الموضوع: اللحيه في مصر

انا ليا اكتر من التعليق بجد
ولكن هبتدي بأني اقول يا أخواني اعذروني فأنا أختلف مع من يقول ان لو مش أد اللحية يبقى ميلتحيش لأن اللحيه بتربي الواحد وممكن تمنعه عن حاجات كتير هو من داخله ممكن يعملها
واحنا مش بنتكلم عن النية والقلوب ولكن من مظاهر الدولة الأسلامية الأمر بالمعروف والنهي عن المنكر وكذلك ان شوارعنا تبقى لها مظهر التزام بالدين مهما حدث
فمش معنى ان البنت مش مقتنعه بالحجاب انها متلبسهوش
لأ هيا لو عاوزه تبقى كويسه وربنا يهديها تلبسه علشان هيخليها تلتزم بحاجات كتير لا يعلمها الا من ذاق
زي اللحية بالظبط لا يعلم قيمتها الا من التحى وربنا اكرمه بأنه يلتزم بالدين كويس
هيلاقي نفسه محجوب عن حاجات كتير هو من داخله ممكن يشتهيها ولكن هيا هتوقفه وبالتالي هيتعود بعد ذلك انه لا يفعل هذا الفعل الذي هو يشتهيه
المهم لشكل الدولة ان مفيش حد ظاهر بالفعل السئ وهذا هو المراد
لأن من اسباب فعل الحرام هو تجاهر الناس به وليس في الخفاء
وعاوز اقول ايضا ان التظاهر بالحرام ده له عقاب جماعي
اما فعل الحرام بيني وبين نفسي فده له عقاب لي أولا مباشر لي
قال النبي صلى الله وعليه وسلم .... (( كلّ أمّتي معافًى إلاّ المجاهرين، وإنّ من المجاهرة أن يعملَ الرجل بالليل عملاً ثم يصبح وقد ستره الله فيقول: يا فلان، عملتُ البارحةَ كذا وكذا، وقد بات يستره ربّه، ويصبِح يكشِف سترَ الله عليه)).

وقال المولى عزو وجل ( لا يحب الله الجهر بالسوء من القول إلا من ظلم )

فالجهر بالمعصية ليس عقابه كمن عصى الله عزو وجل وقد ستره الله

ومن هذا الباب لا يوجد عالم او شيخ يشهد له بالعلم والتقوى من الله سأل ان هناك من يريد من النساء ان يتحجب بالحجاب الشرعي ولكنها مش مقتنعه او ما شابه
وافتى انها لا تلبسه الا لما تقتنع علشان لا تسئ له
لا يوجد من افتى بذلك

فنحن مطالبين بعدم الجهر بالمعاصي فيما بيننا ومن هنا يأتي ان مينفعشي ان تبقى حجتي اني مش اد اللحية او مش اد الحجاب
ما هو ده معناه انك مش عاوز تمشي في الطريق

يااخواني والله اللحية او الحجاب لمن لم يجرب بحق
تمنعك من حاجات كتير تقدر تعملها وانت بدون لحيه وهذا من فضل الله علينا

وانا لا اتكلم الأن على الحالات السيئة او النماذج السيئة
لأن اللحية كما قال أخوانن من قبل انها المفروض سمت لكل رجل مسلم
واكيد هيبقى في منافقين وكذابين ونصابين

طيب أسأل سؤال مين اكتر في النصابين
الملتحين ولا الغير ملتحين ؟؟؟؟
طيب من الفاسد اكتر المحجبات ولا الغير محجبات

زي ما قال احد مشايخنا الكرام تعقيبا على منع المنقبات من الدخول الجامعات الا بعد كشف وجوههم بحجة ان ممكن احد يتخفى في ملبسهم
طيب ما في ناس بتنصب على الناس بملابس الظباط وده بيحصل كتير
طيب ليه لا نطالب الظباط بعد ارتداء ملابسهم الرسمية ما هو في ناس بتتخفى تحت لباسهم برضه !!!!

في النهاية اللحية تؤدب من في قلبه نية صالحة ويرجو ان يهديه الله
ومن اوائل الطريق الى الله هو التزامك بأي شئ في مقدرتك
فمش معقولة اني انظر الى الأمور العظيمة في الدين وانا متهاون في الأصغر منها

نقطة جانبية :::: هو ليه الناس رابطه بين الملتحي والسبحة مع ان اللي يعرف يعني ايه ملتحي ومنهجه ايه هيعرف ان السبحة ليست من سمت الملتحي حقا
وده ان دل فبيدل ان ثقافة الناس كلها عن اللحية هيا المسلسلات والأفلام وحسبي الله ونعم الوكيل

تصدقوا وتأمنوا بالله
انا لما بشوف خطأ مسلسل او فيلم فيه تمثيل للملتحين
بقعد اضحك لأن حتى اللي عمل الشخصيات والحوارات لا يفقه شئ عن الملتحين ولا رايهم ولا شخصياتهم
لأنهم بيقولوا عليهم كلام ابعد ما يكون ان ملتحي يفعله او يفكر فيه
يعني في تعارض في الطرح فظيع
يعني هما عاوزين يعرضوا للمشاهد هذه الفئة من الناس ولكن للأسف من فعل ذلك لا يفقه ادنى شئ عن هذه الفئة او منهجهم يعني ساعات بيظهروهم انهم يفعلوا اشياء اي ملتحي هيقعد يضحك من السخافة اللي بيعرضوها على الناس لأنها ابعد ما يكون عن الحقيقة فعلا

حاجه تانيه هو ان للأسف الناس اللي بتقول ان كل اللي تعرفهم او تجاربهم مع الملتحين بتبقى وحشة
وده اقدر اقولك لأن حضرتك لم تقابل الملتحي او الملتزم بالدين صح
فهذا النموذج السئ هو من تجده في الشارع امامك طول اليوم وبعيد كل البعد عن الدروس او التعلم بالدين مش هقول وحش ولاكن زيه زي اي واحد اخر عادي الفرق انه مربي لحيته علشان اقتنع بها وشايفها شئ كويس وفي ناس بتاخدها مظهر من مظاهر رجولة زي الشنب

زي بالظبط لما تلاقي واحد شاب صايع طول النهار مع البنا وفي الشارع
لما ياتي يبحث عن زوجة يقولك ان كل البنات وحشين ومش عارف يلاقي واحده كويسه
مع ان بيوت المسلمين ماليانه بنات محترمه ومؤدبين وقمة الحياء ولكن هو لا يرى الا من نظارته هو اللي لا تشوف الا من حوله في بيئته
هيا نفس الموضوع

الزم احد المشايخ او العلماء المعروفين بتقاواهم وانت تشوف بحق الملتحين
ولا تنسى انهم بشر وليسوا ملائكة برضه
ولكن ستجد الإيثار وستجد صفات مفتقده في مجتمعنا بجد
ربنا يبارك في كل المسلمين ويهدينا جميعا

وكلمة اخيره من كلام سيد الخلق صلى الله عليه وسلم
-=-=-=- من يرد الله به خيرا يفقهه في الدين -=-=-=-