**كيف تسرق سياره امام الناس كلها ***تجربه شخصيه***
أيوة العنوان صح!
ومستغرب لغايه دلوقتى من اللى حصل!!
اللى حصل كالتالى:_
أثناء أنتظارى لشخص بمنطقه عمارات الضباط بإمتداد رمسيس والمنطقه دى للى ميعرفهاش عباره عن مجموعه عمارات ما بين قاعه المؤتمرات ومسجد ال رشدان والاوتوستراد وامتداد رمسيس فيها هيئات ومصالح حكوميه زى وزاره الماليه ومصلحه الجمارك وأمن الدوله والجيش وحاجات زى كده!
زياده على كده كل عماره فيها بواب والمنطقه مؤمنه بالتعاقد مع شركه أمن مخصصه فرد أمن لكل عماره على مدار ال 24 ساعه ومجموعه افراد لزوم النظافه وشئون البيئه زى ما بيقولوا(كير سيرفيس)...ماشى!
جيت انا وانا قاعد فى عربيتى لاقيت الأذان بيأذن قمت قفلت الزجاج والمسوجر بتاع الباب وأممنت على ابواب العربيه وطلعت على الجامع!
قوم الاقى أيه بعد ما خرجت من الصلاه؟؟؟!!!
الاقى المفاتيح بتاعه العربيه بالميداليه متعلقه فى الكونتاكت والعربيه متقفله تمام التمام!!!
يعنى للى لسه ما فهمش انا قفلت على المفاتيح جوه العربيه!!
يا نهار ابياااااااااااااااااااااا اااااااااض!!
طب هاعمل أيه دلوقتى؟؟
العربيه متقفله والمفاتيح جواها وممكن على ما اروح اجيب النسخه التانيه بتاعه المفاتيح حد يأخد باله يكسر الزجاج ويطلع بالعربيه!
خلاص أشوف حد بتاع مفاتيح فى المنطقه لانى فاكر واحد كان بيحكيلى على موقف زى كده فى اسكندريه وبتاع المفاتيح كان استاذ لدرجه انه عمله مفتاح من غير نسخه يعمل عليها...بمجرد حساسيه صوابعه مع القفل وبمسطره !
المهم رحت على بتاع الامن الخاص بالعماره اللى راكن قدامها :_
بقولك ايه يا ريس مفيش بتاع مفاتيح هنا؟
أيه مفاتييح؟
أيه يا عم وانا قولتلك حاجه عيب ولا حاجه؟بتعمل كده ليه؟!
معلش يا أستاذ أصل انا لسه جديد فى المنطقه..شوف كده ابو ياسر!
ابو ياسر ده البواب
وصفلى واحد بيعمل مفاتيح على الناصيه
رجعت لبتاع الامن وصيته على العربيه لحد ما ارجع بس وجرى على بتاع المفاتيح اللى طلع موان وميفهمش فى كوالين العربيات !!
طب انا عايز بتاع مفاتيح او ابواب عربيات!!
المحل الفلانى بتاع زجاج عربيات شوفه كده!
ياعم معلش انا عايز حد ييجى يفتحلى العربيه!!!
ايه؟؟!!!
نسيت المفاتيح جوه العربيه ومحتاج حد ييجى يفتحهالى
معلش اصلى مقدرش اسيب المحل لوحده ..طب ما تجيبها هنا
يانهار اسود على الغباء(طبعا ده فى سرى)
بقول لحضرتك العربيه مقفوله على المفتاح!!!!!!!!!
أه صح طب ثوانى....يا ابراهيييييييييييييييييييي ييم.....يا ابراهييييييييييم
روح مع الاستاذ عربيته قفل على المفتاح روح كده وهو هيعمل معاك واجب حلو!!
ياعم عنيينا بس يلا لحسن العربيه زمنها وصلت المنصوره فى الشويه دول!!
راح واخد معاه مفك زبنسه وجى معايا!
اول مشكله انى نسيت مكان العربيه ارجعله أزاى !!!!!!!!!
المنطقه كلها اسطمبه واحده ...سألت ابراهيم كشك العيش فين ؟ قاللى انهو فيهم؟ ...
شكرااااااااا.
المهم الحمد لله وصلت للعربيه! يقوم يقوللى ايه؟؟دى العربيه من غير سقاطه!!
ياسلااااااااااااااام منا قايلك انها فيرنا واحنا جايين وانا قولتلك 128؟؟؟
منا كنت عملتها وخلصنا!!!
طب بص بقى يا اوستاذ .. مش هاينفع نعمل حاجه غير اننا نكسر الشراعه اللى فى الباب اللى ورا ونفتح العربيه واغيرهالك عندى فى المحل الاصلى بتاع العربيه دى؟
طب ماشى بس بكام يعنى ؟؟
انا بطلعه جمله ب 70 لكن عشان ظروفك وانا مقدر هحسبهولك ب60...
ستين أيه ؟؟؟البتاعه دى بستين جنيه؟؟؟؟
بقولك ايه.. خد دول ومتشكرين على تعبك .. انا هبعت اجيب النسخه التانيه من البيت انا ساكن قريب من هنا !!
الراجل لقى الشغلانه هتبوظ قللى طب فى واحد بتاع مفاتيح اسمه عم ابراهيم مش عارف ولا خليل (مش فاكر) رحله بس وقولله انا جايلك من طرف ابراهيم عشان يرضى ييجى معاك!!
ماشى متشكرين يا هندسه!
بصراحه ضربت حيص بيص !!!:shyy::shyy:
خايف امشى من هنا يقوم يكسر الزجاج ويدور العربيه ويمشى وابقى قابلنى بقى!
فضلت قاعد وعملت نفسى بكلم حد فى التليفون عشان يصدق انى مستنى حد يجبلى نسخه المفتاح والحقيقه ان محدش فى البيت أصلا!!!:star1::star1:
هاكملكم حالا!!