بصوا يا جماعة .. اللى حصل بالظبط كالآتى ..
لما القربة باظت رحت اشتريت واحدة جديدة من عند الكيلانى وجبت كمان جركن مياه Mobil Coolant .. الجركن 4 لتر بس مش خمسة قلت للراجل طيب مفيش عبوات أقل من كده عشان ده ممكن ميكفيش قالى فى عبوة واحد لتر بس مش موجودة دلوقتى .. رحت لبتاع الريداتيرات .. غير القربة القديمة بالجديدة وحط المياه الموبيل .. بس فعلا عقبال ما خرج الهوا كان الجركن خلص ولسه مستوى الميه قليل راح مزود شوية ميه عادية حوالى نص لتر مثلا .. قلتله مش غلط كده قالى لأ عادى مش حيأثروا يعنى .. بس برضه منسوب الميه كان قليل .. قالى لما العربية تبرد ابقى زودها شوية .. مشيت من عنده وروحت وكانت الحرارة عادية .. وبعد شوية نزلت رحت بنزينة موبيل تانية سألت على العبوة الواحد لتر فلقيتها وجبتها ورحت غسلت العربية وبعدين روحت غطيتها وبرضه كانت الحرارة عادية .. الصبح وأنا نازل قلت أزود شوية المية اللى ناقصين .. كانت العربية والقربة دافية شوية مش باردة خالص أكيد عشان كنت مغطيها .. المهم زودت شوية مية موبيل ومشيت رحت الشغل كانت الحرارة عادية .. وأنا راجع بأه من الشغل لقيت المؤشر بيعلى عن النص بشوية كتير يعنى حوالى ربع كمان .. بس بتنزل تانى بسرعة .. يعنى كل شوية تطلع شوية وتنزل بعد دقيقة مثلا أو أقل .. طبعا اتضايقت جدا وشكيت انى لما زودت المية والعربية دافية مش بادرة تماما دخلها شوية هوا فى الدورة ..
تانى يوم رحت الشغل الصبح لقيتها كويسة .. كان المؤشر ساعات بيطلع سنة واحدة فوق النص قلت عادى دى مشكلة .. وأنا مروح برضه لقيتها نفس النظام قلت خلاص كويس ..

بعد كده نزلت تانى وعلى آخر المشوار وأنا مروح وكانت الساعة تقريبا 11.30 بالليل يعنى مش حر ولا شمس ولا حاجة لقيت المؤشر طلع تانى .. اتعكننت جدا طبعا ... طلعت البيت وبعدين قلت يمكن تكون واخدة شوية هوا بسيط .. ححاول أنزل أعملها بما إنى شفت الراجل بتاع الريداتير بيعملها مرتين أدامى ففهمت بيعملها إزاى وأهى فرصة أتعلم الحكاية دى عشان لو اتزنقت فى حتة أبقى بعرف أعملها .. بس للأسف يا ريتنى ما عملت حاجة .. إنك تفهم حاجة وانك تعمل حاجة تانية .. الحمد لله عكيتها والمية قعدت تفور من القربة ومعرفتش أظبطها لحد ما المية الخضرا كلها خلصت وطلعت جبت ميه من البيت وحاولت تانى برضه معرفتش .. اتخنقت وقفلتها وطلعت نمت ورحت الشغل النهاردة بتاكسى .. ولسه حروح أوديها لواحد بتاع ريداتيرات يعملها وربنا يسهل ...

أنا شاكك ان المشكلة مكانتش هوا ولا حاجة .. وان المروحة كانت بتتأخر فى الشغل .. بس اشمعنى يعنى بعد تغيير القربة والمية ؟؟ وهل الترموستات ممكن تبوظ بالشكل ده ؟؟ يعنى المروحة تشتغل بس متأخر ؟؟ مش لو الترموستات باظت المروحة مش حتشتغل خالص ؟؟

ممكن تكون المية الموبيل دى مش متوافقة مع العربية .. ؟؟ أنا قبلها كنت حاطط ميه خضرا من نوع عادى كانت عند بتاع الريداتير نوعها Champion جركن 5لتر بـ 20 جنيه .. وكان المؤشر مش بيزيد عن النص .. !!!

يا جماعة أنا حاسس انى اتخنقت من العربية وبفكر أبيعها مع انها عجبانى بس هى مشكلتين .. الحرارة واستهلاك الينزين .... !!!!!!!!!!!!!