عايز أجدد برادي سيدان موديل 2002

**boki_shomakhar** · 08-04-2009 02:16 PM

إزيكم يا جماعة..
بصراحة أنا مبهورة وسعيدة بالتعاون والخبرات المعروضة في المنتدى ده..
وكان عندي استفسار..
دلوقتي انا هشتري برايد سيدان اتوماتيك موديل 2002..
عايزه أعرف إيه الحاجات اللي أغيرها فيها في الماتور أو العفشة أو داخليا أو خارجيا.. يعني بمعنى أصح إزاي أشدها شدة حلوة..

في انتظار الردود .. بلييييييييييييز ما تتأخروش عليا..

**M.Mostafa80** · 08-04-2009 02:30 PM

بصى ياستى أولا أنتى تكشفى على العربيه من خلال حد بيفهم كويس قوى الأول لو تمام يبقى هتعملى الأتى
1-وهو دا الأهم تغيرى كل سيور العربيه دينمو تكييف لو فيه وسير الكاتينه ومعاها البليعه بتاعتها عشان منضمنش الى قبلنا كان ماشى عليهم قد أيه
2- زيت موتور وفلتر زيت زيت باور لو فيه زيت فتيس طبعا زيت فتيس أوتوماتيك مش العادى فلتر هوا فلتر بنزين بوجيهات وممكن السلوك لو مش حلوه
3-تربطى العفشه بتاعتها كويس وتشوفى أذا كان فى حاجات محتاجه أ،ها تتغير ولا لأ
والعفشه تشمل (مساعدين يايات بطاحات بارات دركسيون مقصات كبالن )أطمنى على الحاجات دى كويس قوى
كدا يبقى شده الميكانيكه والعفشه وهتبقى ماشيه وانتى مطمنه وعارفه الجدول الزمنى بتاع كل حاجه فيهم
4-أنوار السياره وتنظيف الكشفات وتغيير لمبات أذا لزم الأمر ومراجعه ضفيره السياره الظاهره أذا فى أى سلوك مش معزوله أو لو فى حاجه متهالكه غيريها وطبعا مراجعه الفيوزات الداخليه جوه السياره والخارجيه الى هى فى الكبوت
وبكده يبقى أطمنتى على الكهرباء بتاعت العربيه وأطمنى على شحن البطاريه والدينامو لو أفتكرت حاجه تانى هقلك عليها

**أبو إياد** · 08-04-2009 02:47 PM

على فكره انا سالت ليكى ع العربية دى لقيت واحده فى السوق 2001 سيدان اوتوماتيك صاحبها كان طالب 39000ج

بالنسبة للصيانه زى ما ذكر الاخ مومو بالظبط بس الكلام ده بعد لما تفحصى السياره وتتاكدى من انها سليمة من شاسيه وقوايم وحوض وشنطه وموتور والاهم الاوراق الاطلاع ع الرخصه والبطاقه وتوكيل اذا ماكانتش باسمه وطبعا يكون مكتوب فيه يحق له البيع للغير

وربنا يوفقك فى شراها

**M.Mostafa80** · 08-04-2009 03:25 PM

عايز أضفلك حاجه مهمه لو انتى لسه ما أشترتيش يبقى أكشفى طبعا على الأساسيات كويس الأول الى هما الماتور والفتيس والشاسيه وبعد كده العفشه وأى حاجه هيطلعلك فيها عيب من العفشه بس ممكن تنزلى فى سعر العربيه لكن لو طلعلك عيوب فى الماتور أو الفتيس أو الشاسيه يبقى أياكى وشراها

**aYaBooY** · 08-04-2009 03:27 PM

المشاركة الأصلية كتبت بواسطة m_s_h_a

الكورى الاوتوماتيك بلاش والله اعلم

+111111
اسمع ان فيها عيوب كتير مش بتظهر غير بعد فترة

**SAMEH_FOUAD** · 08-04-2009 04:04 PM

بالاضافة لكل كلام الاخوة الاعضاء اهم حاجة تشوفى العربية راشة جوة ولا لأ يعنى فى الحوض والشنطة وتبصى على القوايم والسقف كويس عشان ممكن تكون متغيرلها نص او ربع وطبعا تكشفى على المساعدين والماتور كبسة حلو ولا لأ يعنى مايكونش بيطلع دخنة او خفيف وحالة الكاوتش والبطارية لان طبعا الحاجات دية مش رخيصة فلو لقيتيهم محتاجين يتغيروا يبقى تنزلى من تمن العربية حوالى 1500 جنية ولة البطارية بتاعتها جافة ممكن تعرفى انها كويسة عن طريق المؤشر اللى فيها لو مدى اخضر يبقى البطارية دية نظيفة ولو اسود يبقى جيدة ولو احمر يبقى هاتتغير وبردة جربى الفتيس كويس جدا لان لاقدر الله اى عطل فية بيتغير كلة وربنا يوفقك

**ahit** · 09-04-2009 08:36 PM

طب يا جماعة لو العربية مانوال إيه رأيكم فيها؟
و هل فعلاً العربية دى إعتمادية ؟
شكراً

**samirayad** · 10-04-2009 12:10 PM

طب يا جماعة لو العربية مانوال إيه رأيكم فيها؟

عند الرغبه فى شراء سياره أستعمال ......يفضل دايما شراء السيارات المانيوال........الا اذا كنت عارف تاريخ الأوتوماتيك مع صاحبها وعارف أسلوبه فى القياده ( ياعنى عارف القصه من الألف للياء ).......لأن ممكن تنخدع فى الفتيس الأوتوماتيك.....................

__ وغالبا معظم اللى بيبيع السيارات ذات الفتيس الأوتوماتيك......بيكون السبب التخلص منها لعيب فى الفتيس عنده...........الا أذا كنت عارف العربيه زى ماسبق وقلت