كورولا بعد 220 الف كم

**dr_waswas** · 01-04-2009 01:32 AM

انت تؤمر يا أبو عبدالله

أولا انا هتكلم بصراحة أولا لأني مش شايف اللي هقوله يعيب العربية
والحاجة التانية اني مش ببيع العربية فمضطر أزوق البضاعة

عربيتي كورولا 2003 خليجي او بمعنى أصح استلمتها من توكيلها شهر 11 2002
جايبها من الكويت

بعد مانزلت بيها بكم شهر سمعت زنة في الموتور

فسألت فقالوا انها زنة بلية كلتش التكييف

المهم في يوم قررت اريح نسي منها فروحت لميكانيكي بعد بث مضني
والسبب ان الكلتش اللي فيها مش زي الي في مصر

المهم الميكانيكي عمل فاهم فالنتيجة اني الكلتش قفش على المكيف
وطبعا اضطريت اشتري كمبروسر جديد

بس للأمانة التويوتا اللي كانت في مصر كان تكييفها مختلف عن بتاعي ودا اللي خلى الخليج يعدل التكييف بسبب الزنة لانها كانت عيب مشهور جدا

انا طبعا عملت بيها حادثة غيرت فيها بابين ورفرف أمامي وخلفي
الى الآن محدش يقدر يعرف المعلومة دي من التجار
كنت خابط في اتوبيس نقل عام وجها لوجه

بصراحة غير كده غيرت طبعا بوجيهات 3 مرات وطبعا الطقم بحوالي 60

اعتقد ان العيب الجامد فيها هو الفرامل
بتاكل تيل كتير وخصوصا مع العالم اللي بتجري
ولو سكت عليه هتضطر تغير طنابير

بس من نحية الموتور الحمد لله مفهوش مشكلة ابدا

مغيرتش الى الآن مساعدين مع العلم اني من سكان بحري
وطبعا ما ادراكم بطرق بحري ومطباتها

العربية من جوة زي الفل

غريتلها المساحات مرتين بس على فكرة انا مش بغيرها كلها انا بس بغير الجلدة ودي ميزة في الكورولا ان الجلد بيتباع لوحده

الفانوس الأمامي بيعمل 300 جنيه
الخلفي تايواني بيعمل 120
التيل وصل ل 50 جنيه تايواني
فرشها الاصلي بعلامة تويوتا من التوزيع في اكتوبر ب 550 جنيه معايا بقيله 3 سنين
طقم السيور اصلي ب 200دا طبعا لو حبيت تجيبه من التوكيل
انا مركبلها زنون على العالي والواطي

مركبلها 2 جي ام وسماعتين كينوود 400 وصب سوني 600 وات
غيرت الكاسيت بتاعها ومركب سوني
بس طبعا لمزاجي الخاص

بالنسبة للطرق...انا مركبلها جنط 14
العربية واطيه جدا لانها خليجي
اوطى من الكورولا اللي هنا بحوالي 15 سم

في السرعات مساعداني
انا بجيب بيها دلوقت مستريح 170

اترف انها كل ما تبقى واطية ثباتها هيبقى أحسن
لاني قارنتها باللي حواليا قالولي عندك أثبت وأسرع

كل ما الجنط يبقى خفيف احسن للمساعدين وبتدي جري أسرع

عفشتها بصراحة ناعمة جدا
من العيوب
الرفرفين الاماميين مش جامدين أوي
وخصوصا لو انت في جامعة فتأكد انك هتلاقيه كل يوم داخل لجوة

الحل ...قايم حديد تلحمه بعرض ارفرف جوه يجمد عضمه

انا بحطلها زيت موبيل 1 وماشية كويس عليه

اعتقد ان بنزين 90 للسحب احسنلها من 92
دا وجهة نظري

العربية لو متحافظ عليها اوي مش هتسمع صوتها او صوت الهوى جوه العربية
لو سمعته دا معناه انها ستهلكة جامد

بالنسبة لزيت الجير بغيروا كل 60 مثلا
وزيت الباور زودتوا مرتين تقريبا

بالنسبة للحرارة
فدي شهادة جودة ان الكورولا من العربيات اللي مش بتزيد حرارتها ولا فيها مشكلة في النقطة دي

تكييفها بالنسبة لموتور 1300 محترم جدا

في فترة كنت بضطر استعمل زرار الشفت عشان احرك عصاية الفتيس

كهربائي شاطر عرفني السبب
كان فيوز الفرامل محروق
ودا بيخلي الكمبيوتر ميقراش انك دايس فراكل فعشان كده العصاية مش بتتحرك

مشكلة كبيرة واجهتني ان حد غيرلي فلتر البنزين فكسر الترومبة وكانت مشكلة كبيرة اضطريت اجيبلها ترومبة جديدة من بورسعيد

تكييف استعمال خارج بيعمل 800
ترومبة بنزين بتعمل 1000
اكصدام أمامي بيعمل 250
المرايا الجانبية عندي مش شفط بتعمل 200 وممكن اقل لو استعمال خارج
من احسن مراكز الصيانة ليها بتاع شارع السودان وطبعا العباسية

في المجمل عربية للعمر
بتفكرني بال بيجو 504 أيام عزها

**faroukahafeez** · 01-04-2009 07:20 PM

ما شاء الله ربنا يحفظ ويبارك لك فيها
وتشوفها عاملة 500 الف كيلو

**dr_waswas** · 01-04-2009 07:41 PM

والله هو دا اللي مخليني مش قادر استغنى عنها

مش هقول انها جامده او جميلة او عشان مش هتجيب سعر مثلا

بس كفاية اني مشيت بيها 220 الف كيلو يعني حياة

على العموم انا هحضر بعض التفاصيل الأخرى عشان اللي بيحب يجيب الموديل دا

وشكرا لأبو عبدالله انا على فكرة من كفر الشيخ

**Rembrandt** · 01-04-2009 07:45 PM

ربنا يباركلك فيها

**Abdo_Eldesokey** · 01-04-2009 08:37 PM

ما شاء الله ربنا يباركلك فيها ...

**algeneral** · 01-04-2009 08:49 PM

ما شاء الله ربنا يحفظ ويبارك لك فيها

**DEBEDROO** · 01-04-2009 09:54 PM

تم الحذف لمخالفة القاعدة 6ب

إدارة المنتـــدى - 3

**samcar** · 02-04-2009 01:40 AM

للاسف يظهر الموديل الجديدواخد سمعه حتضيع جمال الموديل القديم

**dr_waswas** · 02-04-2009 03:11 AM

الطبيعي بالنسبة لتربيط العفشة معتمد على نوع الطرق اللي بتمشي فيها

طبعا مش عاريز اقولك انا بمشي فين

بس على العموم تربيط العفشة من الحاجات الضرورية انك تشوفها

يعني انا مثلا غيرت الكاوتش 3 مرات كنوع من المحافظة على نفسي

تربيط العفشة عملته حوالي 5 مرات سب ما برو للتوكيل

**Karim_Monir** · 02-04-2009 12:20 PM

المشاركة الأصلية كتبت بواسطة dr_waswas

د

بصراحة غير كده غيرت طبعا بوجيهات 3 مرات وطبعا الطقم بحوالي 60

اعتقد ان العيب الجامد فيها هو الفرامل
بتاكل تيل كتير وخصوصا مع العالم اللي بتجري
ولو سكت عليه هتضطر تغير طنابير

بالنسبة للطرق...انا مركبلها جنط 14
العربية واطيه جدا لانها خليجي
اوطى من الكورولا اللي هنا بحوالي 15 سم

وزيت الباور زودتوا مرتين تقريبا

اولا ربنا يباركلك فيها بس ليا بعض التعليقات على شوية حاجت حضرتك كاتبها
غيرت 3 اطقم بوجيهات في 220 الف كم مش شايف كدة قليل قوي على اي عربية مش الكرولا
التوكيل بيقول تغير طقم كل 20 الف كم عشان تحافظ على اداء العربية
وانا حاطط بوجيهات ايرديوم بتقعد 100 الف كم ودول تمنهم 300 جنية لانهم بتوع ليكزس وكامري

انا غيرت طنابير في التوكيل على ال 40 الف في الضمان عشان كان في ريجة في الفرامل واتغير التيل على حسابي عشان اغير الطنابير بس ناس تانية قعدت 80 الف وماحصلش حاجة واضح ان كان عندي عيب صناعة ف يالطنابير ولو قارنها ب لانسر بومة اللي بتغير تيل كل 20 او 30 الف بالكتير تبقي افضل منها

لو جربت العربية بجنط 15 هاتدعيلي لان ثباتها هايكون اعلى ونسبة جانب الكاوتش هاتقل من 70 الة 60 وهايكون المقاس
15-195-60 وده هايزود الثبات وده المقاس اللي بينزل في ال 1600

ممكن تكون الخليجي اوطى لكن اقل ب 15 سم اعتقد مش صحيحة اطلاقا
لان ارتفاع بطن العربية عن الارض كله لا يتجاوز ال 16 سم تقريبا
زيت الباور لازم يتغير على صيانة ال 60 مش يتزود عشان يطول عمر الباور معاك
عشان بيفقد خواصة في مع العمر والرطوبة والسخونة

وزيت الفرامل لازم يتغير بالكامل كل سنة عشان بياخد رطوبة وبيقلل كفائة الفرامل وغالبا ده السبب اللي بيخليها تاكل تيل معاك عشان مشوار الفرامل بقي طويل

ربنا يباركلك فيها