الموضوع: ليه اقف للست هانم في المترو ؟؟؟؟؟؟؟؟؟؟؟

بمناسبة المترو والسيدات لسه بتفرج على فيلم عادل امام امير الظلام لما دخلوا عربية السيدات وهم بالمايوه والصويت اشتغل :POINTI~2[2]:

هى اكتر حاجه بتنرفزنى جدا لما ميبقاش فيه مكان وتيجى واحده تقف فيه
أولا مبتبقاش واقف مرتاح لازم حضرتك تبعد شويه عنها وتزنق فى اللى حواليك عشان ميصحش تكون واقف ولازق جنب واحده ست
وفوق كل القرف دا لما المترو يتهز يمين ولا شمال فلو قربت منها ولا حاجه من غير متقصد تبصلك بقرف كده وتقولك بكل صرامه لو سمحت يا أستاذ
وهو ايه اللى حدفك علينا اصلا يعنى قرفانا ومضيقانا وكمان مش عاجبك

و الله, الموضوع ده ظريف قوي و انا أصنفه انه موضوع خيال علمي

هو فيه أصلا رجالة بتقف عشان تقعد واحدة ست؟ يعني انت قصدك - لا سمح الله - انه عنصر الشهامة و المرؤة ممكن يكون موجود في الرجالة في مصر؟:POINTI~2[2]:

ربنا يجازيك ضحكتني.

يا أخي ده انا في المترو مابشفش حد يقف لشخص عجوز أو ست حامل أو معاها طفل الا في عربية السيدات ايوة و الله الستات هما اللي بيعملوا حركات الشهامة دي و شفتها كتير من ستات لبعض في عربيتهم, انما في العربيات المشتركة ما بتحصلش و عادي جدا ان راجل او ست كبار في السن يبقوا واقفين و الكل يعمل عبيط.
و بعدين يا اخي محدش طلب ان الرجالة المفروض يقوموا لأي واحدة ست, بس لما تبقى واحدة حامل و لا معاها تلات عيال شايلة واحد والاتنين التانييين متشعبطين في لبسها عشان ما يقعوش وبرضه الناس مطنشة, يبقى ده تسميه ايه؟ و على فكرة الشباب مبيقوموش لواحدة غير لو حلوة أو لابسة لبس ملفت, عشان تقعد و يقف هو قدامها يتفرج عليها, و لا مبيحصلش؟

و بعدين انتوا مين اللي قالكم ان في عربيات للسيدات و عربيات للرجالة؟ في عربيتين بس للسيدات و ممنوع الرجالة يركبوهم (مع ان في منهم اللي بيستعبط و يركبهم برضه) و باقي العربيات مشتركة!!!!!!! ايوة مشتركة, انا مش فاهمة بأي حق عايزين تمنعوا الستات يركبوهم. هو الاخوة الافاضل متخيلين ان عدد الستات اللي بيركبوا المترو أقل من تلت عدد الرجالة و عشان كدة تكفيهم العربيتين و تزيد؟ ده أغلب ركاب المترو موظفين و طلبة و دول ما لا يقل عن نصهم ستات و بنات, يتحشروا كلهم في عربيتين ازاي, فهموني؟ مش عايزين الستات تركب مع الرجالة اطلبوا من الهيئة تعمل نص العربيات للستات و النص التاني للرجالة و ممنوع حد منهم يركب عند التاني (دي مش تريقة, انا بجد نفسي يعملوا كدة).

و ختاما احب اقلكم ان المساواة دي كلمة ابتدعها رجل لكي يلقي على كاهل المرأة بكافة المسئوليات و يحتفظ لنفسه بكافة الحقوق.