من فتره كان عندى مشوار فى مدينه نصر
فين؟
عند جامعه الازهر باضبط فى مساكن الضباط اللى امام قاعه المؤتمرات
وانا بركن عربيتى لقيت قدامى واحد كنت اعرفه زمان كان موظف فى الجمارك واتنقل للوزاره اللى فى امتداد رمسيس
لقيت صاحبنا وشه مخطوف وشكله متغير وعنيه زايغه زى ما يكون تايه!
السلام عليكم...اذيك يا استاذ فلان كل سنه وانت طيب
انت فين محدش شافك من زمان؟!
الرد : غمغمه غير مفهومه!!
مالك فى حاجه؟؟
العربيه ركنتها ونسيت ركنتها فين!!
هههه ياراجل خضتنى تعالى نبص عليها سوا انا عارف المنطقه هنا كويس
انا كنت راكنها فى شارع عمودى على سكه العربيات
تعالى بس
واعدنا نلف يا رجاله لما مبقاش فى عربيه ما بصيناش عليها
طب هى عربيتك متغطيه؟
لأ
يمكن حد بيهزر وغطاها؟
مفتكرش حد هايعمل كده
طب تعالى نجرب تانى
ولفينا نفس اللفه والمشكله ان العمارات والشوارع شبه بعض جدا فى المنطقه دى وبقينا نبص تحت غطيان العربيات والناس بتتفرج علينا
طب اوصفلى كده لما ركنت كان قدامك ايه؟
انا ركنت كان قدامى الاوتستراد والعربيات عمودى علشارع الجانبلى اللى ركنت فيه
طب كده يبقى ما قدمناش غير اربع او خمس شوارع
وبعد لف وتمحيص ومحاوله انعاش لذاكرته
افتكر المكان واحنا واقفين مطرح ما ركن العربيه الصبح
طب فين العربيه؟
لاقيت بواب بيغسل عربيه سألته مشفتش عربيه لونها دهبى كانت واقفه هنا الصبح؟؟
ايوه كانت واقفه هنا
طب راحت فين افففففففففففففف لازم تكون اتسرقت!!!
البواب ملص وقتى وقال انا مشفتش حاجه انا كنت بره بشترى حاجات
هيا العربيه كانت مركونه هنا ؟؟
اه
طب ممكن تكون ركنتها قدام بيت حد مهم ظابط مثلا راح جبلك ونش وشالها عشان يدوخك؟؟
رحنا سألنا محل كاوتش على الشارع قالنا مفيش ونش عدى النهارده خالص
يبقى اتسرقت
هى العربيه كان فيها انذار؟؟!!
العربيه كان فيها انذار والدركسيون مسوجر والفتيس مش هايتحرك غير ولو الكونتاكت مفتوح .
طب العربيه كانت بتتصلح او عند اى صنايعى قريب؟؟
كانت عند الكهربائى من كام يوم
والمفتاح كان فيها؟
ايوه بس انا كنت موجود معظم الوقت
ممكن يكون عمل نسخه من المفتاح؟؟؟
المفتاح مشفر والعربيه مش هاتدور غير بمفتاحها الاصلى كمان لما رحت لواحد بيعمل المفاتيح المشفره قالى ده لازم تعمله فى التوكيل ورحت التوكيل طلبوا 900 جنيه عشان يعملوللى نسخه طبق الاصل.
طب ايه؟؟
مش عارف!!!
طب انت شاريها قسط؟؟
لأ اشمعنى؟! عشان المعارض لما بتتأخر فى القسط بيبعتوا واحد بنسخه المفتاح والتوكيل ويأخد العربيه
طب النسخه التانيه من المفتاح مع مين؟؟
مفيش نسخه تانيه انا شاريها من واحد بنسخه واحده
بس كده يبقى اللى باعلك العربيه هو اللى سرقها بالنسخه التانيه
ما أنا شارى العربيه من سنتين ونص اشمعنى دلوقتى؟؟؟
طب هاتعمل ايه دلوقتى ؟؟!!
هاطلع على النقطه واعمل محضر بس مش حافظ رقم العربيه
ابقى انقله من الرخصه
ماهو الرخصه والتوكيل فى التابلوه
:Copy of majd(4)::Copy of majd(4)::Copy of majd(4)::Copy of majd(4):
بصراحه من اول ما بدأت اشك ان عربيته اتسرقت فى عز الظهر وفيها كل وسائل الحمايه وانا قلبى واكلنى على عربيتى وهاموت واروح اراجع على الابواب وأأمن عليها
قمت صبرته بكلمتين وسلم عليا وراح يعمل المحضر.
طبعا كل مافتكر الموقف ده افتكر فؤاد المهندس فى سيدتى الجميله
القميص بست زراير
وكرافته مربوطه
وصديرى
وجاكته مقفوله
ومع ذلك سرقوا الفانله؟!!!
العربيه سيات توليدو يعنى معليهاش طلب وقطع غيارها مش مطلوبه قوى زى اللانسر مثلا
والعربيه مركونه فى شارع جانبى ينتهى برصيف عمودى يعنى مينفعش عربيه ولا ونش يشيل العربيه
العربيه مفتاحها مشفر ومبيتقلدش
العربيه فيها سنتر وأنذار
الدركسيون مسوجر
طب اتسرقت إزاى؟؟؟؟؟؟!!!!!!!!!!!!