الموضوع: تجربة تويوتا ياريس

المشاركة الأصلية كتبت بواسطة معاذ الشرباصى

بص يا باشا
العربية مع ابن خالتى من شهر 7/2006 و انا سقتها تقريبا لمدة 3 شهور بتوع الاجازة كلهم دا غير بعد كده, و سافرنا بيها فجربتها فى ظروف كتيرة

اولا هى 1300 مانيوال, ب 2 ايرباج, تكييف, باور و كاسيت بس
مفيش زجاج كهرباء او سنتر لوك

المميزات
1- احسن ميزة فيها الموتور, بسم الله ما شاء الله قوى جدا و استهلاكها للبنزين مش عالى سواء بالتكييف او بدون
لما تشغل التكييف مبيأسرش اوى على العربية. و كمان السحب بتاعه ممتاز

2- التابلوه مبتكر و كويس, فى العدادات ديجيتال بالنسبة للبنزين و الحرارة و بقيت الحاجات, و مكانه مش صعب لكن تاخد وقت علشان تتعود عليه

3- مساحتها من جوة حلوة, و الشنطة نفس الكلام

4- شكلها مميز طبعا

5- سرعنها القصوى 170 كم/ساعة ( و كنا راكبين 6 افراد كبار و 2 صغييريين فى طريق سفر) اكيد ممكن تجيب اكتر لو الحمل اقل

6- العربية عالية, فالميزة هنا لو حملتها جامد مبتخبطش فى مطب او كده

7- العربية ناعمة جدا, و سمعت حد بيقول ان الباور بتاعها كهرباء بس مش متأكد من المعلومة دى. بس انا سقتها و سقت اللانسر بعدها على طول, الياريس انعم.

8- العفشة بتاعتها ناعمة, لكن مش نفس نعومة الكورولا

العييوب:
1- اكبر عيب الثبات, وحش فعلا, و دى ظهرت اوى لما كنت سايقها لوحدى من غير اى حمل فيها, و السرعة مكنتش عالية

2- التقفيل بتاعها مقبول, و الخامات المستخدمة كان ممكن تكون احسن من كده ( الجلدة بتاعت الشنطة فكت من اول اسبوع و بقينا نعدلها بإيدينا, و فى التوكيل قالوا ملهاش حل)

3- العربية مكعبرة حبتين, ف السواق بيواجه صعوبة انه بحفظ ابعادها, و فىها بؤر كتير تتخبط فيها لأنها بارزة زيادة

4- الفيبر المسنخدم فى الكصدام الامامى و الخلفى ضعيف( اتخبطت من ورا بسيط ف الاكصدام اتكسر)

5- حكاية انك لازم تدوس على الدبرياج عشان تشغل العربية وحشة. و كمان دواسة الدبرياج صغيرة اوى فى التحكم فيها مش سهل عشان كده بتفصل من الواحد كذا مرة ( حصلت مع كل اللى ساقها بلا استثناء)

6- عدم وجود سنتر لوك غبى جدا لأن المسوجر بتاعها مش صباع بيطلع و ينزل, فكتير اوى ينسى اى باب مفتوح.
و فى التوكيل قال لنا مش هركب سنتر علشان وجع الدماغ ( لو ركبت سنتر على عربية مش سنتر مشاكله كتير, ده اللى قاله)

غير كل الحاجات دى, ابن خالتى عمل بيها حادثة شهر يناير اللى فات, هو خبط بيجو 405 من ورا, هو عربيته اتبهدلت و البيجو تقريبا محصلش حاجة (يعنى الخامات المستخدمة فيها ضعيفة) غير كده ال Airbags مطلعوش و بتاع التوكيل يقوله بيطلعوا لو الحادثة وصلت للموتور (و الحادثة اللى هو عمالها خدشت الموتور :o , و مفيش حاجة طلعت)

الخدمة فى وكيل تويوتا جيدة جدا, ده غير ان الضمان 100 الف او 3 سنين

الخلاصة العربية جيدة, لكن مش ممتازة, تحسين لعيوب كتير ظهرت فى الموديل السابق بتاعها اللى هو الايكو, و لكن لسه فى شوية تحفظات او حاجات ممكن تبقى احسن

اى سؤال عنها انا تحت امرك

انا محمد عبد المنعم من المعادى عندى يارس 2008 اوتوماتيك كاملة abs و spoiler و2 ايرباج وسنتر لوك

اولا من وجهة نظرى الشخصية عربية ممتازة وده عشان :

1- موتورها قوى جدآ مع انه 1300 وصوته ناعم وواطى

2- قعدتها من جوه كسواق مرتاح فيها جدآ جدآ وكاشف كل الطريق اللى ادامى وبالنسبة للى قاعد جنبى كذلك والشنطة كويسة اووى اووى

3- فراملها ممتازة معايا ولو بجري بيها واكبس فرامل العربية بتفضل فى نفس حارتها لا يمين ولا شمال وده عشان ال abs اللى فيها كويس جدآ

4- ثابتة معايا ثبات رهيب انا كنت بشد بيها على الصحراوى 160 - 170 -180 والعربية تقيلة على الارض وده هيفرق معاك فى الكاوتش انا مركب عندى كاوتش firestone 15-60\185
فى اليوم ده وصلت من بوابة اسكندرية لحد الشيخ زايد فى ساعة وربع

5- استهلاكها فى البنزين ممتاز جدآ سافرت بيها من القاهرة للغردقة كنت مفولها على الاخر وصلت قبل الغردقة ب 80 كيلو لاقيتها حطت 23 ليتر بس مع العلم انا كنت ماشى 180-190 على الطريق ووصلت الغردقة فى 3 ساعات ونص مع العلم انى ريحت ربع ساعة فى بورتو السخنة اشرب قهوة

6- عفشتها كويسة ساعات فى الحفر بتسمع رزع بس هيا كده بس العفشة بتستحمل البلاوى اللى فى شوارع مصر والعفشة بتاعتها بتعيش معاك

7-بالنسبة للحرارة سافرت بيها الغردقة مرة فى عز الصيف شهر 6 سافرت الظهر وكنت مشغل التكييف ومريحتش بيها خالص من القاهرة للغردقة من غير ما تشتكى من حاجة لدرجة انى كنت مطلع السى دى من الكاسيت مولع نار ومع ذلك هيا ماشية زى الفل

8- الباورستيرنج ممتاز جدآ مع انه الكترونى بيحسسك بمتعة القيادة حتى لما اجى اركن العربية بحس بمتعة فى لف الدركسيون وفى السرعات العالية بيتقل معاك وثابت مفيهوش رعشة وده برضه راجع لنضافة الكاوتش اللى انت مركبه

9- التابلوه تصمميمه من وجهة نطرى انا حلو اووى مع ان فى ناس كتير مش بتحب نوعية التابلوه ده اللى عداداته فى النص هوا ممكن يكون ميزة ليا انا لانى ساعات بلمح بطرف عينى كل حاجة فى التابلوه سواء السرعة او Rpm او البنزين وخصوصآ انه ديجيتال زى بطارية الموبايل الساعة الكيلومتر والتابلوه بيتميز انه فيه مكان للماجات والاكواب لو حبيت تشرب حاجة وانت رايح الشغل او مسافر

10- بالنسبة للاكصدام الامامى انا شايفه كويس مش وحش خالص بالعكس ده مرن انا مرة خبطت واحدة كنت ماشى 40 فى شارع النادى الاهلى مدينة نصر وقفت ادامى مرة واحدة انا قولت هنزل الاقى الاكصدام متدمر نزلت ملاقيتش اى حاجة وهيا بتتخبط دخلت فى عربية جيب بوظتلها الكبوت

من وجهة نظرى فى 2 عيب موجودين فيها وهما

1- مفيهاش عداد حرارة هيا فيها كلمتين بس Cool و Heat

2- الكنبة اللى ورا مش واسعة

بعض الملاحظات اللى ممكن افيدكم بيها

1- تركب التيل الاصلى ومتسترخصش فى التيل ولا الطنابير

2- كاوتش نضيف واللى هوا Firestone 15-60\185 وده تغيره فى توكيل بريدجستون اللى هوا Fit&Fix الفردة الواحدة ب 700 جنيه بس ممتازة ويفضل تحط نيتروجين على طول مش الهوا العادى لان النيتروجين بيحتفظ بنفسه كتير فى المدة عن الهوا العادى

3-زيت موبيل 10000 ممتاز مع فلتز الزيت الاصلى وفلتر الهواء الاصلى بردو اداء المحرك هيكون معاك زى الفل ويستحسن كمان تحط كل مرة واحدة كل 8 شهور موتور فلاش هينضف الموتور من جوه ويشيل الرواسب وده مش غالى ب 45 جنيه تقريبآ وهتلاحظ كل الكلام ده فى السفر

لو سمحتو يا جدعان عندى مشكلة فى عربيتى اليارس هى 2007 اوتوماتيك

فجاة وانا ماشى لاقيت العربية بطلت ومفيش نور خالص للمبات التابلوه ومؤشر السرعة والار بى ام منزلوش على الصفر فضلو زى مااكون لسة ماشى باخر سرعة ليا قبل ما العربية تقف
احاول ادور العربية مفيش خالص ولا عارف ادى انتظار ولا اشارة ولا اى حاحة

وشوية شوية لقيت نور لمبات التابلوه بيرجع ضعيف وبيشتد

طلعت برة العربية ورجعت بعد دقيقة لقيت انوار التابلوة رجعت ومؤشرات السرعة والار بى ام رجعت تانى للصفر

دورة العربية ومشيت

روحت للكهربائى قاللى البطارية كويسة بعد ما كشف عليها
بس ما عرفش سبب العيب دة ايه

ارجو الافادة

عندى مشكلة ومش عارفه اعمل فيها ايه او اروح لمين فى قراءة البنزين بيبان ان المؤشر فى المنتصف وفى حقيقة الامر العربية اخدت 35 لتر بنزين والمعروف ان سعة التانك 42 لتر ا كدا المشكلة تبقى فين ...........ارجو سرعة الافاده
my car is yaris 1300cc model 2009 والعداد عامل 30000فقط تاني مشكله الكاسيت عندى فصل خالص ومش بيشتغل مين كويس فى التصليح ممكن رد

العوامة لازم تتغير .. بتبوظ من الركنة.

الكاسيت غالبا فيوز عايز يتغير و دا اي كهربائي يعمله في ثانية

العربية ممتازة ماشاء الله وعن تجربة......ربنا يحفظها لكل من يملكها ويباركله فيه ويكفيه شرها ان شاء الله