المشاركة الأصلية كتبت بواسطة mira12345
السلام عليكم .. متشكرة جدا لاهتمامكم بجد .. و لروح المساعدة و التعاون اللى دايما موجودة فى المنتدى الجميل دة .. على العموم انا حبيت افرحكم .. انا اشتريت امبارح الجيتز الحمد لله . طبعا مش متعودة عليها اوى بس هى فى المجمل جميلة .. لونها شامبين ( انا بكره اللون دة ) بس هو حلو اوى فيها .. عشان الفرش الداخلى لونه احمر فى اسود و مديها شياكة و وسع . مع انها لو كانت حمرا كانت هتبقى تحفة . بس مش مشكلة انا فى كل الاحوال قاعدة جواها :) .. مش هشوف لونها كتير :)
ما سوقتهاش كتير لسة مش متعودة عليها .. بس الصبح اخويا نزلنى و لفيت بيها شوية و وقعت فى حبها :) .. سهلة جدا فى سواقتها .. و الباور فعلا زى ما الاخ ميشو قال مش خفيف اوى زى الi10 ,, بس انا بالنسبالى كويس جدا لانى قبل كدة كنت بسوق عربية من غير باور اصلا ..
كمان بتجرى من اقل دوسة بنزين .. و شغلت التكييف شوية و محستش باى تأثير فى اداء الموتور الحمد لله .. و ان شاء الله لما اتقن سواقتها شوية هبقى اقلكوا رأيى فيها :)
نسيت اقولكو انا ايه اللى خلانى استقر عليها .. اولا سعر اعادة البيع .. لو حبيت ابيعها كمان سنة او اتنين مفتكرش هخسر فيها كتير بعكس الزيرو طبعا اللى على الاقل هخسر 10 او 12 الف .. كمان عشان فى ناس خوفتنى من التكييف فى ال1100 cc و انه هيأثر على الموتور على الزمن البعيد. و اخر حاجة ان بابا قاللى انو هيحطلى بنزين على حسابه :):) فقولت استغل الفرصة بقى ..
و طبعا حالتها اللى ما شاء الله نظيفة اوى كأنها جديدة. يلا بقى قولولى مبروك و ميرسى جدا لمساعدتكوا بجد :)