عرض للطباعة
طبعا يا جماعة كلنا بنجيب التيل الأصلى من التوكيل ب 350 + 40 كلبسات + 40 تركيب = 430 + 10% ضريبة = 473
طبعا كتييييييييير جدا على تيل متوسط عمره 20 ألف
نيجى للمهم ..
التيل الأصلى من الوكيل فى السعودية ب 250 جنيه وأكيد طبعا كسبان " بس من غير كلبسات " ..
طب السؤال بقى ..
الوكيل المصرى بيكسب كام فى التيل ... وليه رافع السعر أوى كده ؟؟
بصراحة حاجة تعقد
دى صور التيل يا جماعة
http://www.postimage.org/aVrGUQi.jpg
http://www.postimage.org/PqrgTV0.jpg
http://www.postimage.org/PqrgYUi.jpg
اسمح لي أرد على حضرتك بما اني شغال في التوكيل (شركة مصرية) وعارف الموضوع ده بالتفصيل :
- تيل الفرامل 3 أنواع كلها أصلية ومن اليابان ومن حوالي سنة كان التلاته موجودين عندنا في التوكيل في مصر والآن فيه 2 بس
- الأول : هو اللي حضرتك عارض صورته ورقمه هو MZ690185 وسعر بيعه من على الكمبيوتر عندي هو 242 جنيه + 10 %
تاريخ آخر بيع له هو 4-2-2008 وبطلنا نجيبه نظرا لأن عملاء كتير كانوا بيشتكوا منه مر الشكوى وبيصفر وسيء
- الثاني : رقمه MN116604 وده هو اللي بينزل مع العربية ومش عاوز أقول كلمه أصلي لأن التلاته أصلي ومن شركة ميتسوبيشي
طبعا ده ممتاز لكن عيبه انه طري ولذلك عمره قصير (20 ألف كيلو كما تفضلت)
- الثالث : ورقمه MN102878 وده انشف شويه من الثاني ولذلك بيعيش اطول (حوالي 40 ألف) وهو ما يتم تركيبه بكثرة لدينا بالتوكيل عند تغيير التيل
سعر الثاني =سعرالثالث = 385 جنيه شامل الكلبسات + 10%
التلاته موجودين في اليابان يعني الوكيل هو اللي بيحدد عاوز يشتري مين فيهم
احنا في مصر كوكيل بنشتري الثالث بكمية كبيرة والثاني بكمية أقل وبطلنا نجيب الأول نهائي
ممكن لو دورت هنا في المنتدى هتلاقي مواضيع قديمة عن تركيب تيل فرامل في التوكيل وعميل بيقول انا ركبت الأصلي بـ 200 جنيه وعميل تاني بيقول انا ركبت الأصلي بـ 320 جنيه (دي اسعار التيل الأول والثالث وقتها) ومستغربين ازاي التوكيل بيركب بسعرين وطبعا دي احد الأسباب اللي خلتنا نبطل نجيب الأول نهائي
أرجو تكون الصورة وضحت
أولا تحياتى لحضرتك وعلى مجهودك الفوق ممتاز " والله حضرتك السبب فى انى أفضل محتفظ بالعربية "
طبعا أكيد كلامك مضبوط عشان التيل التانى اللى أعتقد هو sumitomo بيخلص بسرعة وبيصفر على عكس التيل التالت AK اللى مش بيخلص ولا بيصفر ..
طيب دلوقتى ال 3 أنواع بيتصنعوا من نفس الشركة ولا كل نوع فى شركة معينة ؟
لو أفترضنا ال 3 من شركة واحدة يبقى ممكن دة سبب كلمة value selection اللى مكتوبة على العلبة .. و الشركة عارفة ترتيب المنتج من الأفضل للأسوء وبالتالى النوع الأول يبقى كده أسوءهم عشان هو أرخصهم سعرا
ولو أفترضنا ان كل نوع من شركة مختلفة .. يبقى المفروض النوع الأول شركة ميتسوبيشى ترفضه وبكده ميفضلش غير نوعين .
ايه بقى سبب ان النوع الأول بيتم انتاجه ؟ وليه الوكيل السعودى بيجيبه ؟؟ هل استرخاص أم جهل بمستوى المنتج ؟
و يا ترى هل له تأثير على الطنابير ؟ عشان انا شارى طنابير جديدة وحبقى اركبها بعد ما التيل الحالى يخلص AK .. فا لو ليه تأثير سلبى يبقى كده أركبه على الطنابير القديمة أحسن .
وفعلا AK أحسن من sumitomo بمليون مرة عشان sumitomo انا مغيره على ال 19000 مع العلم ان أغلبهم كانوا سفر .. على عكس ال AK انا داخل على 44000 ولسه مخلص ولا بيصفر رغم أغلبهم كانوا وسط البلد
أعتقد المفروض تجيبوا AK وبس طالما الأتنين نفس السعر
بس نسيت أقول ان ال AK انا مركبه على ال 23500 عشان كنت مسافر الفجر وال sumitomo أفش على الطنابير فا دورت فى المحلات مكنش فيه الأصلى والتوكيل كان قفل .. يعنى عمره دلوقتى 20500 ولما أغيره حبقى أكتب هو وعمل كام كم
معلش انا حتعب حضرتك دا الكود بتاع الطنابير .. هل هو دا اللى فى الوكيل فى مصر ولا برده نوع تانى .. و سعره كام ؟
http://www.postimage.org/PqsMXO0.jpg
لأ مظبوط هو ده الموجود في التوكيل وسعره 440 ج + 10%
فعلا يوجد نوعين مت التيل فى التوكيل الSUMITOMO وده اللى رقمه 116604 وده فابريقة العربيه اللى بتنزل بيه من المصنع و الثانى AK ورقمه 102878 وده شركه متسوبيشى هى اللى بتبعته كبديل لل SUMITOMO ولذلك يعتبر أصلى برده وأنا جربتهم الأتنين و عاوز أقولكم خبرتى معاهم مع العلم انى بردو جربت كذا نوع من اللى فى السوق و توصلت لنتيجه مؤكده لا جدال فيها و هى ان عربيتى متنكشفش على تيل غريب غير الSUMITOMO أو الAK حتى لو ب500 جنيه كمان لأن أنا بالذات دونا عن أى حد تانى باجرى و بافترى على الفرامل جامد جدا و على سرعات عاليه جدا (يعنى مثلا ممكن ساعات أحتاج أوقف العربيه من سرعه 140 كم/س حتى السكون) فصباح الخدمه الشاقه للتيل وكمان لما الABS بيشتغل بيبقه عبء أكبر على التيل و بيبقه طحن عليه............ الخلاصه بقه عاوز أقولكم خبرتى مع النوعين الأصلى مع الأخذ فى الاعتبار انى شخص بيستخدم الفرامل بشكل مرهق ليها.................
1-الSUMITOMO والAK كفاءة فرملتهم واحده بالضبط حتى فى أصعب الظروف و السخونيه و السرعات العاليه و كمان من حيث موضوع التصفير اللى الناس بتشتكى منه ده.....هم الأتنين مش بيصفروا خالص و لكن الSUMITOMO ممكن يصفر خفيف جدا بجد لما بيكون خلصان بنسبه 75% مثلا وهذا لا يمثل أى مشكله أو ازعاج و ما بسمعهوش إلا لو فى مكان هادى و الدنيا هسسسسسس وعلى فكره كمان هم الأتنين بيحافظوا على سطح الطنبوره من الريج (خطوط دائريه بارزه على الطنبوره و عدم انتظتم سطحها)..... ده غير انهم بنفس السعر.
2-نيجى بقه للفرق الجوهرى بينهم و أعتقد هو ده السبب اللى بيخلى شركه متسوبيشى بتنزل العربيه بالتيل الSUMITOMO .............وهو ان التيل الAK بعض فتره من تركيبه بيعمل عالى وواطى فى الطنبوره(ليست ريجه) بمعنى انك لما تدوس على الفرامل و انت على سرعه عاليه تلاقى الدركسيون بيغربل فى ايدك و ساعات لما بتزيد شويه الدركسيون بيغربل من غير ما تدوس على الفرامل كمان و تقعد تحتار ما بين الزوايا و الترصيص و الكاوتش و السبب الحقيقى هو الطنابير و عشان كده فى التوكيل بيخرطوا الطنابير قبل كل مره بيركبوا فيها تيل جديد (وده توصيه شركه متسوبيشى ليهم) و لكن لو التيل اللى راكب SUMITOMO الطنبوره هتفضل زى ما هيه لآخر ملى فى التيل و ممكن تركب التيل اللى بعده من غير ما تحتاج تخرط الطنبوره و عمر ما عيب الغربله ده هيظهر مع الSUMITOMO و تفسير ده ان الAK ناشف على الطنبوره شويه مقابل انه يعيش عمر أطول و عن تجربه فعلا الSUMITOMO بيخلص بسرعه جدا لدرجه انك ممكن تغير التيل 3 مرات SUMITOMO مقابل مره واحده AK والكلام ده عن تجربه بس لو حسبتها من وجهه ان الSUMITOMO بيحافظ على الطنبوره و ان الطنابير ب1000 جنيه تقريبا و لازم هتتغير بعد عدد معين من الخرطات الى جانب التخلص من عيب رعشه الدركسيون مع الفرمله اللى بيحصل يبقه الSUMITOMO فابريقه العربيه يكسب
وكل واحد دلوقتى عارف ميزه و عيب كل واحد فيهم عن تجربه و حر فى اختياره و انا عن نفسى بجيب الSUMITOMO من ساعت ما غيرت الطنبوره بواحده جديده و يوم ما مش هلاقى الSUMITOMO فى التوكيل هجيب الAK بس مش هركبه على الطنابير الجديده الشغاله مع الSUMITOMO وهركبه على القدام و أبقه أخرطها مش مشكله مع ان العيب هيرجع تانى!!!!!!!!!!!!!
الخلاصه بقه و ده نقدى لشركه متسوبيشى انها المفروض تنزل العربيه بالتيل الAK لأنه أقوى و عمره أطول ولكن لازم أيضا تغير الطنبوره بواحده تانيه الGrade بتاعها أعلى عشان تستحمل التيل من غير ما يحصل فيها عالى و واطى.
موضوع جميل جدا بس انا رأيي يا بشمهندس محمدواي انك كنت جبت طنابير brembo بنفس سعر الطنابير الأصلية و ريحت دماغك لإن عيب فرامل اللانسر في الطنابير الضعيفة مش التيل
انت متأكد ان طنابير Brembo حتحسن أداء الفرامل ؟؟اقتباس:
طنابير brembo بنفس سعر الطنابير الأصلية و ريحت دماغك لإن عيب فرامل اللانسر في الطنابير الضعيفة مش التيل
لو كده انا ممكن أبيع اللى عندى وأشتريهم , بس بيتباعوا فين ؟
اقتباس:
المشاركة الأصلية كتبت بواسطة nobody
كلامك مضبوط 100% و انا فى موضوعى وضحت ان المشكله الأساسيه هى ان المفروض طنابير الانسر تكون Grade أعلى من كده و استخدام التيل الAK معاها و على فكره انا فكرت فعلا انى أشوف طنابير غير الأصليه تكون أفضل منها بس مشكلتى كانت انى مش عارف ايه هى الطنبوره البديله اللى فعلا ممكن تكون أفضل من الأصليه و هل هى مضمونه و لا لأ و محتاج حد يكون عاش نفس مشكلتى و جرب طنابير تانيه و يقولى نتيجه التجربه عشان ما أرميش فلوسى فى حاجه على أساس انها أفضل و تطلع أوحش فأزعل ففضلت أجيب الطنبوره الأصليه و أركبلها التيل اللى انا عارف انه مش هيبوظها ولكن لو حد جرب الطنابير ده فعلا و حس بالفرق يقوللى و يقولنا جابها منين و سعرها كام بالضبط.(لأن فعلا التيل الSUMITOMO بيخلص بسرعه جدا بطريقه تضايق رغم أداؤه الجميل و نفسى أركب الAK بس بجد ما ينفعش مع الطنبوره اللى بتنزل مع العربيه ده خالص)
اكيد ال Brembo أحسن مية مرة كفاية انها بتنزل لللإيفو
في حضرتك واحد في التوفيقية متخصص في البريمبو فقط
ودي صورة الديسكات http://www.buybrakes.com/2/brembo-oem.jpg
ودي صورة الكاليبرhttp://www.v6lancer.com/images/brakes/brembo4.jpg
سعر الديسكات حوالي 600 جنيه
اما الكاليبرز معرفش بيتباعوا ولا لأ؟
" يعنى ايه الكاليبرز " ؟اقتباس:
ودي صورة الكاليبرز
هل صاحب المحل بيكون عارف ايه الديسك ال brembo اللى بيتوافق مع ديسكات العربية .. يعنى بيكون مكتوب على العلبة مثلا .. ولا فى احتمال انه ميكونش موجود ؟
يا ريت بقى اسم المحل أو رقم تليفون
وسؤال غلس معلش " التوفيقية " يتراحلها ازاى أصلا عشان انا من اسكندرية ومعرفش أى طرق فى القاهرة غير المريوطية وكوبرى المنيب والأوتوستيراد
شكرا للمعلومات القيمه بس هل حضرتك جربتهم بنفسك و لا لسه (لأن البريمبو على عينى و راسى بس التجربه بردو مهمه لأن الحاجات المضروبه متوفره فى مصر الله ينور) و هل ال600 جنيه دول تمن الأتنين و لا تمن طنبوره واحده؟اقتباس:
المشاركة الأصلية كتبت بواسطة nobody
موضوع جميل ومعلومات قيمة
متابع بإهتمام :)
[QUOTE=مصراوي جدا;746247]اسمح لي أرد على حضرتك بما اني شغال في التوكيل (شركة مصرية) وعارف الموضوع ده بالتفصيل :
الله ينور يا بشمهندس معلومات صعب الواحد يلاقيها غير من واحد شغال جوه