الموضوع: استفسار عن الاسكودا نيو فابيا او رومستر

شوف انا تقريبا فهمت انت عايز توصل لايه وانا من واقع تجربتى مع الرومستر ومع السيريون يعنى مدرستين مختلفين حريحك واقولك اللى انت عايز توصله .
انا معايا رومستر كمفورت ماتورها نفس موتور الفابيا ( من نفس الفئة طبعا والسعة اللترية ) والمدام معاها سيريون 1500 .
نعومة السيريون اكثر من الرومستر بمراحل بتفسير النعومة اللى انت تقصده مش بالمسمى بتاعه لان النعومة هى حاجة نسبية تختلف من شخص لاخر .
لكن بمفهومك انت فالسيريون انعم بمراحل يعنى صوت موتور ناعم زى بتاع ال Games لدرجة انه من كتر نعومته تحس انك سايق عربية لعبة .
طبعا الحقيقة انك بتبقى سايق عربية محترمة وتنحنى لها ماركات كتير .
نييجى للرومستر اللى بتحس انك سايق موتور بجد ليه كده زى ما بيقولوا شخصيته وصوته كده فى كركرة خفيفة بتميزه من غير ما تكون مزعجة وعلى فكرة نفس الصوت فى الاوكتافيا كلها وفى الباسات كلهم نفس الصوت .
بالنسبة للرومستر فهى سيارة عائلية تقيلة وراكزة على الطريق ومستوى عالى من الامان يعنى تعدى جانبك المقطورة وانت قافل ازازك تلاقى العربية ثابتة ولا الهوا ومتنتظرش انك تجرى وتلعب بيها على الطريق لانها غير مصممة لكده .
السيريون بقى متعة وجرى وشد وثقة انك لما حتشد مع اى عربية مش حتخيب ظنك وحساسية عالية جدا وسحب جبار ما شاء الله .
طبعا لما يبقى وزن السيريون 950 ك وهى فاضية ويبقى وزن الرومستر 1215 ك وهى فاضية فاعتقد ده يفسر حاجات كتير .

طولت عليك بس حبيت انقلك احساسى مع عربيتين كل واحدة منهم من مدرسة مختلفة ليها شخصيتها المستقلة

وانصحك تجرب العربية قبل ما تشتريها ايا كان نوعها عشان تحكم عليها صح وتتاكد انها بتشبع رغباتك الشخصية .

المشاركة الأصلية كتبت بواسطة semihuman

وهل معني كلامك ان السريون امتع في السواقه؟؟

دى مسالة نسبية وترجع لطبيعة كل واحد فى سواقته
انا شخصيا سواقتى هادية حتى وانا ماشى بسرعة وبحب العربيات الكبيرة اكتر والرومستر عربية الى حد ما كبيرة وعالية وانا بحب النوع ده من العربيات وبستمتع بسواقتها اكتر .
اما لو انت متعتك فى الجرى والسحب والنعومة اللى سالت عنها يبقى السيريون اكيد تبقى امتع ليك .

طبعا ممكن تجرى وتشد وتحرق على الغيار بس بلاش تقارنها بالسيريون لان السيريون الحقيقة عربية طلقة فعلا ووزنها خفيف والمقارنة هنا غير عادلة .

ومتنساش اننا لا نقارن السيريون بالرومستر لكن انت سالت عن نعومة الرومستر فحبيت اوصفهالك بالمقارنة مع عربية ناعمة اوى زى السيريون عشان الفرق يبان وده مهم عشان الموضوع لا يصبح مقارنة بين العربيتين لانها اكيد حتبقى مقارنة غير عادلة .

على فكرة وكيل سكودا بيعمل تيست درايف وتقدر تتصل على 16616 وتحجز موعد وتجرب العربية وتقطع الشك باليقين .
وبالتوفيق