"سالك" ... النظام الإلكتروني للتعريفة المرورية في دبي. ( و هو مينفعش قي مصر يعني ؟ )

السلام عليكم ...

فكرة كانت جت في دماغي و بتهيألى هى موجودة في مصر بس في نطاق محدود جداً..
مشكلة مصر في الطرق و الزحمة .. إلخ

طب لماذا لا تقوم إحدى شركات القطاع الخاص (مثل سالك في دبي ) بعمل إستثمارات و تمسك الموضوع دا ؟

مش كل ما حد يتكلم عن الجمارك يقول لو اتلغت هتعمل زحمة اكتر عشان مفيش طرق و كلام من دا ..؟
طب ما الحل موجود و يكون بالتنسيق مع القطاع الخاص و الحكومة ... القطاع الخاص يحصل الفلوس دي من الطرق الرئيسية (و في نفس الوقت يقلل من الزحام في هذه المناطق ) و في نفس الوقت يقوم بتحسين الطرق ...

و كله لمصلحة الجميع win-win يعني ..


مزيد من المعلومات عن سالك في دبي:

اقتباس:

---

باستخدام أحدث التقنيات الخاصّة بالتعرفة المرورية، لتحقيق انسيابية الحركة المرورية بدون أي نقاط وقوف لدفع التعرفة، وبدون أي تأثير على حركة السير وعلى السرعة المحددة في الطرق. ففي كلّ مرة تعبر بسيارتك إحدى مناطق التعرفة، سيتمّ استقطاع الرسم المحدد والبالغ 4 دراهم بصورة تلقائية من حسابك المدفوع مسبقاً والخاص بالتعرفة المرورية، وذلك باستخدام أحدث التقنيات في تحديد موجات الراديو (RFID).

---

http://www.salik.ae/Default.aspx


يا ريت رأيكم يا شباب ...

يعنى علشان حضرتك تروح الشغل تدفع مثلا 10 جنيه رايح جاى علشان تمشى فى طريق فاضى شويه

ده بالاضافه للبنزين الغالى والمخالفات الوهميه والانتظار المبالغ فى اسعاره

وانت راكب عربيه الحكومه واخده تمنها منك مرتين

وشوارع ما يعلم بيها الا ربنا

طب ندفع فلوس تانى ليه

ايه الخدمه اللى هيقدموهالنا

هيا البلد لسة فيها اماكن تنفع تبقى طرق ؟؟؟

الموضوع صعب حبتين في القاهره

عشان وقت الزحمه ما فيش طريق بيكون فاضي والتاني مش فاضي، كله بيبقى زحمه رهيبه.

في دبي اللي مش عاوز يدفع بيمشي في طرق تانيه أزحم بس بتكون ماشيه برضه، لكن هنا في مصر الموضوع ده لو إتعمل ما أعتقدش هايعد أكتر من أسبوعين بالكتير وبعد كده هاتقوم ثوره إسمها ثورة المخنوقين زي ثورة الجياع كده بس اللي هايعملها هم الناس اللي إتخنقوا من الزحام الرهيب اللي في الشوارع اللي ببلاش.

اصبر على رزقك، هتتنفذ هتتنفذ

بس على الطريقة المصرية

ادفع ثم اشتكى.

شكرا للتفاعل..

الفكرة اللي في دماغي هي ان على الحكومة إلغاء الجمارك... لتكون مثلا مثلا سعر العربية ذات ال100 الف ج .. حوالي 60 الف ...

طبعا ناس هتقول كدا الشوارع هتكون زحمة جدا ..

هنا تأتي الفكرة ... ( محدش يفهمني غلط انا مش اناني )
ان لما شركة خاصة تهتم بالطرق و "تظبطها" يعني من الفلوس اللي هتحصلها .. كدا ممكن انك بتدفع زي ضريبة برضه على إمتلاك سيارة و لكن ليس بحجم الجمارك و في نفس الوقت الشركة الخاصة مستفيدة... المواطن مستفيد لأن الطرق هتتصلح و هيتصرف عليها... و تم في نفس الوقت الحفاظ على معدل السيارات فى البلد ... لأن قرار شراء سيارة هيكون داخل فيه مصاريف الطرق دي ..

الفكرة طبعا صعبة التنفيذ و بالذات فى القاهرة ... لكن اعتقد انها ظريفة و مش وحشة لو تم تطبيقها صح و في الطرق السريعة فقط مثلاً...

يا ريت تكون وجهة نظري وصلت :)

اقتباس:

---

المشاركة الأصلية كتبت بواسطة SuccessCre8or

شكرا للتفاعل..

الفكرة اللي في دماغي هي ان على الحكومة إلغاء الجمارك... لتكون مثلا مثلا سعر العربية ذات ال100 الف ج .. حوالي 60 الف ...

طبعا ناس هتقول كدا الشوارع هتكون زحمة جدا ..

هنا تأتي الفكرة ... ( محدش يفهمني غلط انا مش اناني )
ان لما شركة خاصة تهتم بالطرق و "تظبطها" يعني من الفلوس اللي هتحصلها .. كدا ممكن انك بتدفع زي ضريبة برضه على إمتلاك سيارة و لكن ليس بحجم الجمارك و في نفس الوقت الشركة الخاصة مستفيدة... المواطن مستفيد لأن الطرق هتتصلح و هيتصرف عليها... و تم في نفس الوقت الحفاظ على معدل السيارات فى البلد ... لأن قرار شراء سيارة هيكون داخل فيه مصاريف الطرق دي ..

الفكرة طبعا صعبة التنفيذ و بالذات فى القاهرة ... لكن اعتقد انها ظريفة و مش وحشة لو تم تطبيقها صح و في الطرق السريعة فقط مثلاً...

يا ريت تكون وجهة نظري وصلت :)

---

علشان ده يحصل

لازم البلد كلها تتغير

يعنى يعملوا مناقصه لشركه بشروط الجوده والسعر وتكون مناقصه علنيه مفيهاش لعب

يكون فيه رقابه

طبعا فى مصر

اللى هياخد الشركه دى يا اما هيكون واصل او راشى

والناس اللى المفروض هى الرقابه عليه ربنا هيكرمهم وهيبقى عندهم شاليهات فى الساحل الشمالى

والناس هتدفع غصب عنها علشان الزحمه لان باقى الطرق هتتقفل نهائى

فى الاخر هنوصل اننا فتحنا باب جديد للسرقه والجبايه وطبعا ده من جيب المواطن الغلبان

وهيبقى اسمه سالك ومخروم ومنهوب كمان (جيب المواطن الغلبان)

اقتباس:

---

وهيبقى اسمه سالك ومخروم ومنهوب كمان (جيب المواطن الغلبان)

---

فعلاً... للأسف :(

اقتباس:

---

المشاركة الأصلية كتبت بواسطة SuccessCre8or

فعلاً... للأسف :(

---

خلاص يبقى نقفل على الموضوع ده:dontudear:

قبل ما الحكومه تاخد بالها منه

انت عارف اليومين دول

العمليه ناشفه قوى معاهم وما بيصدقوا :10D5C8~1107:

ممكن يسمعوا كلامك وينفذوه

ويدوك جايزه كبيره

يعملوه بيعدى من قدام بيتكم وكل ما تيجى تروح تدفع 10 جنيه محبه فى البلد:44:

طالما في جائزة ليا ... انا موافق :)

هاها ... و على رأي العضو حسام حسن:

اقتباس:

---

اصبر على رزقك، هتتنفذ هتتنفذ

بس على الطريقة المصرية

ادفع ثم اشتكى.

---

اقتباس:

---

المشاركة الأصلية كتبت بواسطة SuccessCre8or

الفكرة طبعا صعبة التنفيذ و بالذات فى القاهرة ... لكن اعتقد انها ظريفة و مش وحشة لو تم تطبيقها صح و في الطرق السريعة فقط مثلاً...

يا ريت تكون وجهة نظري وصلت :)

---

كده ممكن، ويا حبذا لو كان في الطرق النائيه اللي الحكومه مش مهتمه بيها.

بس المشكله بقى في موضوع الإستيكر بتاع الـ RFID

اقتباس:

---

المشاركة الأصلية كتبت بواسطة marsguy

كده ممكن، ويا حبذا لو كان في الطرق النائيه اللي الحكومه مش مهتمه بيها.

بس المشكله بقى في موضوع الإستيكر بتاع الـ RFID

---

ده استيكر صغير شبه شريحه الموبايل

بيبقى ملزوق تحت زجاج السياره

لما بتعدى من تحت الكاميرات بتلقطه وتخصم الفلوس من رصيده

وتبعت لك رساله على رقم الموبايل بتاعك

اقتباس:

---

المشاركة الأصلية كتبت بواسطة Hossam_Hassan

اصبر على رزقك، هتتنفذ هتتنفذ

بس على الطريقة المصرية

ادفع ثم اشتكى.

---

نفس الكلام اللي كنت بفكر فيه
مستعجلين على إيه يا جماعة
المية بفلوس والكهربا بفلوس
الهوا لسة ببلاش
لكن الشوارع هتبقى بفلوس

ولو حد فاكر خطة إستعرضها مجلس الوزراء لعمل محاور في القاهرة العبور بها بدفع أموال
عايز تعدي من الزحمة إدفع
وكان أول مقترح هو كوبري 6 أكتوبر
عايز تطلع الكوبري إدفع
لو مش عايز خليك واقف تحت

مستعجلين على إيه

الفكر في الخارج هو السيولة المرورية

لكن الفكر في مصر هو : لا صوت يعلوا على صوت الجباية

شكرا للتفاعل ...

و يا ريت لو في آراء و مقترحات تانية

أصلاٌ حتى لو فرضنا إن النظام ده إطبق ممكن تلاقي نفسك بتدفع رسوم مرور في شوارع السالوم و إنت يا عيني ما خرجتش من وسط البلد في القاهرة قبل كده .... و إبقى سلملي على الشفافية و مصداقية الستيكر اللي هيتلزق على زجاج السيارة ...


يا جماعة دي مش نظرة تشائمية و لكن ده حال البلد .. مفيش حاجة فيها ماشية صح!!!

طيب ما احنا بندفع حاجات المفروض بتصب في خانة إنشاء و صيانة الطرق:
1- رسوم البوابات
2- رسوم انتظار في الجراجات و المواقف الحكومية
3- ضرائب (تراخيص، مش عارف المحروقات عليها ولا لأ)
4- مخالفات
5- جمارك

اقتباس:

---

المشاركة الأصلية كتبت بواسطة SuccessCre8or

شكرا للتفاعل ...

و يا ريت لو في آراء و مقترحات تانية

---

رأيي كفاية أعباء على الحكومة و على القطاع الخاص، يعني انت عايز تكلفهم RFID لكل عربية و نظام ربط و نبلغ المشتركين و كده مصاريف على الفاضي. مع أنك هتدفع أضعاف التكلفة لو اتعملت فعلاً
ماله العسكري؟ ماهو كده كده واقف، نطبع له دفتر و يكتب أرقام العربيات اللي هتعدي (واخد بالك) و لما الدفتر يخلص يبعت للشركة و يملأ الدفتر التاني، لو مالقاش دفاتر مطبوعة عندهم يبقى جاله الفرج، يروح بيتهم في أي ميكروباص معدي (إتاوة) ما هو مهمته انتهت.
طيب فكرك الدفتر سيتم تفريغ بياناته؟ لأ طبعا القاعدة بتقول أننا نقدر لكل فئة من العربيات مبلغ ثابت يتم خصمه بانتظام حتى لو عربيتك مرفوعة في جراج. و النظام ده بيسمح للمشترك و غير المشترك بالمرور في نفس الطرق
ده نظامنا و احنا مش بنقبل إملاءات خارجية :44:

اقتباس:

---

المشاركة الأصلية كتبت بواسطة ahmed1981

وكان أول مقترح هو كوبري 6 أكتوبر
عايز تطلع الكوبري إدفع
لو مش عايز خليك واقف تحت

---

مش عارف ليه تخيلت المنظر بعد تطبيق هذه الفكرة كأن اللي هيطلع على الكوبري رايح يركب دور عربيات أو ساقية أو قطار في الملاهي بالضبط

واخد بالي طبعا اخي العزيز ابو حسني ... :)

ربنا يهدي البلد دي ... و نورت الموضوع

عربيتي كانت جاية من دبي وفيها الملصق بتاع سالك
من حلاوته مرضتش اشيله...و دي صورته للي عايز يعرف ... هو الشريحة الصفراء في منتصف الزجاج

http://www3.0zz0.com/2008/12/08/17/833294396.jpg

اقتباس:

---

المشاركة الأصلية كتبت بواسطة mshamy

عربيتي كانت جاية من دبي وفيها الملصق بتاع سالك
من حلاوته مرضتش اشيله...و دي صورته للي عايز يعرف ... هو الشريحة الصفراء في منتصف الزجاج

http://www3.0zz0.com/2008/12/08/17/833294396.jpg

---

هى بغباوتها بوشها العكر


كان ليا معاها موقف

كان نفسى اكسر الازاز واخلعها

لية بس يا مان ؟ وش عكر اية بس ؟

اي حاجة من دبي اكيد حلوة ... :d

كان موقف حصلى وانا فى الامارات

كنا يوم خميس وكانت عربيه مديرالمجموعه معايا انا والمدير بتاعى

علشان كان فى اجازه اسبوع فى سوريا

كانت عربيه جيمس حاجه كده من اللى كنت هموت واتصور جنبها

المهم المفروض اننا كنا نركن العربيه عند الشركه

طبعا انا ما صدقت وقولت هروح بيها واجيبها يوم السبت

قالوا لى ماشى

خدت العربيه وطلعت على دبى انا واتنين اصحابى

ونعدى على بوابات سالك

حاجه ببلاش كده

وبعدين الساعه 2 بالليل لقيت مديرى بيتصل بيا بيقولى انت بتعمل ايه فى دبى

طلعت كل ما اعدى على بوابه يبعتوا رساله على موبايل مدير المجموعه فى سوريا


وانا طبعا ولا اعرف

وكان النظام لسه جديد

وطبعا اتكشفت اللعبه واتخصم من مرتبى 200 درهم حق البترول

واخدت كلمتين محترمين

بس كنت فى نص هدومى وقعد ماسكها لى

وكل ما يشوفنى يقولى انت شايف شغلك ولا بتفكر فى حريم دبى

وطبعا كانت فضيحه والشركه كلها عرفت

ومحدش بقى يدينى عربيته

شفت بقى أن النظام ما ينفعش. مش لمصر و بس، لأ ده ما ينفعش للمصريين أصلاً :C_laugh[1]:

معنى كدا ان نظام "سالك" بيستخدم لتحديد اماكن العربيات في دبي او تعقبها يعنى ؟؟

اقتباس:

---

المشاركة الأصلية كتبت بواسطة SuccessCre8or

معنى كدا ان نظام "سالك" بيستخدم لتحديد اماكن العربيات في دبي او تعقبها يعنى ؟؟

---

لاء مش لتحديد مكانها

ده حاجه زى الكاميرا كده بتبقى راكبه عند البوابات الالكترونيه

كل ما عربيه تعدى الكاميرات دى بتتعرف على الشريحه وصلاحيتها

ونفس فكره الموبايل بتخصم من رصيدك

اللى مكنتش اعرفه انها بتبعت رساله على موبايلك تعرفك الرصيد الباقى

كان الكلام ده اول ما طبقوا النظام ده فى شهر 7 سنه 2007

بس كانت فضيحه

وقعدنا طول الليل نقول ازاى عرفوا انى فى دبى بعربيه الشركه

انا كنت فى مدينه العين فكنا بنسمع بس عن النظام ده وكانت اول مره نجربه

اجيال ورا اجيال هتعيش علي حلمنا