السلام عليكم،
امبارح كنت في معرض توكيل رينو ضمن رحلة البحث عن سيارة المستمرة من أول السنة.
أنا كنت رحتلهم في مارس على ما أتذكر و كان عندهم عربيات ميجان سيدان كتير موديل 2006 بالاضافة لموديلات 2007. المرة دي مفيش غير عربيتين موديل 2007 بس. مش عارف بقى ده عشان المبيعات زادت ولا عشان الكمية المستوردة قلت ولا تخلصوا منهم عن طريق الموزعين (السبع و طارق اسماعيل لحد الأسبوع اللي فات بس كان عندهم 2006 و 2007).
موديلات 2008 زاد فيها اللون الأزرق الزهري اللي كان موجود في الهاتشباك بس و للأسف الموتور ما بقاش مغطى بالكامل زي 2007. الموتور شكله مش حلو الحقيقة و مفيش أى حاجة توحي انه موتور رينو بس المسئول هناك أكد انه نفس موتور ال 2007.
الفئات تقريبا زي ما هي مع اضافات بسيطة:
1) المانيوال ودي فيها كل حاجة...6 وسادات هوائية - 4 زجاج كهرباء تاتش - ABS + EBD - مرايات كهرباء - كاوتش 15 بوصة و طاسات - ايموبيليزر - مثبت و محدد سرعة - باور ستيرنج كهربائي - كارت رينو و سنتر لوك و ريموت - ستائر للزجاج الخلفي و الزجاج الجانبي في الخلف - كمبيوتر للأعطال والمعلومات - مصابيح ضباب - تكييف هواء عادي - CD + MP3.
السعر - 118000 جنيه
2) الأوتوماتيك بنفس مواصفات المانيوال - ستيبترونيك 4 سرعات
السعر - 127000 جنيه
3) الأوتوماتيك السابقة و بيزيد عليها...المرايات ذات الطي الكهربائي و الكاوتش ال 16 بوصة و الجنوط السبور و التكييف الأوتوماتيك و مسند في الكنبة الخلفية.
السعر - 135000 جنيه
4) الموديل ده هيزيد فيه فتحة سقف و فرش جلد في قماش أو جلد كامل (أسود أو بيج)
السعر لسه متحددش.
الضمان 3 سنوات أو 100 ألف كم.
الصيانة كل 5000 كم. الصيانات اللي على 5000، 15000، 25000....مجانية. الصيانات اللي على 10000، 20000، 30000....اللي بيتحاسب عليها.
هما بيستعملوا زيت شل و توتال حسب المتوفر و رغبة العميل و بيفتحوا مركزين صيانة جداد في أبو رواش و على الطريق الدائري بعد توكيل BMW.
حسب كلام المسئول هناك العربية مبتحتاجش تليين خالص. حد عنده فكرة الكلام ده صح و لا لأ؟
أنا خايف من حاجة واحدة بس و هي سحب العربية الأوتوماتيك. حاسس ان وزنها تقيل و العزم الأقصى عالي بس على 4200 RPM فحاسس انها هتبقى بلاعة بنزين جوا البلد عشان هحتاج أحرق كتير. حد ممكن يفيدني؟
شكرا جزيلا.