لمالكى السيفيك

**Dr.Mohamed** · 20-03-2009 09:05 AM

يا جماعه انا حطيت موضوع مين الى مسحه ؟
على العموم انا عايز اسالكم عن كماليات الموديل lxi و ياريت لو حد يحط صور لطابلوه الموديل ده والتاره لو سمحتم ؟
و تنصحونى بجد بالموديل ده ولا بالكورولا الى كمالياتها اعلى ؟ الاتنين بنفس السعر

**kemo0o** · 20-03-2009 09:11 AM

2 ايرباج
سنتر لوك
زجاج كهرباء
مثبت سرعة
اوتوماتيك
مشغل اسطوانات بس ومافيهوش مكان للكاسيت

المقارنة صعبة جدا عشان اقل فئة في السيفيك بنفس تمن اعلى فئة في الكورولا
بس الغاوي للهوندا ......... وانت كمل بقى

**Dr.Mohamed** · 20-03-2009 09:16 AM

اصل يا باشا دى اول عربيه اجيبها و حيران اوى و موضوع الفلوس مش هيفرق بس لحدود ال 150 مش معقول تبقى اول عربيه و اجيب حاجه عاليه اوى
ده انا لما شفت السفيك فى المعرض اتخضيت قلت هسوق دى ازاى
سيبك يا باشا من موضوع الكماليات بس هل كعربيه اعتماديه و موتور وسواقه الحاجات المهمه فى اى عربيه السيفيك اعلى ؟
وهو حضرتك مركب الفوج لايت ولا جايه معاها و بتتكلف كام ؟
ومفيش فيها مرايات كهربا و طاره مالتى فانكشن ؟
وياريت لو حضرك تحطلى صور التابلوه بتاعتها ؟
وشكرا يا بااشا وصباح الخير

**kemo0o** · 20-03-2009 09:57 AM

ده انا لما شفت السفيك فى المعرض اتخضيت قلت هسوق دى ازاى

والله نفس كلمتي اللي قلتها وانا رايح استلم

هل كعربيه اعتماديه و موتور وسواقه الحاجات المهمه فى اى عربيه السيفيك اعلى ؟

الاتنين اعتماديتهم عالية بس مش عارف بقى كل واحد بيحب عربية وانت عارف الحب اعمى ههههه وعامة مواتير الهوندا معروفة من زمان انها من المواتير المعمرة وكمان قطع الغيار تنساها ماعدا طبعا القطع الاستهلاكية زي التيل وخلافة

وهو حضرتك مركب الفوج لايت ولا جايه معاها و بتتكلف كام ؟

للاسف ماكنتش جايه بالفوج لايت لام 2008 اعلى فئة فيها كانت Lxi اقصد ماكنش فيه غير فئة واحدة بس
عامة الفوج لاايت بتاع 2008 ب 1650 في التوكيل وبره ب 300 جنية بس بزرار مش بدراع النور
اما عن 2009 فالفوج غالبا في التوكيل على ما افتكر كان ب 2200

وانا مش مركب اي حاجة في العربية لسه

ومفيش فيها مرايات كهربا و طاره مالتى فانكشن ؟
وياريت لو حضرك تحطلى صور التابلوه بتاعتها ؟

لا مفيش مرايات كهرباء بالنسبة للطارة اقل فئة فيها مثبت سرعة بس ومافيهاش تحكم في الكاسيت
انما اعلى فئة فيها المثبت وزراير التحكم في الكاسيت
انا التابلوة بتاعي مختلف عن بتاع ال 2009 عشان انا موديل 2008 كان بينزل بكاسيت غير اللي موجود حاليا
وعموما هصورهالك النهاردة واحط لك صورة

**Dr.Mohamed** · 20-03-2009 10:06 AM

شكرا جزيلا يا باشا انا مش عارف اقولك ايه بجد
ربنا يخليك

**kemo0o** · 20-03-2009 10:21 AM

شكرا جزيلا يا باشا انا مش عارف اقولك ايه بجد
ربنا يخليك

ياباشا احنا تحت امرك وكلنا هنا لخدمة بعض ويارب يوفقك

وتشتري هوندا برضه ههههههههه

**Dr.Mohamed** · 20-03-2009 11:02 AM

هههه بص انا عايز اقول حاجه بس خايف الناس تزعل منى
بصراحه بحس انه الى بيجيب هوندا حد كويس اوى ابن ناس يعنى بجد طبعا كل الناس خير وبركه يا عم بس ده احساس
يعنى مش اى حد يركب العربيه دى
ربنا يسهل يا باشا انا متابع معاكم علطول ان شاء الله

**abo samra** · 20-03-2009 07:07 PM

المشاركة الأصلية كتبت بواسطة derba

هههه بص انا عايز اقول حاجه بس خايف الناس تزعل منى
بصراحه بحس انه الى بيجيب هوندا حد كويس اوى ابن ناس يعنى بجد طبعا كل الناس خير وبركه يا عم بس ده احساس
يعنى مش اى حد يركب العربيه دى
ربنا يسهل يا باشا انا متابع معاكم علطول ان شاء الله

واحنا اللى بنجيب تويوتا نبقى اولاد ايه بقا

**Dr.Mohamed** · 20-03-2009 08:09 PM

المشاركة الأصلية كتبت بواسطة ahmed _abo samra

واحنا اللى بنجيب تويوتا نبقى اولاد ايه بقا

ازاى بس يا استاذ احمد
انتم الناس بقى يا باشا واحنا اولادكم يا باشا ناس اولاد ناس
انا بحس الكورولا عربيه الناس الكبار و خصوصا الشكل الجديد يعنى عربيه لوالدى مثلا وكده
واوعى تكون زعلت انا بهزر وعلى فكره حضرتك احد الاسباب الى خلتنى افكر فى الكورولا بعد تقرير حضرتك عنها بس الى لاحظته انه حضرتك الوحيد الى اتكلمت حلو فى حقها
واستاذ كيمو الى شجعنى على السيفيك
و لسه باقى الانترا وشكلها هترسى عليها انا محتار اوى يا جماعه والله
بس ربنا يخليكم وشكرا ليكم جميعا