوت الموتور عالي نسبيا من الخارج و غير ملحوظ من داخل السيارة على الأطلاق
12 بصراحة ما عرفتش أقيس زمن التسارع من صفر الى 100 كم / ساعة و لكن عموما سحبها مرضي جدا بالنسبة لراجل معدي سن ال 45 زي حالاتي
13 التكييف عادي ما أقدرش أقول عليه سوبر زي تكييف السيارات الياباني مثلا و برضه لسه الحر ما دخلش علشان أحكم عليه مظبوط

المشاركة الأصلية كتبت بواسطة badry

الف مبروك اولا....ربنا يديك خيرها و يكفيك شرها...

اكتر حاجة مستفزة فى العربية دى...ان مافيهاش فرامل Abs...انا مش عارف الوكيل ازاى تفكيره ضيق كده....

الله يبارك فيك يا أخي العزيز... بس على فكرة العربية فيها ABS يمكن بس حضرتك ما أخدتش بالك ...أنا كمان نسيت أقول ان الفرامل بتاعتها ممتازة

المشاركة الأصلية كتبت بواسطة badry

شكرا يا ‎أخي على توضيحك ......

بس الموضوع إن مش أنا إلي ‎مخدتش بالي.....دول الناس الأفاضل بتوع Renault Call Center هما إلي أكدوا لي إن مفهاش ABS !!!

و بكدة العربية بتنافس بقوة.....على الأقل بالنسبة لي....

عندي سؤال كمان لو سمحت....بتحس إن العربية ‎خفيفة بشكل يأثرعلى الثابت فالسرعة العالية...زي الكليو كده ؟؟
و ‎أخبار السحب إيه في الأوتوماتيك ؟؟؟

العربية الحمدلله ثباتها ملحوظ لحد 120كم / ساعة و أنا ماجربتش سرعة أعلى من كده (حكم السن بأة )
و سحب الأتوماتيك برضه مناسب لي جدا ... و للأسف ماقدرتش أقيس زمن التسارع مثل ما ذكرت من قبل ... و شكرا ليك أخي الفاضل

للأسف الشديد حتى الأن موقع رينو مصر الوحيد الي مش هاين عليه يطور الموقع ويضيف السيمبول ومواصفاتها الفنية .....مجرد لينك لفيديو العربية بدون أي فائدة وكل الناس بتطبل على بعض بدون أدنى علم بالشىء

طبعاً لازم لمبة الABS تنور مع الكونتكت......بس إنت ممكن لزيادة التأكيد تمشي في حتة فيها رمل خفيف وتدوس دوسة فرامل محترمة وشوف البدال تحت رجلك هايعمل إيه والعربية هاتفرمل إزاي .....

تقييم جميل ربنا يباركلك فيها

حكاية العفشة دى لو حاسس إنها ناشفة يبقى تهتم بيها فى الصيانة القادمة

العربية باين عليها إنها تحمل موروثات رينو من خلال وصف حضرتك ليها....و ليس من شيم رينو إن تكون فيها حاجة ناشفة على الإطلاق...حتى لو لسه جديدة..أى نعم هتكون أطرى بعد شوية بس مش لدرجة إنك تقول عليها ناشفة و هى جديدة...فلابد من السؤال و المتابعة عند الصيانة القادمة....

و 1000 مبروك...و إن شاء الله هتستمتع معاها كتير...و شكرا على الموضوع