الدال على الخير كفاعله .... فهل من معين

**essam2008** · 10-04-2009 12:30 AM

بداية تحية طيبة لهذا المنتدي بكل من فيه..
بصراحة أنا احترت ؟ عايز اشتري عربية تكون بحالة جيدة بكل كماليتها وبقالي شهرين ما بين مواقع النت وسوق السيارات بمدينة نصر(علي فكرة أنا ساكن فيها) أنا معاي 32ألف أنا عارف أن فيه عربيات كتيرة في هذه الحدود بس أنا ممكن استلف كمان 10ألف وأجيب نويبرا أو دايو لانوس( أنا معي عائلة زوجة وأولاد).
محتاج نصيحة منكم أجيب أكسيل ولا استلف وأجيب دايو ، بس هيبقي علي ديون وفي الأخر مستعمل. فيه ناس تقول خلي معاك ألف ألفين علشان كده كده هتصرف علي المستعمل يعني اكسيل، وفيه ناس تقول هتلك عربية موديل 2000 فما اعلي وأنسي التصليح مؤقتاً يعني دايو، أما امر الجديد مستبعد علشان انا مش حمل اقساط.. دلوني أعمل أيه...
والمشكلة الأكبر أني حديث عهد في موضوع الشراء يعني ليس عندي أي خبرة ومعرفش ميكانيكي أو سمكري كويس ، مش مهم ياخد كام بس يتقي الله فيا
أنا نفسي في النويبرا بس هل الأتوماتيك أم المانويل ... معلش طولت عليكم...

**PoweRPassioN** · 10-04-2009 12:37 AM

انا رأيي ابعد عن الدين وهات بالمتاح لانك مش عارف ايه الطوارئ اللي ممكن تحصل"لا قدر الله" ولما ربنا يكرم بيع واشتري اعلى
أهم حاجه تركب عربيه استعمال نضيف وياريت لو تكون عارف تاريخها

والاعضاء ممكن يفيدوك في الباقي
وربنا يكرمك ويفتح عليك
وبالتوفيق

**أشرف فتحى** · 10-04-2009 01:00 AM

افتكر قدامك اختيارات كتير فى حدود السعر ده بس لو عايز رأيي الاكسنت أفضل من الاكسيل لانها انجكشن وتكنولوجيا أحدث وفى نفس الوقت هاتبقى قريبه من اللى معاك لو حالتها كويسه!
بس فعلا بلاش الدين!!!

**EZABY** · 10-04-2009 02:02 AM

انا برضو رايي بلاش السلف وهات اكسيل عربيه حلوه جدا موفره في قطع الغيار والبنزين ومفيهاش كمبيوتر وحساسات والتعقيد بتاع العربيات الحديثه فتصليحها برضو سهل جدا عند اي ورشه وموتور كويس وتكييف جاااامد وبرضو خللي معاك الفين كده مصاريف للعربيه في بدايتها

**نور القمر** · 10-04-2009 02:29 AM

اكيد الافضل تبعد عن الديون
وانصحك بالاكسيل كويسه حتى ان كانت موديل التسعينات فهي افضل من الديون
وقطع غيارها رخيصه وصيانتها سهلة عند اي ميكانيكي
اما النوبيرا الاتوماتيك فشوفت كذا رأي مش بينصح بيها

ولو الاكسيل نضيفه مش هتحتاج مصاريف في البداية لان عادة اللي بيبيع بيوضبها علشان يبيعها

**أحمد سالم** · 10-04-2009 02:43 AM

وفيه ناس تقول هتلك عربية موديل 2000 فما اعلي

ده اولا اول شيء لازم تخليه فى حساباتك
حاول على قد ماتقدر ماتركبش اقل من 2000
ثانيا ماتجيبش بكل الفلوس اللى معاك عربيه لان اكيد هيطلع لك حاجات هتحتاج مصاريف اول ماتشترى عربيه مستعمله ونادر جدا لما تلاقى عربيه مش هتحتاج مصاريف
الراى الصح انك كمان تصبر شويه
على فكره فى واحد صاحبى جاب عربيه لانوس ب 27000 من المنصورة تقريبا بس والله مش فاكر كانت موديل كام
ولو هتجيب دايو الانوس افضل من النوبيرا
انا جربت الاثنين بس عفشة النوبيرا ماعجبتنيش خالص
والافضل من الاثنين الجولييت تحفه لانها كمان مش تقفيل مصرى
على فكرة انا امكانياتى نفس امكانياتك تقريبا بس انا عامل حسابى انى مش هتسرع فى قرار الشراء لغاية ماالاسعار تتظبط شويه
كمان لو هتشترى من السوق احترس جدا وحاول انك تتأكد ان اللى بتشترى منه مش تاجر وده بتعرفه من ملكيته للعربيه هل هو المالك الاصلى ولا معاه توكيلات وطول المده اللى العربيه قعدت فيها معاه
وان شاء الله ربنا يوفقك لما فيه الخير ولا تنسى صلاة الاستخارة

**ابو سيف** · 10-04-2009 02:52 AM

ممكن تجيب الاكسيل عربيه كويسه و ممكن سوزوكي سويفت بس تكون حالتها كويسه
اهم حاجة طالما حضرتك جديد

متنبهرش بشكل عربيه
اكشف على اي عربيه كويسسسس جداااااااا

متتسرعش في القرار خالص بتاع الشرا .. السوق اصلا واقف و مفيش مشكله لما تاخد وقتك لحد ما تقرر

الاستخااااارة

**sofokl** · 10-04-2009 03:07 AM

فى عربيات كويسة اسعارها نزلت اكتر من غيرها زى التمبرا وسعرها فى اواخر العشرينات و الفيكترا القديمة 94 و 95 ودى ممكن تلاقى الأوتوماتيك منها بحوالى 35 او اعلى شوية وميزتها ان الأوتومامتيك بتاعها مفيهوش مشاكل وممكن كمان ال بيجو 405 ، والعربيات الأوروبى عموما عمرها اطول من الكورى والماركات دى معروفة فى مصر وقطع غيارها متوفرة .
ده رأيي الشخصى وربنا يوفقك .