مركز صيانة محترم لأوبل ( عبدالله اوبل ) مجرب بنجاح

**akram000** · 03-04-2009 09:35 PM

يا جماعة انا معايا اوبل فيكترا موديل 98 2000 سى سى كاملة اوتوماتيك وعانيت الامرين عند كل الميكانيكية بتوع الاوبل لغاية ماقابلنى واحد وانا عطلان فى صلاح سالم علشان الحرارة عندى عدت الـ 100 ومن غير سبب ووقفت لغاية ما عدى عليا الاستاذ عماد انا معرفهوش شخصياً بس دة شخص شهم وقف لما شافنى واقف وعرفنى بنفسة وهو معاه نفس عربيتى بس موديل 97 هو مهندس معمارى وقعد يفهمنى ان العربية فيها طبات للمية وممكن تكون فية طبة بتسرب وكمان لغاية العربية ماتبرد قعدنا نرغى مع بعض عرفت منه انه كان زيى كدة لغاية ما واحد بن حلال عرفة على مركز الصيانه بتاع المريوطية دة وبيعمل كل الصيانه اللازمة من عفشة وكهرباء وكمبيوتر وسروجى وفرش وسمكرة ودوكو وعندة عربيات استيراد متقطعة وعندة جميع قطع الغيار الاصلية وبثمنها ومعاملة فى منتهى الجمال .
انا كنت باروح الحرفين لانها كانت جمب البيت عندى انا من مصر الجديدة وبصراحة استرخمت المشوار اول مرة علشان هو فى اخر الدنيا بس بصراحة بعد الصيانه الكاملة اللى عملهالى رجعت زى ما يكون لسة شارى العربية .
دى بصراحة مش دعاية ولا هو ابن خالتى انا بس بانصح للتذكرة وللنصيحة والله بس والتجربة خير دليل والعنوان بتاعة هتلاقى كتير يعرفوة هو فى المريوطية بعد منزل الكوبرى الدائرى وتدخل يمين بعد مكان بيغسلوا فية العربيات وبيغيروا زيت وممكن وانت هناك تسأل علية زى ما انا ما سألت هو زى نار على علم هناك وهيدلوك بصراحة انا معرفش العنوان بالضبط اية بس انا باروحلة على الوصف كدة
صحيح هو بيعمل ملف للعربية عندة بحيث كل مرة بتروح لة بيعرف اخر حاجة اتعملت اية فى العربية واخيراً مش حراق زى صاحبناً ؟؟؟؟؟؟؟؟؟؟؟؟؟؟
اللهم انى بلغت اللهم فاشهد

**Ahmad Allawy** · 04-04-2009 12:50 AM

الف شكر يا باشا..
انا عارفه و روحت هناك مرة مع واحد معرفة.. بس اللي روحت معاه ده كان عارف عبد الله نفسه.. اللي هو صاحب المكان..
بس بصراحة انا معملتش شغل في عربيتي.. بس واضح ان هما شغلهم نضيف جدا..

و فيما يخص موضوع الطبات دي.. دي اي حد متخصص اوبل بجد.. هيبقي عارفها.. عشان التوكيل بيعملوا كده.. و بيغيروا الطبات دي بطبات نحاس.. و حاجة معروفة..
عموما.. الف شكر علي النصيحة.. و جزاك الله خيرا..

**ahfarag** · 04-04-2009 01:32 AM

هو المركز اسمة اية؟

**Ahmad Allawy** · 04-04-2009 01:40 AM

اسمه عبد الله اوبل..

**Atef Saleh** · 04-04-2009 01:31 PM

مكانه فين يا علاوى بك من فضلك علشان اخوك اتشخرم امبارح عند عاطف غالى الموبينه قطعت غيرها و غير تيل امامى و خرط طنابير و دفعت 1450 جنيه زى الباشا .

**Ahmad Allawy** · 04-04-2009 02:00 PM

المشاركة الأصلية كتبت بواسطة akram000

هو فى المريوطية بعد منزل الكوبرى الدائرى وتدخل يمين بعد مكان بيغسلوا فية العربيات وبيغيروا زيت وممكن وانت هناك تسأل علية زى ما انا ما سألت هو زى نار على علم هناك وهيدلوك بصراحة انا معرفش العنوان بالضبط اية بس انا باروحلة على الوصف كدة

ده العنوان اللي اعرفه.. و هي نفس الوصفه فعلا..
و ربنا يكون في عونك.. كتير قوي الرقم ده.. بس اكيد البوبينة غالية اصلا..

**Atef Saleh** · 04-04-2009 02:10 PM

البوبينه ب 950 جنيه بس انا لقيتها عند واحد مستورد حبيبى ب 700 جنيه و حسبلى التيل ب 225
و لمبات التابلوه ب 75 و خرط الطنابير ب 80 و المصنعيه 150 جنيه يبقى الاجمالى 1480 و بعدين صعبت على احدى الانستين الجميلتين فى الخزينه فعملتلى خصم 30 جنيه بحالهم و روحت مبسوط بصراحه.... بس الشهاده لله ناس محترمه و محترفه جدا جدا و فى مهندس هناك اسمه على راجل محترم جدا .

**rabbat5** · 04-04-2009 11:27 PM

ده رقم عبدالله 0106060149

**rabbat5** · 04-04-2009 11:29 PM

المشاركة الأصلية كتبت بواسطة Atef Saleh

البوبينه ب 950 جنيه بس انا لقيتها عند واحد مستورد حبيبى ب 700 جنيه و حسبلى التيل ب 225
و لمبات التابلوه ب 75 و خرط الطنابير ب 80 و المصنعيه 150 جنيه يبقى الاجمالى 1480 و بعدين صعبت على احدى الانستين الجميلتين فى الخزينه فعملتلى خصم 30 جنيه بحالهم و روحت مبسوط بصراحه.... بس الشهاده لله ناس محترمه و محترفه جدا جدا و فى مهندس هناك اسمه على راجل محترم جدا .

ده مركز صيانة معتمد زي أوتوماستر ؟ مكانه؟