وإنعدم الاحساس بالمسئولية وتقدير الأخرين عليه العوض
انا شغلى في ميدان لبنان وطبعا من المعروف مشكلة الركن فى المهندسين كلها المهم انا بركن العربية بتاعتى مثلا بعيد عن الشركة اللى بشتغل فيها ببتاع 200 متر مثلا ولا حاجة كده وده لأنى بروح بدري كمان ، اللى حصل امبارح وضايقنى وخلانى اكتب هنا النهارده علشان احكى ليكم عليه انى وانا رايح اخد العربية لقيت واحدة ست راكبة عربية هيونداى اكسيل اقل ما يقال عن العربية انها مدمرة مفيهاش باب سليم الاكصدامات معضعضة وده مؤشر أولى عن مهارة المدام فى القيادة ، المدام لقت عربيتها مزنوقة بين عربيتين لكن ممكن تطلع منهم يعنى مش مشكلة وانا واقف المدام ما شاء الله خرجت من بين العربيتين على مرات متعددة تطلع سنة لأودام وبعدين تجيب الدركسيون على الأخر وترجع لورا وهكذا لكن انتم عارفين كل مرة كانت بتطلع فيها لاودام او ترجع لورا مكانتش بتقف غير لما تخبط العربيتين التانيين برغم تحذيرات الناس اللى فى الشارع ليها لكنها مش بتقف غير لما تسمع خبطة اكصدام عربيتها فى العربيات التانية وفى الاخر خرجت المنظر ضايقنى واتضايقت اكتر بعد ما هى خرجت وهى شكلها كده من النوع الرخم المتعالى ان العربيتين التانيين اللى كانوا بيترممطوا عربيات جديدة 2007 واحدة منهم اوبترا 2007 سودا وصاحبها اللى ركنها الصبح فى امان الله هيرجع يلاقى الإكصدام بتاعه اتحك والتانية هوندا سيتى شامبين ودى برده اخدت نصيبها وان كان الاوبترا خسائرها اكبر
عايز حد يجاوب عليا ليه مش بنخاف على عربيات بعض ليه مش بنخلى بالنا من بعض يا جماعة الدين والاخلاق والانسانية ضد اللى عملته المدام دى اللى انا هاكتفى انى اقول ربنا يجازيها على اللى عملته والأذى اللى أذته للناس
هانى مصطفى
