أنا وقعت يا رجالة


الحمد لله تعالى على النعمة والفضل والمنة

الحمد لله على الحفظ والسلامة

الحمد لله الذي لا يحمد على شئ سواه


الحقيقة دي مش اول وقعة –ويارب تكون الاخيرة- بس كانت أغرب وقعة


حبيت اشارككم فيها، مش عارف الواقعة دي بالذات كانت عجيبة وحسيت انها أثرت فيا نفسيا أكتر من ضلوعي اللي بتوجعني لغاية دلوقتي.. وربنا يسلم طريقكم جميعاً ويكفيكم شر الطرق ،، ودي برده نصيحة لإخواني الركيبة ..


قبل الحادثة:

كنت الواد الجن ركيب التوين

اللي يفوت يموت

ويا تهدي يا تعدي

وكام شعار كده من اللي بيتكتبوا على الميكروباصات


قبل الحادثة بثانيتين:

ايه ده؟؟ الملف ده طلع أجمد مما كنت فاكر!!

دا أنا كده لو فرملت هاتكعور... ولو حودت جامد هاتشقلط... ولو هديت جامد مش هالحق وهاخبط في الرصيف...

ممممممم شكلها كده واقعة... طب هدي على الآخر علشان انتا كده كده هاتلبس في الرصيف فحاول تخففها على الآخر..

السرعة بتنزل تقريباً من 90-100 لغاية مثلا قول 45-50

ميل المكنة على الاخر علشان الوقعة ما تكونش جامدة،، ويارب اللي ورايا يشوفني علشان ما يدوسنيش وانا على كوبري 6 اكتوبر.. الحمد لله الكوبري فاضي وانا سابق بكتير...


الحادثة:

تغميض العنين حاجة تلقائية جداً

طيران في الهوا

كام خبطة كده في الرجل والصدر والإيد على كعورة ثم زحف على الظهر كام متر كده مش عارف قد ايه

المكنة على بعد 10-15 متر

بعد الحادثة:

تفتيح العنين: الحمد لله بشوف والراس سليمة بتلف يمين وشمال،، برده الخوذة مهمة يا رجالة

تحريك الصوابع والايدين: الحمد لله بيشتغلوا

تحريك الرجلين: الحمد لله بيتحركوا


بعد الحادثة:

مصر لسه بخير... وزيادة .. ولاد الحلال اتجمعوا من كل حدب وصوب علشان يساعدوني

الحمد لله انها جت سليمة

الحمد لله هشوف عيالي تاني :)


بعد الحادثة بشويتين تلاتة:

يعني كنت لازم أجري بسرعة؟

يعني ماكنتش أقدر أفرمل أجمد شوية؟

يعني ماكنتش تقدر تحود زيادة شوية؟

بطل بأه::: دا كله بقدر الله .. ولو كنت عملت قرد كنت برده هاتخبط هاتخبط لان مفيش حاجة كده اعتباطاً .. كل بتقدير المولى سبحانه، بس على الله تتعلم


الدروس والعبر:

1.ذكر الله قبل الركوب وأثناء الطريق وياريت تكون متوضي ومصلي كمان.. وحابب على راس أمك وأبوك كمان :)

2.عدم الاغترار لا بنفسك ومهارتك ولا بالسنين اللي سقت فيها ولا بالمكنة اللي راكبها (ركيبة كتير اوي ماتوا على الموتوسيكلات، وسبيحة كتير أوي غرقوا في شبر مية)

3.أخذ الأسباب في الحماية وأقلها (خوذة، جوانتي، جاكيت جلد) صيفاً وشتاءً

4.ما تسخنش لو حد سخنك (وانا عارف ان البوتجازات كتييير أوي)

5.خليك فاكر دايماً إن الغلطة على الموتوسيكل بفورة وكله بقدر الله

وأخيراً:

ربنا يسلم طريقنا جميعاً ويحفظنا من كل سوء... آمين