الموضوع: حوار هادئ عن ماركة بروتون

المشاركة الأصلية كتبت بواسطة MuhammedSoliman

أنا مش ضد التوكيل علي طول الخط بالعكس انا بفرح جدا لما يعملوا حجات ايجابية وبشكر فيهم بس لما على طول قطع الغيار مش متوفرة ولما تروح تسلم عربيتك من الصبح ومحدش يشتغل فيها ويسلمها لك على أساس إنها اتعملت ولما عربيتك تتخبط فى التوكيل وميعرفوش من اللى خبطهاوهيه لسه في اول صيانه ليها ولما تروح بحاجه سليمة وترجع بايظه ولما يسبوا طبة الزيت بعد الغيار مفتوحه والزيت كله ينزل فى الأرض وانت على سفر .... ده يعتبر توكيل ايه؟ ولما تكون اسعار القطع نارومبالغ فيها هيه والصيانه ؟ فى الحقيقة هما بيغيروا الحاجه اه عشان الواحد يكون حقاني بس عيش أكنك معندكش حاجه فى الدنيا غير العربية جاي منين؟ من التوكيل رايح فين؟ التوكيل بتكلم مين التوكيل؟ الوقت برضوا ليه تمن والناس هناك المهندسين المعامله كويسه نوعا ما بس همه برضوا مش بيدهم حاجه على العموم احنا نحب التوكيل يتقدم ده فى صالحنا ونتمني لهم الخير
تحياتى
اما بالنسبة لموضع البي ام متنساش ان البي ام بتبيع نفسها بنفسها يا هندسة وديه بصراحه معلومه جديده عليه ان عز العرب هوه وكيل البي ام

هو موزع معتمد من المجموعه البفاريه في الصيانه و المبيعات

المشاركة الأصلية كتبت بواسطة sakantamany

لو دخلت علي منتدي البريليانس حتلاقي بلالالالاوي زي :
"يا جماعة كل الصيني زي الزفت"
"طب ليه تشتري صيني لما ممكن تجيب ...."
"العربية فيها وفيها وفيها .....طيب حضرتك عندك العربية ....لأ واحد صاحبي قالي كده "

حضرتك المصري بيحب يفتيييييي علشان يبان إنه بيفهم وواد جامد .
ياريت نبطل سلبيه وإللي خايف من حاجة ما يذمش فيها وخلاص إلا بعد لما يجربها .
شكرا

+10000000000

اتفق تماما

اللى ماجربش الحاجه...مايقولش رايه...ويخليه لنفسه

وزى ماحضرتك قولت شعب يحب الفتى...ويحب يعمل موضوع من لاشىء...عشان يتقال عليه دا انسان بيفهم

بس الواحد اكتشف علاجات للناس دى..والصراحه بتجيب نتيجه...

المشاركة الأصلية كتبت بواسطة love_medo212

انا من عشاق بروتون بس جن 2 مش اى حاجه تانيه وليس من ملكها بس قريب إن شاء الله اكون من ملكها
انا ركبت العربيه دى مع واحد صحبى لمسافه 25 كيلو هيا المسافه مش كفيه انى احكم على العربيه بس بصراحه العربيه مشاء الله كويسه جدا
وبعدين انا شفت العربيه دى مع واحد فى الحرفين عنده ورشه ميكانيكا فبتكلم معاه على العربيه ومميزتها وعيبها بكل صراحه رد الراجل قلى مفيش عيوب قلتله ابسط حاجه الناس كلها بتتكلم عن تزيق فى الكنبه الخلفيه قلى لو صاحبها واخد باله من العربيه مش هنزيق قلى دى حلها انه يفتح الكرسى ويشحمه مش اكتر او يلف عليه قطعه من الاسفنج بعدها اتحداك لو سمع اى صوت ورا

10/10 يا ميدو

و العربية فعلاً بسم الله ما شاء الله عليها
و عايزين نشوفك منضم الي النادي البروتوني

عزيزى توت عنخ امون

مش البروتون بس هى اللى بتتهاجم من الاعضاء وبيحصل فيها فتاوى من غير ماتتجرب دى طبيعة فى الشعب المصرى فياريت متفتكرش ان الناس مركزة بس على بروتون وعشان تتأكد ادخل منتدى متسوبيشى وشيفورليه ودايو وسبرانزا وهيونداى حتلاقيهم بيهاجموا اللانسر والاكسنت والافيو والنوبيرا والاسبرانزا من غير مايجربوها ويقولوا كلام من اللى يغيظ من عينة
"أصلها عربية واحد صاحبى "
"انا شفت امبارح واحد راكن على جنب الطريق وبيصلح فيها "
" انا عملت تست درايف الشهر اللى فات "
" بيقولوا عليها فى الشد والحرق مش قد كده "
" ثباتها بعد سرعة 180 كم مش تمام "
" الاتوماتيك والسحب فيها ضعيف جدا بتجيب ال 160 بالمحايلة "
" العزل بتاعها سئ جدا مش بعرف اسمع الاغانى كويس "

نفسى نبطل تحيز لسياراتنا ونسفه فى سيارات الغير
انا ممكن اكون بعشق عربيتى جدا وراضى بعيوبها بس ده لا يعطينى الحق فى نقد عربية مجربتهاش
على فكرة انا جارى معاه جين تو ومش حقول رأيي فيها برغم اعجابى الشديد بشكلها الخارجى وخاصة الخلفى وده لسبب بسيط جدا
انى مجربتهاش وحكمى على اى سيارة انها لابد تعيش فى السوق مدة لا تقل عن 5 سنوات عشان حكمى يكون صحيح لانه عمر ماكان ال 16 الف كم حكم على جودة العربية لان اى عربية زيرو من اى ماركة ممكن تعيش 3 سنين أو تعمل 60 الف كم بدون مشاكل خاصة لو مالكها استعماله نضيف وكمان عمر ماعيوب التقفيل البسيطة ماتعيب العربية ابدا لان مفيش عربية خالية من العيوب المهم اننا نقيم العربية مزاياها وعيوبها مقابل المبلغ المدفوع فيها والا كلنا حنختار المرسيدس والبى ام ومش حنشترى غيرها

أسف للإطالة