السلام عليكم
يا ريت ياجماعة أى حد عنه تويوتا ياريس يقولنا عن تجربته فى السيارة دى سواء المميزات أو العيوب
عرض للطباعة
السلام عليكم
يا ريت ياجماعة أى حد عنه تويوتا ياريس يقولنا عن تجربته فى السيارة دى سواء المميزات أو العيوب
بص يا باشا
العربية مع ابن خالتى من شهر 7/2006 و انا سقتها تقريبا لمدة 3 شهور بتوع الاجازة كلهم دا غير بعد كده, و سافرنا بيها فجربتها فى ظروف كتيرة
اولا هى 1300 مانيوال, ب 2 ايرباج, تكييف, باور و كاسيت بس
مفيش زجاج كهرباء او سنتر لوك
المميزات
1- احسن ميزة فيها الموتور, بسم الله ما شاء الله قوى جدا و استهلاكها للبنزين مش عالى سواء بالتكييف او بدون
لما تشغل التكييف مبيأسرش اوى على العربية. و كمان السحب بتاعه ممتاز
2- التابلوه مبتكر و كويس, فى العدادات ديجيتال بالنسبة للبنزين و الحرارة و بقيت الحاجات, و مكانه مش صعب لكن تاخد وقت علشان تتعود عليه
3- مساحتها من جوة حلوة, و الشنطة نفس الكلام
4- شكلها مميز طبعا
5- سرعنها القصوى 170 كم/ساعة ( و كنا راكبين 6 افراد كبار و 2 صغييريين فى طريق سفر) اكيد ممكن تجيب اكتر لو الحمل اقل
6- العربية عالية, فالميزة هنا لو حملتها جامد مبتخبطش فى مطب او كده
7- العربية ناعمة جدا, و سمعت حد بيقول ان الباور بتاعها كهرباء بس مش متأكد من المعلومة دى. بس انا سقتها و سقت اللانسر بعدها على طول, الياريس انعم.
8- العفشة بتاعتها ناعمة, لكن مش نفس نعومة الكورولا
العييوب:
1- اكبر عيب الثبات, وحش فعلا, و دى ظهرت اوى لما كنت سايقها لوحدى من غير اى حمل فيها, و السرعة مكنتش عالية
2- التقفيل بتاعها مقبول, و الخامات المستخدمة كان ممكن تكون احسن من كده ( الجلدة بتاعت الشنطة فكت من اول اسبوع و بقينا نعدلها بإيدينا, و فى التوكيل قالوا ملهاش حل)
3- العربية مكعبرة حبتين, ف السواق بيواجه صعوبة انه بحفظ ابعادها, و فىها بؤر كتير تتخبط فيها لأنها بارزة زيادة
4- الفيبر المسنخدم فى الكصدام الامامى و الخلفى ضعيف( اتخبطت من ورا بسيط ف الاكصدام اتكسر)
5- حكاية انك لازم تدوس على الدبرياج عشان تشغل العربية وحشة. و كمان دواسة الدبرياج صغيرة اوى فى التحكم فيها مش سهل عشان كده بتفصل من الواحد كذا مرة ( حصلت مع كل اللى ساقها بلا استثناء)
6- عدم وجود سنتر لوك غبى جدا لأن المسوجر بتاعها مش صباع بيطلع و ينزل, فكتير اوى ينسى اى باب مفتوح.
و فى التوكيل قال لنا مش هركب سنتر علشان وجع الدماغ ( لو ركبت سنتر على عربية مش سنتر مشاكله كتير, ده اللى قاله)
غير كل الحاجات دى, ابن خالتى عمل بيها حادثة شهر يناير اللى فات, هو خبط بيجو 405 من ورا, هو عربيته اتبهدلت و البيجو تقريبا محصلش حاجة (يعنى الخامات المستخدمة فيها ضعيفة) غير كده ال Airbags مطلعوش و بتاع التوكيل يقوله بيطلعوا لو الحادثة وصلت للموتور (و الحادثة اللى هو عمالها خدشت الموتور :o , و مفيش حاجة طلعت)
الخدمة فى وكيل تويوتا جيدة جدا, ده غير ان الضمان 100 الف او 3 سنين
الخلاصة العربية جيدة, لكن مش ممتازة, تحسين لعيوب كتير ظهرت فى الموديل السابق بتاعها اللى هو الايكو, و لكن لسه فى شوية تحفظات او حاجات ممكن تبقى احسن
اى سؤال عنها انا تحت امرك
fe3lan ya man...
el kalaam kollo mazboot geddan.
ma3a wa7ed sa7bi w ba3d awel 2 monthes baaz ta2m el debreyag..ool de bete7sal
bas bardo 3amal 7adsa 3alashan mawdoo3 enno mesh shayef 7aga men el kabsoola elly a3ed feha de ....zawayaha sa73ba geddan :x
بس على فكره الموديل الجديد 2007 فيه سنتر وريموت وكل الكلام ده وجنوط 15 كمان
احب اتفق مع معاذ في تقييمه , بس مع وجود بعض الملاحظات:
1-الاكصدام الامامى و الخلفى زي معظم الموديلات الجديده واللي لسه هاتظهر الكام سنه الجايين مصنوع من الفيبر وده محتاج حرص في السواقه.
2-ابعاد العربيه محتاجه تعود , فعلا أول ماتركبها تحس بأختلاف عن أي عربيه عاديه ,القوائم الاماميه عريضه وعلي قد ما ده جيد من حيث السلامه بس بيسبب وجود نقطه عمياء في منطقه القائم الأمامي الأيمن بالذات, ده غير وجود العدادات في النص , كل ده محتاج اسبوع ولا 2 عشان تتعود عليها.
3-الخامات الداخليه جيده لكن أقل فخامه من الكورولا "فرق سعر طبيعي" - أعرف 3 غيري معاهم العربيه ومحدش اشتكي من فك جلده أو اي عيوب في الخامات
4-عدم وجود مقب في منتصف الكنبه الخلفيه بيدي مساحه لجلوس 3 افراد مسترحين
5-ثبات العربيه ماشاء الله ممتاز وافضل من الكورولا بس أكيد اقل من الاوكتافيا و الأوبل , جربتها علي طرق كتيره "شرم الشيخ-الغردقه-العين السخنه" بسرعه 170 كم بوجود راكب واحد معايا علي وقت طويل نسبيا والحمد لله الثبات ممتاز
6-الشنطه طبعا أصغر من الكورولا
7-التكييف مش بيأثر علي الموتور بالرغم من انها 1300 بس و أوتوماتيك - ميزه صعب تلاقيها غير في التويوتا و الديهاتسو
8-ناعمه في السواقه و الباور بتاعها كهرباء , ABS + EBD بينفعو فعلا في بعض المواقف.
على فكرة يا ابو عبد الله العربية بتاعت ابن خالتى راكب فيها جنوط 15"
و ده احد اسباب ان العفشة مش ناعمة اوى, لأن السمك بتاع الكاوتش قل
اما بالنسبة للثبات, العربية مش ممتازة, و مش سايحة على بعضها, تقدر تديها 6.5-7/10 فى الثبات بس مش اكتر من كده
لأن اكيد فى عربيات احسن منها كتير فى النقطة دى
اما السرعة القصوى اللى جابها ابن خالتى على المنيب فكانت 185 كم/ساعة حتى الان, يبقى حتى اشعار اخى العربية بتجيب 185 :lol:
السلام عليكم :
]انا معايا ياريس من حوالي 10 شهور وعملت بيها تقريبا 18000 ك ودى بعض الملاحظات
1_ المميزات
الباور بتاعها رائع
الموتور قوي جدا و تسارع ممتاز بالنسبة لعربية 1300
التكييف قوي ولايؤثر على الموتور
المقصورة واسعة (يسمونها فى اوروبا Big Small
استهلاك وقود منخفض (عند سرعة 90 تستهلك 20 لتر لكل 320 كم وداخل المدينة تقريبا 20 لتر لكل 260 )
بالنسبه للثبات (بصراحة ابهرنى على الرغم من ارتفاعها -جبت بيها سرعة 187 علي الطريق الدولى- لحد 140 ثبات ممتاز جداا)
العيوب
الأكصدام بتاعها يحتاج الى حرص في القيادة
دواسة الدبرياش تأخذ وقت للتعود عليها
اعتقد ان السيارة تستحق اكثر من سعرها الحالى
اقتباس:
المشاركة الأصلية كتبت بواسطة tamohsen
اقتباس:
المشاركة الأصلية كتبت بواسطة tamohsen
النقطه دي مهمه جدا لاني مره شوفت في أشاره عربيه ريحت بس على الياريس الوش بتعها اتشرخ شرخ طولي
يعين الراجل محتاج يغير الوش كله بالكامل لأنه متصل ببعضه
بسم الله
انا عندي يارس و عامل بيها 17000 و اشهد ان العربية في المجمل ممتازة و انا اتفق مع معاذ على معظم النقاط و لكن اختلف في التالي :
1الاتزان بتاع العربية 8 من 10 و اكتر في حالة الجناح و الجنوط
2العربية عالية و دي ميزة مهمه جدا خاصة في مصر
3الاكصدام الامامي و الخلفي فيبر ضعيف لكن هو مشابه لعربيات كتير مثلا هوندا سيفيك الجديدة اكبر مثال
4معدلات الامان عالية ( في المانول من غير ABS) مثل اكياس الهواء و البعد بين السائق و التابلوه و الزجاج و صدر الحديد الأمامي و انا عملت حادثة بالعربية و صدمت عربية بيجو 405 و كلنا عرفين قوة الصاج فيها و هي كانت واقفة و انا علي سرعة 70 و مش لابس الحزام الي حصل اني الحمد لله طلعت سليم من غير حتى خدش (الحمد لله) و الصدر الحديد انعوج للأعلى بحيث انه حمى المحرك و التوكيل قال ان السبب هو تصميم صدر الحديد
5العربية سعرها عالي جدا و دي سياسة تويوتا إلي بترفع من سعر عربيتها مقابل فئاتها
6التوكيل طبعا الأفضل و خدمة ما بعد البيع ممتازة و توافر التوكيلات المعتمدة إلي بتعوض زحمة مركز أبو الرواش
7 long live إلي بيميز التويوتا بشكل عام
8 التسارع ممتاز و المحرك ممتاز و انا بتفق مع معاذ في النقطة دي
9 الشكل النسابي المميز للعربية لكن ده بيخلي سوقتها صعبة جدا و بتحتاج تعود و كل خبطة بأثر على الشكل جدا و انا اري ان النقطة دي راحت على مصمم العربية
10 ان الوزن الزيادة في العربية بيخليها تاخذ المطبات بشكل سئ لو السرعة زيادة سنة صغيرة ده بسبب ان العربية عالية و التصميم ذي الزفت للمطبات في مصر ( مطبات عالية و كمان مش عريضة ) لكن ده يفضل أفضل من عربية ذي نيسان صني إلي كل مطب بيرفع ضغطي و بيخبط في الشاسية
دي اهم النقط الي بشوفها في العربية لكن كما قلت العربية ممتازة بشكل عام و الدليل على كده نجتحها الكبير في مصر و في الخليج