عندما تتنازل عن مبادئك وتشتري بوكيه ورد لوالدتك بمناسبة عيد الأم.

**itsonlyme** · 21-03-2009 07:13 PM

أيوة تنازلت عن مبادئي واشتريت بوكيه ورد لوالدتي. ببساطة لأن مقتنع أن عيد الأم وعيد الحب بدعة واستغلال تجاري وتسطيح وتتفيه للناس.

واحدة واحدة.
1) بدعة لأن للمسلمين عيدين، عيد الأضحى وعيد الفطر. لو كثرت الأعياد فقدت قيمتها. تصور لو لم نحتفل بكل هذه الأعياد المصطنعة كيف ستصبح فرحتنا بالعدين المقدسين؟

بعدين في نقطة مهمه. عيد الفطر وعيد الأضحى هي أعياد يفرح فيها الكل.الكل بمعنى الكل! الفقير والغني. الصغير والكبير. اليتيم وغير اليتيم. الاهتمام الأكبر في العيدين هو بالتكافل الاجتماعي. الغني يعطي الفقير فيفرح الفقير بما حصل عليه ويفرح الغني بعطائه لغيره.

أما في عيد الحب، العازب لا يجد من يحتفل معه بالعيد. الآنسة التي لم تتزوج بعد يصبح هذا العيد مناسبة لتذكر وحدتها. الفقير لا يجد مالاً ليشتري هدية لزوجته التي سوف تقلب عليه الدنيا نكداً. وفي عيد الأم، اليتيم لا يجد أمه ليحتفل بها.

2) استغلال تجاري لأنه كأي عيد مصطنع، يستغلة التجار للكسب السريع. فجأة ترتفع أسعار الورود والأزهار. وتروج تجارة الدباديب والشيكولاته وما الى ذلك من سلع غير مفيدة بالمرة.

3) تسطيح وتتفيه للناس بدباديب وقلوب حمراء وشيكولاته. ويا ويلك يا عبد العال لو مجبتش الهدية. "هو أنا مش زي كل البنات عايزة ورد وشيكولاته؟" تقول له زوجته أو خطيبته. لو زوجك أو خطيبك مجبلكيش هدية وخرجك في مطعم رومانسي يبقى مابيحبكيش ومن حقك تعكنني عليه حياته. الطريقة الوحيدة للتعبير عن حبه هو ان يصرف ويجيب. الكلمة الحلوة مش كفاية. طبيعي، ما الست شايفة كمية الاعلام والاعلان الموجة لتضخيم عيد زي عيد الحب أو الأز.

يعلم ربنا أن بحاول أرضي ولديتي كل يوم بكلمة حلوة. والدتي ست كبيرة وبوسة على الراس بتفرق معاها. الموضوع مش بخل، الموضوع رفض للانسياق وراء ما يُروج له كالقطيع.

المهم، ضعفت رحت لبتاع الورد.
بكام البوكيه ده يا سيدي؟
ب 60 جنيه عشان خاطر الباشا عشان "يظبط".
اظبك ايه بس يا عم، دي والدتي.
عشان خطرك ب 50. (أنا أساسا مافصلتش)
ماشي.

وآدي البوكيه اللي أنا متأكد انه مايساويش 20 جنيه.

**nazaryia** · 21-03-2009 07:28 PM

ربنا يباركلك في والدتك
و جرب بقي تجيبلها البوكيه ده بقي من غير مناسبه في اي وقت تاني
هيفرق معاها اكتر من البوكيه ده

**elpasha009** · 21-03-2009 08:15 PM

أحييك جدا على رأيك الصريح وأؤيدك تماما وبشدة لأني أعاني من هذه المشكلة مع خطبتي.مع إني من أشد الكارهين والرافضين لأي عيد غير العيدين الفطر والأضحى فقط.
بالمناسبة والدتي كمان مبتحبش موضوع العيد ده خالص وبتتخانق لو حد قالها كل سنة وإنت طيبة أو جبلها هدية.
بالمناسبة البوكيه ده أنا كنت جايب واحد زيه من حوالي 4 شهور ب15 جنيه بالظبط من أشهر واحد بتاع ورد عندنا في طنطا بس كان أكبر

**Abo_Lina** · 21-03-2009 08:34 PM

بقت حاجة ماسخة عيد الحب و عيد الأم و عيد اليتيم
الا ما فيه عيد العمل أو عيد الانتاج

**itsonlyme** · 21-03-2009 09:11 PM

المشاركة الأصلية كتبت بواسطة nazaryia

ربنا يباركلك في والدتك
و جرب بقي تجيبلها البوكيه ده بقي من غير مناسبه في اي وقت تاني
هيفرق معاها اكتر من البوكيه ده

أشكرك على الدعوة الجميلة دي. ربنا يباركلنا في امهاتنا كلنا ويرحمهم أموات أو أحياء.
وفعلا كلمة حلوة أو هدية من غير أي مناسبة أجمل بكتير من هدية في عيد الأم.

المشاركة الأصلية كتبت بواسطة elpasha009

أحييك جدا على رأيك الصريح وأؤيدك تماما وبشدة لأني أعاني من هذه المشكلة مع خطبتي.مع إني من أشد الكارهين والرافضين لأي عيد غير العيدين الفطر والأضحى فقط.
بالمناسبة والدتي كمان مبتحبش موضوع العيد ده خالص وبتتخانق لو حد قالها كل سنة وإنت طيبة أو جبلها هدية.
بالمناسبة البوكيه ده أنا كنت جايب واحد زيه من حوالي 4 شهور ب15 جنيه بالظبط من أشهر واحد بتاع ورد عندنا في طنطا بس كان أكبر

تعمل ايه بس. حاول تقنعها برأيك. الكلمة الحلوة برضو بتفرق.
15 جنيه؟ آدي اللي خدناه من العيشة في القاهرة. زحمة وتلوث وأسعار غالية.

المشاركة الأصلية كتبت بواسطة Tyler_Durden

بقت حاجة ماسخة عيد الحب و عيد الأم و عيد اليتيم
الا ما فيه عيد العمل أو عيد الانتاج

معاك بس باستثناء عيد اليتيم. في النهاية ده مش عيد تجاري ومافهوش مظاهر تافهه. البلالين والعرايس وكل ده برضو بيفرحوا الأطفال الأيتام. العيد ده بيجبلي اكتئاب كل سنة لأن الواحد بيفتكر الأيتام اللي ناسيهم طول السنة. طيب الواحد بيشارك وبيحاول يفرح الأطفال في اليوم ده، طيب بقيت السنة؟

**sasatony** · 21-03-2009 09:23 PM

اولا انا معاك في كل حاجة ومختلف برده معاك انك تخليت عن مبادئك اينعم انت تخليت عنها عشان خاطرة الوالدة بس برده
يعني انا مثلا
مفيش حاجة اسمها عندي عيد الحب والهبل ده(ربنا يستر من الاخوة الرومانسين ) لاني مش محتاج يوم معين عشان افكرها اني بحبها واقولها هابي فلانتين داي وده مبدئي والحمدلله مش اتخليت عنه ابدا
اما عيد الام بقي الاول وانا صغير كنت بحتفل وانا صغير وبجيب هدية
بس دلوقتي في اليوم ده بقولها كل سنة وانتي طيبة والحمدلله انا بجيب لوالدتي هدايا في اي وقت (بمعني اصح لما بيجلي اي فلوس اول حاجة بشتريلها حاجة حتي لو علبة حلويات )
وبعدين احنا برده مش مستنين يوم الام ده علشان نفتكر الي والدتنا عملته لينا وتعبها وخوفها علينا
هقولك علي موقف والله كان من ضمن الاسباب الي خلتني ابطل احتفل بالعيد ده
ليا واحد جاري اكبر مني في السن والدته توفت قبل عيد الام الماضي بمدة يعني المهم يوم عيد الام الي فات كان قاعد قمة الحزن والزعل بسبب ان والدته توفت وعيد الام جدد المشاعر جواه تاني

كفاية كده شكلي طولت اووي عليكو

**eng.octooo** · 21-03-2009 11:34 PM

يا جماعة الدنيا حلوووووووة عيشوها بكل معانيها وابعد عن الى يضرك
تقدر تقولى عيد الام هايضرك فى اية (الا لو كنت بخيل يبقى هايضرك)
الحياة جمييلة

**Bossy_Fadl** · 22-03-2009 12:28 AM

يا جماعة انتو حطيتو ايدكو علي الجرح

انا كمان عمري ما يقتنع باي عيد في الدنيا غير عيد الفطر و عيد الاضحي

لكن ازاااااااااااي

فضلت متمسكه بمبدأي ده لحد فترة قريبه

كل سنة ماما تقولي مش هتقوليلي كل سنة و انتي طيبة

اقولها حرام عليكي ما في شي اسمه عيد الام بلا بدع بقي

بصراحه بقت تصعب عليا لاني لا باقولها كل سنة و انتي طيبة و لا باجيبلها هدية و هي بيبقي صعبان عليها حالها اوي عشان ولاد صحابها طبعا بيحتفلوا بامهاتهم بهاليوم

و انا طبعا الابنه العاقه الكريهة الحقودة التي تخرج عن تقاليد المجتمع و اعرافه:k48:

فطبعا بديت اجيبلها هدية انا و اختي و اقولها كل سنة و انتي طيبة

و السنة دي جبتلها هدية محترمة بصراحه خلتها هتعيط من كتر التأثر:k48:

طبعا عملت زي حضرتك بالظبط و اضطريت اتنازل عن مبادئي

لاني لما فكرت فيها لقيت انوالوحد مهما كان عنده مباديء ماشي بيها في حياته ككل فللاسف بيضطر يتنازل عن و لو جزء من المباديء دي قدام الناس اللي بيحبهم و بيضعف قدامهم

لاني مهما كان عندي مباديء تغور كلها في داهيه قدام دمعه من عنين امي احس فيها انها مش فرحانه في يوم كل الامهات فرحانين فيه

و مبدأي ممكن اطبقه مع اولادي ان شاء الله و اكون البادئه بنفسي في اني افهمهم انو من البدع اننا نحتفل باي اعياد تانية غير اعياد ديننا.

و ان تبجيل الام و الاحتفال بيها و محاولة ارضائها لازم يكون في كل يوم من السنة او علي الاقل علي قد ما نقدر

انا اقدر علي نفسي لما ابقي ام و اقدر وقتها اطبق يالي مقتنعه فيه

لكن كله الا زعل امي

**EZABY** · 22-03-2009 02:32 AM

اولا ياباشا احييك على طريقة عرضك لرأيك بس اسمحلي اختلف معاك واقول رأيي

1) بدعة لأن للمسلمين عيدين، عيد الأضحى وعيد الفطر. لو كثرت الأعياد فقدت قيمتها. تصور لو لم نحتفل بكل هذه الأعياد المصطنعة كيف ستصبح فرحتنا بالعدين المقدسين؟

عيد الفطر وعيد الأضحي ليهم فرحتهم اللي لايمكن يقرب لها اي عيد تاني لأنهم ببساطه اعياد مرتبطه بالدين يعني فرحتها عامه وطالعه من القلب
لكن الاعياد التانيه دي ممكن نسميها اعياد متخصصه يعني مره للام ومره للحب يعني الفرحه والاحتفال فيها بيكون موجه لحد معين مش فرحه عامه واجتماعيه زي الاعياد الدينيه

2) استغلال تجاري لأنه كأي عيد مصطنع، يستغلة التجار للكسب السريع. فجأة ترتفع أسعار الورود والأزهار. وتروج تجارة الدباديب والشيكولاته وما الى ذلك من سلع غير مفيدة بالمرة.

مهو برضو اللحمه بتغلى عالعيد الكبير وعندك الكحك وكل حاجه بتغلى عالعيد الصغير
يعني ده عيب فينا احنا مش في الاعياد

3) تسطيح وتتفيه للناس بدباديب وقلوب حمراء وشيكولاته. ويا ويلك يا عبد العال لو مجبتش الهدية. "هو أنا مش زي كل البنات عايزة ورد وشيكولاته؟" تقول له زوجته أو خطيبته. لو زوجك أو خطيبك مجبلكيش هدية وخرجك في مطعم رومانسي يبقى مابيحبكيش ومن حقك تعكنني عليه حياته. الطريقة الوحيدة للتعبير عن حبه هو ان يصرف ويجيب. الكلمة الحلوة مش كفاية. طبيعي، ما الست شايفة كمية الاعلام والاعلان الموجة لتضخيم عيد زي عيد الحب أو الأز.

المفروض كل واحد يحتفل بالطريقه اللي تناسبه
مش معني ان في ناس بتحب تقلد غيرها حتى لو ده ميناسبهمش اننا نلغي العيد وفرحته عشان اللي بيتصرفوا غلط
المهم نفرح ونعيش الحياه بس كل واحد على حسب امكانياته

شكرا انك هتتقبل رأيي
وعلى فكره البوكيه جااااااامد جدا ذوقك حلو

**Terrible_DaRsH** · 22-03-2009 03:51 AM

وهو يعنى الاب ده ملوش حق يفرح هو كمان !!

ده فى رجالة يستحقوا 100 عيد بقي على كدا .

بصراحة بينى وبينكم كده الجيل ده لما يتجوز ويخلف والله لا يستلهوا عيد اب ولا عيد ام اساسا ...

70 % من شباب الجامعات دلوقتى سواء كانوا رجالة او بنات ميستهلوش اساسا هدية ب 2 جنيه خصوصا البنات دول ..
انا بستغرب جــــدا لما اشوف واحدة مش محترمة ومقضية حياتها كلها قلة ادب وما شابه وبعد كام سنة ولادها يجيبوا لها هدية عيد ام وهى لا عرفت تربيهم ولا علمتهم حاجة مفيدة اصلا و لكن ده شيء مش بايد حد انه يختار اهله ...

عموما (( ربنا يخليكى ليا يا امـــــــــــــى )) ..

ربنا يبارك لك فى والدتك ويديها الصحة وكل الامهات الصالحة يا رب ..

الموضوع: عندما تتنازل عن مبادئك وتشتري بوكيه ورد لوالدتك بمناسبة عيد الأم.

LinkBack

أدوات الموضوع

عرض

-

-

-

-

المواضيع المتشابهه

تعمل إيه لو طلبوا منك تتنازل عن الجنسية المصرية علشان تتجنس ؟

لو هتجيب موبايل لوالدتك ... تجيب ايه ؟

حملة : لا تتنازل عن عوامل الامان مهما كان

ملكة تتنازل عن عرشها...!!!!

الكلمات الدلالية لهذا الموضوع

المفضلات

المفضلات

ضوابط المشاركة

الموضوع: عندما تتنازل عن مبادئك وتشتري بوكيه ورد لوالدتك بمناسبة عيد الأم.

LinkBack

أدوات الموضوع

عرض

-

-

-

-

المواضيع المتشابهه

تعمل إيه لو طلبوا منك تتنازل عن الجنسية المصرية علشان تتجنس ؟

لو هتجيب موبايل لوالدتك ... تجيب ايه ؟

**حملة : لا تتنازل عن عوامل الامان مهما كان **

ملكة تتنازل عن عرشها...!!!!

الكلمات الدلالية لهذا الموضوع

المفضلات

المفضلات

ضوابط المشاركة

حملة : لا تتنازل عن عوامل الامان مهما كان