الموضوع: مسؤال في مشاكل الهاتشباك

أنا هأحاول أريحك على قد ما أقدر
بادىء ذى بدء...لا تقارن الميجان بالشاهين بتاتا
دى كانت بحاجة و خمسين ألف و دى بخمسين فوق ال 100 ألف....
ما تزعلش منى هى مش تعالى و لا حاجة...
أنا كان معايا بولونيز قبل الميجان....و كنت زيك كده برضه مش بيهمنى..
و الله العظيم أنا كنت بأتخانق بيها كأنها سلاح مثلا و كان مش بيهمنى لو اتخبطت و لا اتكسر فيها حاجة أثناء المعركة...ليه...لإن زى ما انت بتقول ترجع زيرو ب 11 جنيه...
إنما الميجان يا روحى رفرفها ب 1500 جنيه و اكصدامها ب 3500 جنيه باين و إلخ...
فأصبحت كائن متحضر و بأستعمل الإشارات و بأسيب كل الناس تعدى و أهم حاجة إنى ما أشوفش ولا حتى خدش صغير فيها

فلازم تكون فاهم إنت هتصرف على إيه و مش معنى إن ثمنها فى جيبك يبقى تجيبها..لازم تكون قادر على مصاريفها...و مش بالضرورة يعنى إن لو حصل فيها حاجة تجرى على التوكيل...الحرفيين فيها حاجات ليها استيراد ...لكن ما يخص الموتور و الكهرباء و الاكترونيات ضرورى أوى التوكيل لإن الناس بره مالهاش تدريب عليها و لا خبرة فيها

صاحبك أكيد بيفتى...العربية دى قبل ما تبوظ فيها حاجة بتقولك و بتبعث بتحذيرات صوتية و ضوئية كمان...
إنت عارف إن لو الفتيس الأوتوماتيك علق و زرجن و مش راضى يتحرك ( عمرها ما حصلت مع حد مننا الحمد لله ) و لا حتى يتحرك على N علشان تعرف تقطرها...فى طريقة يدوية لتحريكه... الناس إللى عملوها فكروا فى كل أدق التفاصيل...و أكبر دليل على كده نظرة لداخل السيارة...
و لو هى معمول لها صياناتها فى مواعيدها زى الكتاب ما بيقول ...هتمشى معاك زى الساعة و لا عمرها هتخذلك و هتعيش و هتتبسطوا مع بعض
لكن لو إنت من النوع إللى عايز يريح دماغه و ما يفكرش يروح لورشة و لا يسأل على العربية إلا لما تبقى تبوظ و الطوبة تقع فى المعطوبة يبقى أحسن لك تشوف حاجة تانية ( اليابانى خير الحلول )

أحب أعرف بقى إيه هى المشاكل إللى فى السيدان تحديدا و إنت بتسأل إذا كانت موجودة فى الهاتشباك و لا لأ.....
راجل موضوع أعطال الميجان من مالكيها و إنت تعرف إن الحكاية أبسط ما يكون و إنها كلها شوية كلام فاضى ( كويل و بطارية و جنوط خفيفة شوية )...لكن مش مشاكل قاتلة و لا أساسية و كلها اتحلت تماما فى ما بعد 2005 ....ماعدا الجنوط ( الاسبور ) فهى لاتزال ضعيفة قليلا مقارنة بالجنوط إللى بتيجى فى العربيات الألمانى مثلا

أهم حاجة فى شراء العربية دى مستعملة إنك تختار واحدة حالتها كويسة و معمول لها صياناتها كاملة و بانتظام فى التوكيل أو أحد المراكز المعتمدة و يوجد List لتلك المراكز فى هذا الموضوع
http://www.nilemotors.net/Nile/showthread.php?t=1745

و أيضا لابد من الكشف على السيارة التى يقع اختيارك عليها فى التوكيل نفسه و ليس أحد المراكز المعتمدة حتى ....
بتكلمهم على 16202 و تحجز ميعاد و تروح تقضى النهار بطوله و تتدفع 550 جنيه و تأخذ تقرير مفصل بعد الكشف الشامل على كل مسمار فى العربية....
ال 550 جنيه و النهار إللى هتضيعه هما صمام الأمان للمبلغ الكبير المدفوع كثمن للعربية و راحة البال فيما بعد لو حصل نصيب و اشتريتها
و علشان ما أحبطكش...مش من السهل تلاقى عربية مستعملة على مزاجك...يا إما حالتها مش كويسة يا إما مش معمول لها صيانات مظبوطة يا إما مش متحافظ عليها و هى أصلا مش منتشرة أوى زى اللانسر مثلا..فالخيارات مش بتكون واسعة....لكن مش مستحيل برضه...الناس بتشتريها مستعملة و مبسوطة بس هو الموضوع عايز شوية صبر و دأب....
أى استفسارات ...إسأل ...الوحوش مش بيتأخروا على حد...

أقول ايه اخويا هانى خلص كل الكلام تسلم يا هانى

تربية الوحوش الكبار...

" إنما الميجان يا روحى رفرفها ب 1500 جنيه "

حبيب قلبي هاني الله يجازيك خير.....أنا قرأت الجملة دي ووقعت تحت المكتب من الضحك

شرح ممتاز ربنا يباركلك

هاهاها...الله يحفظك ....و سلامتك من الوقوع :-)