موضوع فعلا أصبح ظاهر.....هل ترضى بهذا المنظر ..طيب تعمل أيه لو شفته بعينك ...؟؟

السلام عليكم ...

أولا : لابد من الاعتراف بالمشكلة ..علشان تتحل ... و معرفة أطراف المشكلة ..... دي مقدمه فقط

الموضوع بقى .... و طبعا الموضوع مش بعيد عن مجال السيارات علشان بس الادارة ما تعترضش على الموضوع

الظاهرة الى انا بتكلم عليها و أكيد كل الناس هنا على الأقل شافها مرة على الأقل ......و هى :

تلاقى شاب سايق العربية و على الكنبة الي ورا ولد و بنت شغاليين ( بوس و كدة و الازى منه ) و الموضوع ده انا شفته أكتر من مرة .....طيب يا جماعة و بعدين .....طبعا انا لو اتكلمت من منطلق الدين الناس هتنفر ... و طبعا مش عارف ليه لما الناس تسمع حلال و حرام يبعد فورا ....!!!! الله و أعلم ليه ...؟؟؟

المهم ....هتكلم من منطلق الرجولة ..... و طبعا الكلمة الشهيرة في مصر ( ترضى الكلام دا لأختك أو حد من أهلك ) ....و عايز الناس ترد على السؤال ده الأول قبل ما نخوض في الرد ......و الله لو كان الرد نعم .....فأنت خارج نطاق الحوار أصلا .....لأسباب - يأتى ذكرها حين الاحتياج ليها -

و لو كانت الأجابة لأ طبعا مرضاش بالكلام ده لحد من أهلى ....طيب ليه ممكن تعمل كده أو تعرف ان حد من أصحابك بيعمل كده و ماتنصحوش ...بالعكس أنا ممكن اقطع علاقتى بيه نهائيا و الكلام ده فعلا يكون جدى منك جدا مش مجرد تهديد .......لعلة ينتبه لخطأه ( ودا علاج جامد جدا ..)

انا بفكر الناس ان لابد الاعتراف بالخطا ............علشان يأتى العلاج ...زي المريض لازم يقتنع بالمرض الأول علشان يبقل العلاج ...صح و لا أيه ؟؟

طيب دلوقتى لو انت بتعمل كدة أو تعرف حد بيعمل كده ممكن تقلنا أيه المبرر القوى ألي يخليه يعمل حاجة زي كده ......

و برضو ياريت الناس تأكد معايا المعلومة دى ..الناس الى بيعملوا كده في عربياتهم و الله ربنا ديما بيبتليهم بالحوادث و الكوارث في عربياتهم ( و طبعا الكلام ده مش قاعدة ....علشان ممكن بعض الناس تقول... يا عم أنا أعرف ناس بتعمل عمايل ..كذا و كذا ... و عربياتهم زي الفل ) ..يعنى من وجهة نظري على الأقل .....

المهم علشان الموضوع فعلا كبير جدا ..و انا فعلا حزين جدا لما بشوف كده ..و والله العظيم لما بشوف منظر زي كده أكد أبكى من الحزن ......:K14:

أخيرا بقى .....لو شفت موقف زي كده هتعمل أيه .....

و تجربتى الشخصية مع موقف زي كدة .....

أنا ساكن في الهرم ...و انا راجع من مشوار لقيت شاب بعربية شاهين حمرا و قاعد ورا في الكنبة ولد و بنت و شغاليين بوس ....و أنا خدت بالى تقريبا من نصف شارع الهرم ...ومقدرتش اكمل كل شوية الاقى العربية جنبى ......و طبعا ماقدرتش اكتم غيظى :_Alshmokh08[1]:منهم رحت جاي جنب العربية و قلتلهم يا جماعة عيب كده ماينفعش الكلام ده .....راح الشاب الي سايق ( الى احنا بنسميه معذرة يعنى أريال :B4_611:... انا اسف جدا بس هو ده التعريف الدارج عند المصريين ) راح شتمنى ...شتمنى أنا الى بقوله عيب كده:devil2: ....و حسسنى انى انا الى غلطان .....و البنت الي ورا طبعا حسيت انها انتبهت جدا و اتفاجئت من كلامى .... و طبعا الشباب الى حواليا عمالين يبصولى كأنى مجنون ....... دا الموقف بتاعى .......

و طبعا زي ما قلتلكم الموضوع كبير فا ياريت الناس تتكلم بصراحة علشان نحل الموضوع ده ....... و خلى بالك دى من الحاجات الي بتترد فيك في الدنيا عاجلا أم اجلا ....زي العقوق بالظبط ..و أكيد الناس فاهمة الكلام ده كويس ........

و تحياتى .....

انت راجل في زمن عز فيه الرجال.انا لو مكانك والولد شتمني ها قفل عليه وانزله وادور فيه الطحن هو اللي معاه .
bemo,ire

هههههههههههههههه
ربنا يهدي
البلد دي طول ماانت محترم ماينفعش تعيش فيها
الذنوب بتكتر والوحش بيجر معاه المحترم
حاجه تحزن والله

حسبى الله ونعم والوكيل
أنا حصلى تقريبا نفس الموقف كنت بعدى من شارع الهرم عند محطة الاريزونا وأفاجأ بعربية Bmwكانت هاتخبطنى تخيل حضرتك الى سايق كان معه وحدة قعدة بجانبة وكانوا بيبوس بعض والبية صاحب العربية كان سايب السواقة وطريق مركز معها بصراحة أنا مكنتش مصدق الى أنا بشوفة لولا ستر ربنا لحقت نفس على أخر لحظة

حسبى الله ونعم الوكيل ... مش عارف العيب منين .. بس مبقاش فى حد بيخاف من حاجه .. ولا بيعمل أعتبار لحد ..وكل واحد يقولك هو انا الى هصلح الكون .. و شباب ماشى بأفلام خليعه على موبايله .. و المخدرات عادى أصل انا متعاطى مش مدمن (ربنا يحميك لماما ) .. المعاكسه دى روشنه .. الخناقات وسب دينى ربنا ليل ونهار دى مرجله .. و و و
هنقول ايه ولا ايه ...... يلا خليها تولع .

ربنا يطلعنا منها على خيـــــــر:fdsa:

ما هما مرمين فى كل مكان ...
هتلاحق على العربيات ولا المقطم ولا السينمات ولا ولا ولا ولا !!
حسبي الله ونعم الوكيل ..

زى أنا مرة ماشى فى شارع جمب بيتى وماشى قدامى بنت فا بعدين مفيش شوية ولاقيتها قابلت حبيب القلبو ويقوم بايسها فى الشارع قدام الناس كدة عادى جدا وبوسة بكل حرارة (إنا لله وإنا إليه راجعون)
والله يا جماعة الواحد بيحزن جداا لما يشوف موقف زى دا
الناس عندها نقص اصلا والبعد عن الدين هو الى مخلى الناس كدة
لاكن لو كلنا نقرب من ربنا سبحانة وتعالى حالنا كله هينصلح

لا تعليق غير ... "كدا اللي انا بشوفه فى الشارع من التفاهات دي يعتبر لا شئ"

لو انا مكانك هيحصلى زى ما حصلك لان دلوقتى مفيش حاجه اسمها خشا بقا فى فجور بين الشباب
وربنا يحفظنا ويحفظ اولادنا

والله العيب مش علي حد غير بهوات المرور اللى سايببن العالم الواطية دول يعملوا كدة فى العربيات ومركزين مع واحد مركب زينون او غيرة من تفاهات المرور
المشكلة فى البلد دية هية الروتين والتنفيض
الروتين / ان رجل المرور اوالشرطة بينفذ تعليمات اتملت علية وبينفذها بحذفيرها ولو مثلا شاف حاجة زى كدة فى عربية ممكن ميعملش حاجة لانة نازل علشان يلم فلوس وينفذ اوامر روتينية صادرة من واحد قعد فى مكتب بعيد كل البعد عن الشارع واحداثة :::::

خلينا ساكتين

انا لو كتبت رأيى بصراحه

اكيد مش هقدر اكتب تانى

كل اللى نقوله حسبنا الله ونعم الوكيل فى المتسببين فى هذا

اللهم انتقم منهم
دا حتى المفروض إذا بليتم فاستتروا
وربنا بيستر علي العاصي والفاسق ومبيفضحهمش لكن البعض بيجاهر بالذنب والله أعلم دول هايكون حسابهم إزاي وإنا لله وإنا إليه راجعون

السعودية اللى مش عاجبانا عندها هيئة الامر بالمعروف والناس عارفة كدة ومبتعملش اى عمل غير اخلاقى فى الشوارع والا حيكون مصيرها صعب "
تخيل لو الهيئة دى موجودة فى مصر مش حتلاحق """
حيطيروها تانى يوم ويقولك الحرية الشخصية والكلام الفاضى اللى جابنا ورا""

حاليا مالين الشوارع مش العربيات بس انا برضة مبعرفش اسكت والغريب فى الزمن دة ربنا يرحمنا ان لما احتك بيهم بحكم سكنى بجانب الكورنيش مكان الاحبة عشان يلوثوة ويخربوه علينا بلاقى البنت ولا همامها كلام من الى بيحصل وعادى جداا بتبصلك بكل تحدى :44:
ربنا يهدى الجميع

**************************
برجاء مراعاه شعور الاخرين
مشرف فرعي 1

انا بس عايز اسأل صاحب الموضوع ..
هو إنت عينت نفسك مسئول عن حماية الوطن وسلامة أراضيه ؟؟
ماللى عايز يعمل اى حاجة فى عربيته مايعملها .. إنت ايه اللى مضايقك يعنى انا مش فاهم ؟
هو حضرتك اللى هتحاسبه مثلاً ...
هو المصريين ميبقوش مصريين غير لما يتدخلوا فى كل خصوصيات الناس اللى معاهم ويعدوا يوعظوا فيهم وكل واحد يعمل فيها فضيله المفتى ؟؟
بالنسبة للى بيقول ترضى على أختك او قريبتك كده .. أحب اقوله لو كان عامل حساب لحاجة زى كده مكنش عملها .. وكفاية ضحك على نفسنا بأه ..
دايماً الاخلاق عندكوا مرهونة بالجنس .. مفيش حاجة غير الجنس هى اللى بتدل على الاخلاق بالنسبالكوا ؟؟
يعنى لما حضرتك تشوف خناقة فى الشارع وناس نازلين تقطيع فى بعض والدم للركب تعد تتفرج وتستمتع اوى بمنظر الناس وتستنى لحد مالخناقة تخلص .. ولما تشوف واحد بيبوس واحدة خلاص كأنه طعنك بسيف ؟؟؟؟؟؟؟؟؟؟؟؟؟؟!!!!!!
الزميل الفاضل اللى بيقول آدى آخرة الحرية اللى جابتنا ورا ..
هى فين الحرية اللى بتتكلم عليها دى اصلاً ؟؟ إنت جبت الحرية اللى فى مصر دى منين ...؟؟؟
دى لو الحرية اتوجدت فى العالم كله مش هتتوجد فى مصر .. لأن كل واحد مصرى مفكر نفسه إنه واصى على البشرية ..
ثم .. من إمتى أصلاً وانت أدام عشان الحرية تجيبك ورا ؟؟؟؟؟؟؟؟ هاه ؟؟

مصر .. للخلف در :)

السلام عليكم ورحمة الله وبركاته
والله الواحد مش عارف بقول ايه فى الموضوع ده
بس المشكله ان الموضوع ده انتشر بطريقه غير عاديه
لدرجة ان الواحد لو هيتدخل ويكلم كل واحد منهم فى الطريق
يبقى مش هيروح بقى من كتر المواعظ والخناقات
انا اتذكر موقف مش هتصدقوه من كتر الفجر
العام الماضى وبالتحديد فى شهر رمضان وقت العصريه وكنت مروح انا وزميل لى فى العمل وفى اشاره فى المعادى وقفنا واذا بالسياره اللى امامنا لاقينا فيها المنظر الخليع ده وكانو مش لبسين هدوم تقريبا اتنين على الكنبه اللى ورا ولد وبنت وطبعا ماكناش مصدقين اللى احنا شايفينه وخصوصا اننا صايمين والمفاجئه لما قربنا منهم من جمب العربيه عرفنا انهم ظباط فى الجيش من اللبس اللى متعلق ولبس اللى سايق
والمصيبه ان امين الشرطه كان واقف على الاشاره ومركز عليهم ومكلمهمش لحد ماالاشاره فتحت ومشينا وفضلنا نستغفر ربنا
حتى فى رمضان وفى الصيام
حسبنا الله ونعم الوكيل
بس على فكره
قانون المرور الجديد فى بند بيمنع اى فعل فاضح داخل السياره
فيها غرامه وحبس بس ياريت يمسكوهم

أولا لا يوجد تعارض مع الحريه او الديموقراطيه
مع الدين و الاخلاق والادب
احنا بلد ليها قوانينها و معتقداتها و عادتها و تقاليدها
اللى بيبوس فى العربيه دا ممكن يبوس و يعمل اللى اكتر من كدا فى شقته
بس مادام هو رضى كدا على نفسه يبقى يعمله بعيد عنا فى بيته او شقته مش فى الطريق العام
اللى بيهاجم الموضوع بسأله ترضى ابنك او ختك البنت تشوف منظر زى كدا فى الشارع
دلوقتى اللى بيقول نسبهم براحتهم لما نحل كل مشاكلنا نبقى نحل المشكله دى شويه كمان و هيبقى البوس دا العادى و الحاجات التانيه ببتعمل و بنقول عليها برده عادى
دا فى حديث لرسول الله (صلى الله عليه وسلم) فى ما معناه
ان فى زمن ياتى يكون فيه الفاحشه منتشره حتى ان هيبقى اتنين بيزنوا فيقول لهما الرجل الصالح او المتدين تواريا جانبا
انا شايف اننا بقينا اسؤ من كدا لان مفيش حد بيقول تواريا جانبا
ربنا يرحمنا فى الزمن اللى احنا فيه دا

من رأي منكم منكرا فليغيره بيده وان لم يستطع فليغيره بلسانة وان لم يستطع فبقلبه وهذا أضعف الايمان

اقتباس:

---

المشاركة الأصلية كتبت بواسطة blazer

دا فى حديث لرسول الله (صلى الله عليه وسلم) فى ما معناه
ان فى زمن ياتى يكون فيه الفاحشه منتشره حتى ان هيبقى اتنين بيزنوا فيقول لهما الرجل الصالح او المتدين تواريا جانبا
انا شايف اننا بقينا اسؤ من كدا لان مفيش حد بيقول تواريا جانبا
ربنا يرحمنا فى الزمن اللى احنا فيه دا

---

علامات القيامة
ربنا يحفظنا من الفتن

:Ob_mak1[1]:

اقتباس:

---

المشاركة الأصلية كتبت بواسطة deee

انا بس عايز اسأل صاحب الموضوع ..
هو إنت عينت نفسك مسئول عن حماية الوطن وسلامة أراضيه ؟؟
ماللى عايز يعمل اى حاجة فى عربيته مايعملها .. إنت ايه اللى مضايقك يعنى انا مش فاهم ؟
هو حضرتك اللى هتحاسبه مثلاً ...
هو المصريين ميبقوش مصريين غير لما يتدخلوا فى كل خصوصيات الناس اللى معاهم ويعدوا يوعظوا فيهم وكل واحد يعمل فيها فضيله المفتى ؟؟
بالنسبة للى بيقول ترضى على أختك او قريبتك كده .. أحب اقوله لو كان عامل حساب لحاجة زى كده مكنش عملها .. وكفاية ضحك على نفسنا بأه ..
دايماً الاخلاق عندكوا مرهونة بالجنس .. مفيش حاجة غير الجنس هى اللى بتدل على الاخلاق بالنسبالكوا ؟؟
يعنى لما حضرتك تشوف خناقة فى الشارع وناس نازلين تقطيع فى بعض والدم للركب تعد تتفرج وتستمتع اوى بمنظر الناس وتستنى لحد مالخناقة تخلص .. ولما تشوف واحد بيبوس واحدة خلاص كأنه طعنك بسيف ؟؟؟؟؟؟؟؟؟؟؟؟؟؟!!!!!!
الزميل الفاضل اللى بيقول آدى آخرة الحرية اللى جابتنا ورا ..
هى فين الحرية اللى بتتكلم عليها دى اصلاً ؟؟ إنت جبت الحرية اللى فى مصر دى منين ...؟؟؟
دى لو الحرية اتوجدت فى العالم كله مش هتتوجد فى مصر .. لأن كل واحد مصرى مفكر نفسه إنه واصى على البشرية ..
ثم .. من إمتى أصلاً وانت أدام عشان الحرية تجيبك ورا ؟؟؟؟؟؟؟؟ هاه ؟؟

مصر .. للخلف در :)

---

مع احترامى لكلام حضرتك
بس السلبية ده هى الى خلت الكلام ده ينتشر بالطريقة دى و فى كل حتة فى مصر
وربنا سبحانه وتعالى قال
كل امتى معافى الا المجاهرين
اى الذى يذنب ذنبا ويستره الله ويقول هو فعلت كذا وكذا
وعلى راى حضرتك الى عايز يعمل حاجه يعملها
يعملها يا سيدى بس لو لوحده او فى مكان مغلق مش قدام الناس
احنا برده بلد اسلاميه
وعايز اقولك كل ابن ادم خطاء
يعنى انا عارف ان احنا كلنا بنعصى ربنا
وربنا سبحانه وتعالى اهلك قرية كانت ترتكب المعاصى
فامر ملائكته بذلك فقالت له يا رب ان فيها عبدك فلان وهو ليس معهم وهو يعبدك
قال الله فبه ابدا لانه كان لا ينهاهم عن فعلهم
واخر حاجة ان فضل امه محمد صلى الله عليه وسلم باتها خير امه اخرجت للناس كان بسبب الامر بامعروف والنهى عن المنكر
قال تعالى(كنتم خير امة اخرجت للناس تأمرون بالمعروف وتنهون عن المنكر)
صدق الله العظيم

انا شوفت حاجه كده قبل كده و افتكرتها تهيات و ان بعد الظن اثم و الناس الي كانوا معايا اتكلموا عن الموضوع بس هو احنا وصلنا للدرجه دي

و الله يا جماعة الموقف ده بجد

كنت في المعمورة من سنة و كنا بالليل و جعان .. نزلت أجيب أكل .. و انا ماشي رباط الجزمة إتفك .. سندت علي عربية شيروكي راكنة عشان أربطه .. سمعت صوت .. و هتجنن الصوت "ده" جي منين في الشارع !!! أتاري فيه ولد و بنت شغالين في الشنطة .

اقتباس:

---

المشاركة الأصلية كتبت بواسطة bemocarlo

انت راجل في زمن عز فيه الرجال.انا لو مكانك والولد شتمني ها قفل عليه وانزله وادور فيه الطحن هو اللي معاه .
bemo,ire

---

10000000000000000000000+

النبي -صلى الله عليه وسلم - بعث معاذاً إلى اليمن وقال له : ( اتق دعوة المظلوم ، فإنها ليس بينها وبين الله حجاب
أحب ان أشكر المشرف على حذف ردى ,, الى ماكانش فيه أى تجريح لحد او أى كلمة خارجة و كاتبلى برجاء مراعاة شعور الآخرين... و أسأله شعور الآخرين أم مزاج حضرتك الشخصى؟؟ لأن الآخرين مفيش حد منهم اشتكى من الرد.. و على الصعيد الآخر انت فكرتنى كمان مرة ليه عندنا حكومة و رئيس بالشكل دا .. لأن الناس الى زيك من الحاذفين و القاهرين و الرافضين للرأى الآخر ما يفرقوش فى أى حاجة عن حاكم بيحبس و يمنع نشر كل ما هو مخالف لهواه ..
قال صلى الله عليه و سلم
" فكما تكونوا يول عليكم انما يولى الله تعالى الظالمين بعضهم بعضا ولو كنتم صالحين ما ولى الله عليكم ظالم"

و أدعو الله تعالى أن ترى قهراً و ظلماً و مصادرة للرأى و الحرية فى حياتك و عملك و ان يضيق الله عليك كما ضيقت على فى كل خطوة و كل كلمة...
اللهم آمين...

لما ابقى الاقى حل لمشكلة تعرضى يوميا للموت وانا راجع على الطريق الدائرى بسبب العيال اللى راكبة عربيات مدفعتش فيها حاجة وفاكرة ان الطريق هو ساحة للفورميلا وان وعندهم استعداد انهم يقتلوا اى حد او يرموه بسيارتة برة الطريق فى سبيل ارضاء جنونهم ابقى افكر فى التدخل فى شئون الناس اللى بتغلط جوه عربياتها

ده غلط وده غلط، لكن اللى بيغلط فيما يخصه دون ما يؤذى حد تانى ده حسابه عند ربنا وانا مش وصى عليه،

هو عارف الصح والغلط، لكن اللى غلطاته واستهتاره بيعرضونى للموت يوميا هو ده اللى محتاجة لجنة للوصاية عليه

المقصد ليس المثال فى حد ذاتة لكن فكرة ان فيه بلاوى كتير الناس بتعملها بشكل يومى وبضمير مرتاح اثرها بيمتد ليؤذى غيرها، ودى برضه ضد الدين وضد الاخلاق وضد كل حاجة، فالمسلم من سلم الناس من لسانه ويده، دى اللى انا شايف انها اولى بالاهتمام والعلاج من فرض الوصاية على تصرفات الأخرين اللى عارفين كويس حجم غلطهم ومش بيؤذوا بيه غير نفسهم

الإخوة الفضلاء اللي بيعارضوا صاحب الموضوع على طرحه

بحجة إن دي حاجة شخصية أو هو حر

حريته تكون في بيته

ليه أمي أو أختي أو زوجتي أو بنتي تشوف الباشا وهو بيمارس حريته في الشارع

ليه أسيب واحدة غلبانه يضحك عليها حتة عيل بحجة الحب وبعد كده يرميها زي الكلاب وبعد كده تولع في نفسها

ليه أسيب واحد زي ده يشجع على نشر الفساد في المجتمع

ليه لما الواحد يجي يتكلم في حاجة نقوله أنت بتكلم في دي والناس بتموت على الدائري والفساد منتشر في البلد هي علاقة دي بدي
هو أنت لما بتيجي تقول نكته حد بيقول لك انت بتقول نكته وسايب الناس بتموت

ليه سايبين أحاديث النبي صلى الله عليه وسلم

عن حذيفة عن النبي صلى الله عليه وسلم قال { والذي نفسي بيده لتأمرن بالمعروف ولتنهون عن المنكر أو ليوشكن الله عز وجل أن يبعث عليكم عذابا من عنده ثم تدعونه فلا يستجاب لكم } رواه الترمذي وحسنه . ومعنى أوشك أسرع .

وعن جرير رضي الله عنه مرفوعا { ما من قوم يكون بين أظهرهم من يعمل بالمعاصي هم أعز منه وأمنع لم يغيروا عليه إلا أصابهم الله عز وجل بعذاب } رواه أحمد وغيره .

وعن أبي بكر الصديق قال { يا أيها الناس تقرءون هذه الآية { يا أيها الذين آمنوا عليكم أنفسكم لا يضركم من ضل إذا اهتديتم } . وإني سمعت رسول الله صلى الله عليه وسلم يقول : إن الناس إذا رأوا الظالم فلم يأخذوا على يديه أوشك أن يعمهم الله تعالى بعذاب منه } إسناد صحيح رواه جماعة منهم أبو داود والترمذي والنسائي .

وبعد كل ده لازم نسكت

ماهي البلد مليانه فساد واليهود بيقلوا في الفلسطينين وأمريكا في العراق
احنا بقى نقعد جنب الحيطه ونسمع الزيطه
وعلى حرقة الدم
ده أحسن حل

***********

انذار للعضو لمخالفة القاعدة رقم 12

مشرف المنتدى العام

مش عارف إيه الفائدة التي ستعود على المنتدى من مواضيع زي دي ?
يعني مفروض كل واحد يدخل يشتم في البلد شوية و يفرغ شحنة الكراهية الي موجودة عنده ?
طيب يا سيدي العيال دي وحشة و ربنا ينتقم منهم ..
و بعدين ?

اقتباس:

---

المشاركة الأصلية كتبت بواسطة ekrami

*********:36_6_3[1]:

---

لا جدع

MMamdouh

اقتباس:

---

المشاركة الأصلية كتبت بواسطة ekrami

********* :36_6_3[1]:

---

الحمد لله ان ربنا ماقبضش روحك و انت بتعمل الذنب كده

كنت هاتقابله يوم القيامه و انت على المنظر كده اتقى الله

بردو الموضوع ده حرية شخصيييييييييييييييييييية ........
اى حد بيعمل حاجة زى كده (شخصية) مش معناها انه بيقول للناس بوصوا عليا ....
طالما مش عاجبك المنظر يبأه متبصش (ولا هو عاجبك اوى ولازم تركز معاه لحد متلبس فى العربية اللى ادامك) ..
وبفرض انه عاجبك ده برده ميدكش الحق انك تبص عليه اصلاً ..
بالنسبة للواحدة الغلبانة اللى حضرتك مش هتسيبها عشان الولد اللى بيضحك عليها .. هل هى عينت حضرتك انك تكون المحامى بتاعها ؟؟
او انت الفتوة اللى بتحمى البلد من الرزيلة ؟؟؟؟؟؟
ثم إيه علاقة غلبانة او شريرة بالموضوع ده .. دى حاجة ترجعلها !!!!
والعيل اللى بيضحك عليها ده .. إنت ليه بتجزم بإنه بيضحك عليها ..
وحتى لو .. انا احشر نفسى فى حاجة زى كده لييييييييييييييه ؟!!!!!!!!
وبيتهيألى يعنى لما امى او اختى او بنتى متشوفش حاجة زى كده فى الشارع مش هتشوفها فى التليفزيون .. وبطريقة اكثر (تفصيلاً) والموقف من اوله لآخره !!!!!!!!!!!!!!!!!!!!!!!!!!!!!!!!!!!



مصرررررررررررر .. للخلف دُر . :)

مش هاتكلم عن موقف الدين لأن موقف الدين واضح وصريح ومش محتاج كلام ..
أنا هاتكلم عن فكرة الضبط الاجتماعي .. وهي مسألة وجود قيم وتقاليد متعارف عليها يقوم أفراد المجتمع جميعهم على حمايتها وتساندهم فيها أجهزة الدولة ..
الناس اللي بيقولوا حرية شخصية هم نفسهم اللي بيقولوا على جارك الهولندي اللي بلغ عنك البوليس علشان حطيت كراكيب على سطح بيتك انت .. وجه البوليس وعملك مشكلة كبيرة .. بيقولوا شوفوا التحضر شوفوا الأدمية ، شوفوا احترام الجمال وتقديس النظافة .
والناس دول نفسهم هم اللي بيقولوا على الشخص اللي بيعمل محضر لجاره علشان عنده كلب بيهوهو طول الليل عنده حق ..
هم نفسهم اللي بيقولوا إن أي حد مركب زينون بيعمي بيه الناس ولا بيعمل غرز نموذج للهمجية ولازم ينضرب في ميدان عام ....الخ

وكل دولة في العالم لها مقاييس للفعل المباح وغير المباح ، يعني لو حد قلع هدومه في الطريق بيخش السجن مش بيقولوا حرية شخصية وده في دول أوربا وأمريكا .. ولو حد مشي مع زوجته وهي كاشفة وشها في السعودية هاياخد على دماغه .. وما بين هذا وذاك ، وما بين حدود الحرية المتاحة والمقبولة تتحدد مستويات الفعل المطلوب للضبط الاجتماعي ..
الخلاصة إن كل وطن وأمة فيه حدود واضحة للضبط الاجتماعي ومعايير للسلوك المقبول وغير المقبول ..
أما نحن فلماذا نعجز أو على الأقل نختلف في هذا الأمر
الفكرة يا إخواني في الاجتزاء والتبرير لعدم القيام بأي دور في عملية الضبط الاجتماعي ..
الاجتزاء .. إنك بتركز على ظاهرة فاسدة وتترك غيرها من الظواهر ، فتركز على الأفعال الفاضحة دون أفعال الغش والإيذاء المتعمد ، والفساد ، وقلة الضمير .
والتبرير .. إنك بتقيس فعل شاذ الناس لا تقاومه بفعل شاذ تاني يبقى المفروض الناس برضه لا تقاومه .. كانت اتشطرت على الفعل الأولاني

والاتنين للأسف غلط ..
مبررات عدم القيام بدورك في الضبط الاجتماعي ممكن تكون منطقية .. لأن الولد اللي بتنصحه ممكن يكون قليل الأدب ، ممكن يكون بلطجي .. الناس مش هتساندك لأ هيتفرجوا عليك حتى لو بتموت .. الشرطة مش هتهتم بيك ولا بكلامك ولا حتى هتتحرك لو حصلك تهديد ما ، الإسعاف مش هتيجي لو اتغزيت مطواه في جنبك ..الخ

طيب .. خلونا نبص للموضوع من وجهة نظر عملية بحتة ..
*لو سكن جنبك في الشقة اللي جنبك تماماً قوادون .. وبقت شقة دعارة هتقول دي حرية شخصية ..
* طيب لو سكن جنبك جماعة إرهابية شايفهم بيدخلوا سلاح وقنابل هتسكت ..
* طيب لو شفت بعينك جريمة قتل أو اغتصاب هتسكت .
* طيب لو اتعرض عليك شقة فوق كبارية بسعر كويس هتشتري
وكتير وكتير من المواقف المماثلة ..

أنا شايف إن الحل في ظل غياب الحماية عند النصح إنك تتبع مبدأ الغلاسة الذي نتبعه أثناء القيادة ..
يعني لما بالاقي حد ماشي عكسي بحط عربيتي قدامه وأجبره إنه يعدل نفسه أو يرجع أو يمشي في نص الشارع ..
لما حد بيعميني بنوره باخليه يعدي واعلى النور في مرايته واسنتر نفسي وراه لحد ما يتعلم الأدب ..

يبقى الحل : تمشي وراهم وتنور العالي .. تغلس عليهم وتزنق علشان يفوقوا .. لو وقفت جنبهم تطلع الموبايل وتصورهم ، ما طالما دي حرية شخصية وهم مش هاممهم الفضيحة خلاص يتصوروا ويتجرسوا على اليوتيوب والفيس بوك ..
أعتقد بمثل هذه الأمور ممكن المسألة تخف شوية ونبقى عملنا اللي علينا وفق أقل الأمور خطورة ..
تقبلوا خالص مودتي

اقتباس:

---

المشاركة الأصلية كتبت بواسطة deee

بردو الموضوع ده حرية شخصيييييييييييييييييييية ........
اى حد بيعمل حاجة زى كده (شخصية) مش معناها انه بيقول للناس بوصوا عليا ....
طالما مش عاجبك المنظر يبأه متبصش (ولا هو عاجبك اوى ولازم تركز معاه لحد متلبس فى العربية اللى ادامك) ..
وبفرض انه عاجبك ده برده ميدكش الحق انك تبص عليه اصلاً ..
بالنسبة للواحدة الغلبانة اللى حضرتك مش هتسيبها عشان الولد اللى بيضحك عليها .. هل هى عينت حضرتك انك تكون المحامى بتاعها ؟؟
او انت الفتوة اللى بتحمى البلد من الرزيلة ؟؟؟؟؟؟
ثم إيه علاقة غلبانة او شريرة بالموضوع ده .. دى حاجة ترجعلها !!!!
والعيل اللى بيضحك عليها ده .. إنت ليه بتجزم بإنه بيضحك عليها ..
وحتى لو .. انا احشر نفسى فى حاجة زى كده لييييييييييييييه ؟!!!!!!!!
وبيتهيألى يعنى لما امى او اختى او بنتى متشوفش حاجة زى كده فى الشارع مش هتشوفها فى التليفزيون .. وبطريقة اكثر (تفصيلاً) والموقف من اوله لآخره !!!!!!!!!!!!!!!!!!!!!!!!!!!!!!!!!!!



مصرررررررررررر .. للخلف دُر . :)

---

اعتقد الراجل لما كتب الموضوع كان هدفة الحفاظ على الزوق العام والموضوع ملوش اى علافة خالص بلحرية الشخصية دة اسمة انحلال اخلاقى وازا لم نتكاتف جميعا لايقاف هذة الظاهرة الدخيلة على مجتمعنا سيتفشى هذا الوباء السرطانى حتى يصل الى اقرب الاقربين ليك وفى هزة الحالة سيختلف رد حضرتك بكل تأكيد
كلام حضرتك اجد فية دعوة صريحة للفجور والزنا بأسم الحرية الشخصية
ارجو ان يتسع صدرك لكلامى

اول امبارح الساعه 3 الفجر باتمشى انا وصاحبى بالعربيه فى جامعه الدول وانا من عادتى لما اسوق بالليل والدنيا فاضيه احب اتمشى كده على مهلى اخرى 40كم ولقيت عربيه بتعدينى كان اتنين شباب ادام وبنت ورا فى النص وحاضنه الكرسين وبيتكلموا المهم عينى جت فى عنيها لقتها بعتيتلى بوسه :k8: قولتلها انتى مجنونه يابت المهم اللى كان سايق ماخدش باله فماشى عادى وسبقنى الهم حصلته ووقفته قولتله ينفع كده ياعنى الحاجه اللى راكبه ورا دى سورى فى التعبير بقا (بتبصق ) قلقيت صوتها على اللى معايا قالها عيب يا ماما انتى مع رجاله ياريت ماسمعش حسك طبعا الشباب اساسا فوجئوا بالحوار راح قايل معلش ياشباب وحقوقوا عليا :khd:
صدقونى اساسا البنات اللى من النوعيه دى اساسا ماتشرفش وتفضحك فى اى حته فالبعد عنهم مكسب :satelite: والقرب منهم :36_7_4[1]:
وربنا يرحمنا

اقتباس:

---

المشاركة الأصلية كتبت بواسطة الطنطاوي

الإخوة الفضلاء اللي بيعارضوا صاحب الموضوع على طرحه

بحجة إن دي حاجة شخصية أو هو حر

حريته تكون في بيته

ليه أمي أو أختي أو زوجتي أو بنتي تشوف الباشا وهو بيمارس حريته في الشارع

ليه أسيب واحدة غلبانه يضحك عليها حتة عيل بحجة الحب وبعد كده يرميها زي الكلاب وبعد كده تولع في نفسها

ليه أسيب واحد زي ده يشجع على نشر الفساد في المجتمع

ليه لما الواحد يجي يتكلم في حاجة نقوله أنت بتكلم في دي والناس بتموت على الدائري والفساد منتشر في البلد هي علاقة دي بدي
هو أنت لما بتيجي تقول نكته حد بيقول لك انت بتقول نكته وسايب الناس بتموت

ليه سايبين أحاديث النبي صلى الله عليه وسلم

عن حذيفة عن النبي صلى الله عليه وسلم قال { والذي نفسي بيده لتأمرن بالمعروف ولتنهون عن المنكر أو ليوشكن الله عز وجل أن يبعث عليكم عذابا من عنده ثم تدعونه فلا يستجاب لكم } رواه الترمذي وحسنه . ومعنى أوشك أسرع .

وعن جرير رضي الله عنه مرفوعا { ما من قوم يكون بين أظهرهم من يعمل بالمعاصي هم أعز منه وأمنع لم يغيروا عليه إلا أصابهم الله عز وجل بعذاب } رواه أحمد وغيره .

وعن أبي بكر الصديق قال { يا أيها الناس تقرءون هذه الآية { يا أيها الذين آمنوا عليكم أنفسكم لا يضركم من ضل إذا اهتديتم } . وإني سمعت رسول الله صلى الله عليه وسلم يقول : إن الناس إذا رأوا الظالم فلم يأخذوا على يديه أوشك أن يعمهم الله تعالى بعذاب منه } إسناد صحيح رواه جماعة منهم أبو داود والترمذي والنسائي .

وبعد كل ده لازم نسكت

ماهي البلد مليانه فساد واليهود بيقلوا في الفلسطينين وأمريكا في العراق
احنا بقى نقعد جنب الحيطه ونسمع الزيطه
وعلى حرقة الدم
ده أحسن حل

---

احسن تعليق فعلا ربنا يبارك فى حضرتك ويكتر من امثالك

اقتباس:

---

المشاركة الأصلية كتبت بواسطة ekrami

********* :36_6_3[1]:

---

فعلا
انت راجل علي خلق جدا و ان شاء الله ربنا هيكرمك كرم ان الله مع الصابرين

اقتباس:

---

المشاركة الأصلية كتبت بواسطة powerofhelll

فعلا
انت راجل علي خلق جدا و ان شاء الله ربنا هيكرمك كرم ان الله مع الصابرين

---

حبس من شهر الى 3 سنوات حسب الواسطه

يا جماعة كل واحد بيعمل حاجة صح أو غلط عواقبها على دماغه... اتنين بيبوسو بعض فى العربية أنا ماليش دعوا نهائياً .. حريتهم الشخصية.. ميهمونيش فى حاجة.. أنا مش وصى على الناس ولا أحسن منهم أصلاً عشان أعين نفسى قاضى للحكم على فلان و علان.. و حتى لو كفرة برضه ماليش دعوا انما واحد راكن عربيته و فجأة راح طالع فى نص الشارع من غير اشارة ولا يحزنون يهمنى لأن غلطته تؤثر عليا و على السائقين .. حتى لو كان شيخ و بدقن.

معظم المصريين كل واحد محسسك انه قاضى يحكم على الناس و يصنفهم...
كل واحد يخليه فى نفسه و فى حياته... تانى حاجة محدش يفرض معتقاده على حد .. يعنى أنا لو مسلم مفرضش رأيى على بقيت الناس .. اسلامك يا حبيبى لا يعطيك الحق أو ينصبك حكماً على الناس...
و بعدين عندى سؤال بسيط جداً
هوا دا اللى انتو فالحين فيه ؟؟؟؟؟
البلد خربانة و الشوارع زى الزفت و لا فى خدمة صح و لا شرطة صح و لا مستشفيات محترمة فى متناول الشعب... و سايب كل دا .... تركت كل مشاكلنا و مزعلك قوىىىىىىى البنت الى بتبوس الولد.

فعلاً تفكير جامد ... و فعلاً لو العيال بطلت تبوس فى العربيات البلد دى هتتصلح....
عجبى...

حرية شخصية ايه بس يا جدعان؟؟؟؟ الكلام دة لو بيعمل كدة فى بيتة... الشارع دة مش ملك اللى جابوة عشان يعمل كدة

حد فى الناس بتوع الحرية الشخصية يرضى ان حاجة زى كدة تحصل فى الشارع و امة او اختة تشوفها؟؟؟؟؟؟؟؟؟؟؟؟؟؟؟

MMamdouh