الحمد الله استلمت الجين 2 النهارده بعد يوم عصيب

**Mahmoud_405** · 12-04-2009 02:37 AM

اولا عايز اشكر كل الي ساعدوني في اختيار الجين 2 وفعلا طلعت بالظبط ذي ماتخيلت من حيث المميزات والعيوب... اليوم بدل بمشكله كبيره
صحيت الصبح علي تليفون من موظف المعرض اتفضب يافندم استلم عربيتك... قولت كويس اروح اشوفها روحت كل حاجه تمام:
الكاسيت شغال والمالتي فانكشن تمام والانوار وازاز الكهرباء والمريات والسنتر والمساحات والاستبن والعده في كيس متبرشم... كل الي انتوا قولتولي عليه تمام لكن ببص علي العداد لقيته97 كيلو والرحلات 287 2ساعتها انا اتعفرت وقولتلوا ازاي تعمل كل ده قالي مانا باعت سواق (كان هوا متفق معايا ان العربيه حتيجي علي كساحة ومش حتعدي ال 50 كيلو) والمعرض الي انا جايب منه يعتبر اكبر واحد في الاسماعيليه وعنده عربيات نقل بالهبل مش عارف هوا عمل كده ليه..
المهم فضلت اتخانق اكتر من ساعتين قولتوا هاتلي اي عربيه تانيه عمله قلل من 50 كيلو قالي يعني انا غلطان اني مفصلتش ال عداد وجبتهالك عمله ان شا الله 5 كيلو(منتهي قلت الادب في الدنيا) في الاخر قولتلوا انا شاكك في العربيه ممكن تكون اتخبطت واتصلحت وتتباع علي اساس زيرو وعايز واحد مهندس اعرفوا يشوفها قالي عيب ان تشك فينا احنا معرض محترم. وقلتلوا واضح جدا بالاماره انك غير كلامك واسنخسرت تطلع كساحه.
المهم جبت المهندس قالي العربيه فابريكه مفيهاش حاجه وعادي ال 297 كيلوا مش فارقه قوي قلت خلاص انا لازم انزل حق الكساحة لاني اصلا واخدها منه 84000 السعر كاش (بس زود الف جنيه علشان انا دفعت 60000 وحقسط الباقي علي 3 شهور) ونزلت 005 جنيه بقه اجمالي 84500 ....
فايه رايكوا في الي حصل انا كنت بتخانق لوحدي مفيش حد من العيله كان معايا كلو كان بيقولي كبر دماغك وامي اتصلت بخالي (تاجر عربيات) وقلتلوا علي الموضوع وقالي عادي جدا ال 297 كيلو مش كتير (من ابوا رواش لاسماعيليه حوالي 160 كيلو والعربيه هناك عبتبقي عامله من 80 الي 100 كيلو).. بالمناسبه العربيه استيراد شهر 21 - 2008 فهل دي فتره بعيده قوي

معلش طولت عليكم واخر حاجه عايز اسئال فيها انا معايا كتيب الضمان هل بختمه لما اروح اول صيانه الاف وهل المعرض الي انا شاري منه العربيه بيكتب فبه حاجه ولا انا بملي البيانات هناك في مركز الصيانه.
والريموت بتاع العربيه المدي بتاعه ضعيف جدا جدا حوالي متر ونص ( مكتوب في الكتالوج المدي 10 متر)

**Mahmoud_405** · 12-04-2009 02:40 AM

سوري العداد 297 كيلو مش 97

**myself112** · 12-04-2009 05:04 AM

الف مبروك يا باشا وربنا يسهلهالك.

**tutankhamoun** · 12-04-2009 07:51 AM

أولا مبروك الإستلام . و إن شاء الله يكون مفيهاش أي مشكلة إن شاء الله .
هو موضوع 297 .............. كتير صحيح ........... إنما ادام أنت جبت مهندس كشف عليها و قالك مفيهاش خبطات يبقى ما تضايقش نفسك و إن شاء الله تطلع زي الفل .

بالنسبة للعربية .......... أنا عايز أعرف مش هي موديل 2009 ؟؟؟؟
سيبك من ميعاد الأستيراد ............. المهم تكون بالتكنولوجيا الجديدة IAFM ؟؟؟؟
لأن لو مفيهاش التكنولوجيا الجديدة دي ............. تبقى مش 2009 و لازم تتأكد من الموضوع
على فكرة أنت ممكن تتأخد من الكاسيت ........... كاسيت 2009 فيه أم بي ثري .......... اللي قبل كدا مفيهاش إلا صوت بس من غير ام بي ثري .

بالنسبة للريموت .
هو مداه ضعيف ............ و أقصى حاجة 10 متر لما بتكون البطارية جديدة تماما .
و كل لما البطارية تضعف ............. المدى بيقل .
بس صدقني ............ المدى القليل أحسن بكتير ......... بكتير
على الأقل ما تدوسش على الزرار بالغلط و أنت بعيد عنها و بعدين العربية تفتح و متشفهاش بعينك و يحصل ما لا يحمد عقباه .
لدرجة أني من كام يوم البطارية بتاعتي خلصت ......... أشريت بطارية جديدة ............ و أستهلكت نصها قبل ما أحطها في الريموت علشان المدى يقل . ( ده رأيي .............. علشان كذا مرة المفتاح يدخل جيبي و الزرار ينجاس بالغلط ........... و العربية تفتح .......... و لولا أني موسوس و برجع أبص عليها ............ كان زمانها أتقلبت من زمان ) و علشان كدا جايب علاقة بنطلون للمفتاح علشان محطش المفتاح في جيبي .

و مبروك عليك الإستلام و ما تضايقش نفسك .................علشان موضوع العداد .
ربنا يباركلك فيها و يكفيك شرها و يعطيك خيرها و يقيك شر الطريق .
و متنساش في التليين
السرعة لا تزيد عن 100 ............ بدون تكييف
و سرعات متفاوتة مع تغيير متفاوت لعصا السرعات لتليين كل الأجزاء الميكانيكية في السيارة أيضا .
و السلام عليكم

**Nour_Peugeot** · 12-04-2009 09:10 AM

الف مبروووك يا محمود العربيه

بس انت عملت ايه في البيجو نسيتها خلاص

هههههههههه

ربنا يبركلك فيها و يكفيك شرها و تتمتع بيها البروتون محترمه و خصتا الجين 2

**MuhammedSoliman** · 12-04-2009 10:32 AM

ألف مبروك على العربية الجيدة وما تزعلش نفسك وضيع فرحة العربية ، على فكره بالنسبه لكلام أخونا توت 100 100 بس على لو انت قافل العربية تمام وفتحت بالغلط من الريموت وما فتحتش الابواب اوتوماتيك هتقفل بعد 30 ثانيه لوحدها
تحياتى

**Osama.shihata** · 12-04-2009 12:05 PM

1000 مبروك متقلق ان شاء الله تكون العربية كويسة معاك
وبالنسبة انها مستوردة فى نهاية 2008 متقلقش منها خالص
انتا بص بس على العتب الى موجود تحت الباب بتاع السائق
هتلاقى لوحة معدنية مكتوب عليها سنة الصنع وان شاء الله هتلاقيها 2009
أسامة

**momenhamdy** · 12-04-2009 12:19 PM

الف مبوووووك يا سيدي الفاضل علي العربية
وربنا يديك خيرها و يكفيك شرها و شر الطريق
وزي ما قال الاخ المحترم توت وراجع علي الاجزاء الي هو اشار ليها و ان شاء الله كله يكون تمام

بالنسبه لاستيراد شهر 12-2008 مافيهاش اي مشكله بس هي تعتبر من الدفعات الاولي لموديل 2009 الي نزلت مصر

ولك اجمل تحيه

**Ayman_52** · 12-04-2009 12:22 PM

الف الف مبروك ....

وزى ماقالك استاذ/توت.....

وربنا يباركلك فيها يارب ويحفظهالك من كل شر ....

**ahmedsiyam** · 12-04-2009 12:48 PM

الف مبروك اخى الفاضل و ربنا يكرمك فيها ان شاء الله

بس انا من رايى ماكنتش استلمت الا زيى مانت عايز برضه انا راجل دافع فلوس موش واخد العربية جدعنة

وده لو معرض محترم كان جابها على ونش موش سافر بيها لحد الاسماعيلية

الموضوع: الحمد الله استلمت الجين 2 النهارده بعد يوم عصيب

LinkBack

أدوات الموضوع

عرض

الحمد الله استلمت الجين 2 النهارده بعد يوم عصيب - انشر الموضوع فى :

-

-

-

-

-

-

-

المواضيع المتشابهه

الحمد لله استلمت ار بي النهارده

الحمد لله استلمت الفلوانس النهارده

استلمت اللوجان النهارده الحمد الله

استلمت الجين 2 امبارح ورخصت النهارده

الحمد لله استلمت لوجانتى النهارده

الكلمات الدلالية لهذا الموضوع

المفضلات

المفضلات

ضوابط المشاركة