استطلاع هل تؤيد ردم ترعة المحمودية فى اسكندرية وعمل طريق محترم مكانها

**zyadahmed** · 27-03-2009 08:41 PM

1- اوافق
2- لا اوافق
3- اوافق على ردمها مع عمل ترام محلها بدل الطريق السريع
4- لا اوافق على ردمها بشرط تطويرها وتشجيرها

**zocor742** · 19-04-2009 08:23 AM

لا اوافق طبعا انا شايف ان الطريق دة مش محتاج غير انارة جيدة ورصف الطريق بأكملة وهيكون ممتاز جدا كمان المحمودية شغالة من النحيتين كفاية حوادث الشوارع كل ما بتوسع بشكل مبالغ الحوادث بتكتر عالية نتيجة للسرعات العالية والدليل ان طرق الكورنيش من ساعة ما وسع والحوادث فية بأستمرار والسرعات بقت عالية اوى مع ان التوسيع ساعد على حل ازمة المرور على الكورنيش دة غير كل لما الطريق بيوسع حوادث المشاة بتكتر حتى لو فية انفاق فالشعب المصرى بالزات الاسكندرانى بيكون واقف جنب النفق ويروح يعدى الطريق بردو سبحان الله
وفى النهاية دة رأيى الخاص بس عايز اعرف دة اقتراح شخصى لحضرتك ولا دى خطة جديدة لتوسيع طريق المحمودية.................

**zyadahmed** · 20-04-2009 02:41 PM

ده امل ورجاء مش خطة لانى تعبت من العفشة المتبهدلة ومن المطبات اللى مش بتخلص وباعمل كل يوم حاوى عشان احفظهم وللاسف كل ما احفظ مكانهم يجى مطب جديد فى مكان غير متوقع والله طرق ابيس مع احترامى ليها انظف منها انا نفسى بس اعرف ايه فايدة الترعة العجوزة دى بلاش طريق هاى واى زى الكورنيش ممكن طريق مرصوف واسع وفى مطبات صناعية عند عبور المشاة وحدائق فى الوسط بدل الترعة وعلى الاقل تقل المنحنيات الرهيبة الكتيرة اللى فى الترعة والطريق اللى مجرب الطريق اكيد عارف كمية المنحنيات الخطيرة اللى فيه وكم الحوادث اللى بيحصل بسببها ومنك لله يا محمد على زى ما حفرت الترعة زى التعبان المتلوى

**aliabutaleb** · 20-04-2009 02:44 PM

هي مش تقريباً المحمودية لا تزال مصدر مياه الشرب الرئيسي للإسكندرية؟
يبقى إزاي تتردم؟

**zyadahmed** · 21-04-2009 12:21 AM

لا طبعا المحمودية دى حاليا من ساعة ما تدخل اسكندرية عند العوايد لحد البحر عند القبارى تعتبر مجرى للصرف الصناعى والصحى وعمرها ما كانت للمياه العذبة من اكتر من 80 سنة لان فى ترعة اسمها ترعة مياه الشرب بنتهى عند محطة قطار محرم بيه وبتمشى فى مواسير تحت الارض لحد وابور المياه اللى فى غيط الصعيدى ومنه لمحطة المياه اللى قدام الاوليمبى والترعة دى العذبة بتخرج من ترعة الخندق اللى طالعة من الرياح البحيرى اللى طالع من النيل واللى ما يعرفهاش هافكره بيها هى الترعة اللى بتمشى جنب نادى اكاسيا والحديقة الدولية من ورا وبتعدى تحت الطريق الدائرى

**Samah AbdAllah** · 23-04-2009 02:18 PM

المشاركة الأصلية كتبت بواسطة zyadahmed

لا طبعا المحمودية دى حاليا من ساعة ما تدخل اسكندرية عند العوايد لحد البحر عند القبارى تعتبر مجرى للصرف الصناعى والصحى وعمرها ما كانت للمياه العذبة من اكتر من 80 سنة لان فى ترعة اسمها ترعة مياه الشرب بنتهى عند محطة قطار محرم بيه وبتمشى فى مواسير تحت الارض لحد وابور المياه اللى فى غيط الصعيدى ومنه لمحطة المياه اللى قدام الاوليمبى والترعة دى العذبة بتخرج من ترعة الخندق اللى طالعة من الرياح البحيرى اللى طالع من النيل واللى ما يعرفهاش هافكره بيها هى الترعة اللى بتمشى جنب نادى اكاسيا والحديقة الدولية من ورا وبتعدى تحت الطريق الدائرى

+100000000