خبطة فى العفشة .. !!

**Ahmed Hamdy** · 31-03-2009 02:26 PM

سلام عليكم ..
عربيتى ماروتى .. بقالى فترة بحس بخبطة كده بتيجى من تحت رجلى - تحت الدواسات .. بيتيهألى من تحت الدبرياج بس مش متأكد .. مش بتحصل دايما .. لأ بتحصل لما بكون طالع بالعربية وخاصة لو طالع بالراحة خاصة لو مطلع أو مطب وكمان بالذات لو لافف الدركسيون شوية ... رحت لعفشجى قالى دى علبة الدركسيون محتاجة حشو .. مع إنى عملت الحكاية دى من كام شهر ..

مش عارف التشخيص ده صح ولا حاجة تانية ؟؟

**aYaBooY** · 31-03-2009 02:56 PM

روح ربط العفشة
و امشي يوم في شارع مدشدش و ركذ الخبطة الي بتعدي عليها بتسمع و تحرك الدركسيون جامد و لا لا
لو اه يبقي انت عندك مشكلة في عبة الدركسيون و ده غالبا عيب في الماروتي
دور عليها جديدة و حتى لو غالية هاتها جديدة او ممكن تنزل وسط البلد في شارع شمبليون تحشيها بس سيبك من الاستيراد
لو مفيش خبطة و حركة في الدركسيون يبقي انت بتتكلم على على جلب مقصات بس و ديه يا اما بتتغير الجلب يا اما زي ال 127 و 128 بيتغير المققص
و ممكن تروح لحد بتاع زوايا يرفع العربية و يقولك على الحاجات الي عاوزة تتغير و ده اسمه الكشف على العفشة

**Ahmed Hamdy** · 31-03-2009 03:07 PM

المشاركة الأصلية كتبت بواسطة aYaBooY

روح ربط العفشة
و امشي يوم في شارع مدشدش و ركذ الخبطة الي بتعدي عليها بتسمع و تحرك الدركسيون جامد و لا لا
لو اه يبقي انت عندك مشكلة في عبة الدركسيون و ده غالبا عيب في الماروتي
دور عليها جديدة و حتى لو غالية هاتها جديدة او ممكن تنزل وسط البلد في شارع شمبليون تحشيها بس سيبك من الاستيراد
لو مفيش خبطة و حركة في الدركسيون يبقي انت بتتكلم على على جلب مقصات بس و ديه يا اما بتتغير الجلب يا اما زي ال 127 و 128 بيتغير المققص
و ممكن تروح لحد بتاع زوايا يرفع العربية و يقولك على الحاجات الي عاوزة تتغير و ده اسمه الكشف على العفشة

أنا متشكر لحضرتك جدا ..
هو أنا فعلا لما بمشى فى حتة مكسرة أو بطلع مطب مكسر بلاقى الدركسيو بيتحرك ويروح يمين وشمال جامد ..

طيب أنا قبل كده عملت حشو لعلبة الدركسيون دى عند عفشجى من كام شهر .. فهل منطقى انها ترجع تانى كده بسرعة ؟؟

وليه بتقول أروح أعملها فى شارع شامبليون ؟؟ ليه معملهاش عند أى عفشجى ؟؟

وعل تغييرها أفضل من حشوها ؟؟ أنا كنت بسأل العفشجى هى محتاجة تتغير قالى لأ كفاية حشو ..

معلش الأسئلة كتير استحملنى ..

**KIA_SEPHIA_2001_K** · 31-03-2009 08:08 PM

شارع شمبيلون الناس هناك خبره وعملوا اسم ولو تقدر تروح الحرفين كمان روح

**aYaBooY** · 01-04-2009 12:01 PM

بص انا معرفش نظام العلبة بتاعت الماروتي ايه بس في شارع شمبليون تلاقي ناس بتفك العلبة نفسها و تطلع الاجزاء الداخلية و تظبطها
مش بس بيملاها شحم من بره و خلاص و لو محتاجة تغير اي جزء هايعرفوا يتصرفولك في القطعة ديه بس
و طبعا لو تقدر تجيب واحدة جديدة تكون افضل بس ممكن تكون غالية و لو عمرها اصلا قصير يبقي تصلح بتاعتك افضل و الموضوع ده يفتيلك فيه حد معاه مروتي
و عموما موضوع الشحم كان بيعد معايا ايام ال 128 حوالي اسبوعين فكونة بيعد معاك شهرين يبقي كويس اوي

**Ahmed Hamdy** · 01-04-2009 12:08 PM

يا جماعة متشكر جدا على الردود ..
طيب أنا رحت لعفشجى قالى دى علبة دركسيون محتاجة حشو .. بس قالى حنطلعها بره .. ده معناه انه كده حيظبطها زى ما بتقول انهم بيعملوا فى شارع شامبليون ولا برضه حيملاها وخلاص ؟؟

وبعدين رحت لميكانيكى بتعامل معاه طلع جربها معايا قالى لأ ده بيض وجلب مقصات .. قلتله أنا مغير مقصات قريب والبيض فى مقصات الماروتى مع المقص نفسه مش منفصل يعنى لازم أغير المقص كله .. قالى ممكن نكبسها على المكبس ..

رأيكوا مين الصح ؟؟؟

**aYaBooY** · 01-04-2009 02:26 PM

روح لعفشجي و خليه يربط العفشة الاول لو فضلت تتخبط ابقي روح شمبليون او شوف حد يملاها
و لو عاوز تتاكد روح لحد بتاع زوايا يكشف على العفشة و ده بيكون اصح الكل علشان ملهوش مصلحة يعني هوا بيقول العيب بس و بيعرف يحدد ايه المشكلة بالظبط و يقولك روح لعفشجي او لميكانيكي بس ميمدش ايده
كشف الزوايا بيكلف 10 جنيه و ربط العفشة 5 جنيه اعملهم و بعد كدة تعالي و قولنا ايه الاخبار و نشوف

**SAMEH_FOUAD** · 06-04-2009 07:59 PM

لو بيض مقصات هايعمل معاك تكة وانت طالع او وانت بتلف لانى بيتحرك جامد ولو اتكبس هيشتغل كويس بس فترة وهايرجع تانى
اكشف على الكبالن خلى حد ينزلك تحت العربية ويجيبلك الكوبلن شمال ويمين عن طريق العامود الى ماسكة لان مش شرط ان الكوبلن يطقطق بس ممكن جدا يبوش فبيعمل كدة
والمقصات عندك لو فيها حاجة هتلاقى العربية بقت وحشة اوى فى المطبات وبترعش على السرعة العالية نسبيا يعنى من 60 كدة لان بتكون الجلب اتاكلت