الموضوع: القسم العام لطرح المشاكل وحلولها

يا جماعه انا خطرت لي فكره حلوه:10D5C8~1107:

انا كنت بقول أن أي حد حصلت معاه مشكله وعرف حلها ونفذها ياريت يفيدنا بيها

كل واحد يحكي لنا مشكلته مع العربيه بتاعته وعالجها ازاي!

يمكن يكون له شبه شويه بمواضيع تانيه بس الفكره دي حتبقي كويسه لان المشاكل كلها حتبقي حلولها تحت سقف موضوع واحد.

وحبدأ انا.

انا معايا عربيه أكسيل موديل 94 أوتوماتيك او كانت أوتوماتيك وبقت مانيوال والحمد لله

ايه إلي حصل !
وانا ماشي بيها لقيت صوت صفاره أو حاجه بتزيق بس علي ناعم كده طالع من قدام فتحت الموتور وكنت فاكر انها خشونه كاتينه السيور..حطيت لها wd40 وبرضه وانا ماشي بتصفر...قلت تراب علي التيل دخلت محطه البنزين ورشيت ميه علي العجل والطنابير والصوت راح لكن شويه ورجعت تاني...قلت فيه حديده معووجه وممكن تكون بتحك في العجل وهو ماشي..فكيت العجل إلي قدام وملقتش حاجه معووجه...تاني يوم نزلت بيها ولسه حطلع...ومره واحده .... العجل كلبش في الأرض بدون مقدمات وكانت العربيات حتلبس في ظهري لكن الحمد لله ربنا ستر والعربيات اخدت بالها بسرعه...والعربيه حالفه ما تتحرك من مكانها كإنها مربوطه في جبل..المهم جبت ونش كبير من إلي بيشيل العربيه علي ظهره وروحت بيها للميكانيكي ولما عمل تيست للعربيه قالي ...

يا باشا ده رومان البلي بتاع العجل اتفرط ووقع كله..وفتح لي مكانها لقيت مافيهاش رومانه واحده.... وراجع لي كمان علي الرومان إلي ورا وقالي نغيره كمان لانه أتفرط منه شويه قلت له اتكل علي الله ظبت الرومان كله بتاع العجل ولو فيه جوافه حط لها كمان مش خساره فيها

والحمد لله الحوار ده اتظبط والعربيه لاحظت انها بقت ناعمه معايا وحلوه والحمد لله

انا كنت عايز احط موز بصراحه أصله مزحلق طبيعي

لا حنحتاج رومان ولا مانجه ولا جوافه

بيس يا مان