اوبترا ولا ماتريكس؟

**Air Karam** · 17-09-2007 12:47 PM

السلام عليكم و رحمة الله و بركاته...
بداية احب ان اشكر القائمين على هذا المنتدى المفيد جداً لكل من يريد ان يسأل او يستفسر عن اى شىء خاص بالسيارات.
و هذا ما شجعنى ان استشيركم لعلى اجد غايتى.
منذ اكثر من شهر ونصف و انا احاول ان افاضل بين سيارات كثيرة فى حدود 80000 و 85000 جنيه.
و اخيراً انحصرت الحيرة بين سيارتين اوبترا و ماتريكس.
متطلباتى فى السيارة:
- سيارة عائلية
- عفشة قوية
- 1600 سى سى
- واسعة من الداخل (حيث ان طولى 196 سم)
- مانيوال
- جميع الكماليات (سنتر -4 زجاج كهرباء - Fog Light - ريموت - وحدات رفع ان امكن)
بالاضافة طبعا الى تكييف قوى و عزل ممتاز.
بالنسبة لعيوب السيارتين كما اراهما من وجهة نظرى
الماتريكس : الشكل - الكراسى غير مريحة - التوكيل سىء جداً.
الاوبترا : دهان المصنع يخدش من اقل لمسة - الصاج الخارجى ضعيف - سعر اعادة البيع منخفض.
الموجود حاليا ماتريكس 2008 و اوبترا 2007 (الموديل 2008 يقال انه هينزل فى اكتوبر انشاء الله و لا احد يعلم ان كان سيتغير الشكل ام لا)
لذا انا نويت و النية لله اشترى فى النصف الثانى من شهر اكتوبر حتى تتضح الامور.
و لكن مازلت محتار بين السيارتين؟
افيدونى بالله عليكم و شكراً مقدماً..

**إسلام شاهين** · 17-09-2007 12:52 PM

أولا أهلا بيك

ثانيا بدون كلام وطالما عهايز سيارة عائلية تبقى الماتريكس وتوكل على الله بس صلي صلاة استخارة الأول وربنا هيكرمك .

الأوبترا أنا عن نفسي ما بحبهاش لأني سمعت والله أعلم إن استهلاكها في البنزين عالي قوي لأنها 6 سلندر ، وبعدين الماتريكس زي ما إنت شايف بترمح في الشوارع أهه زي الخيل ومحدش اشتكى منها في حاجة وقطع غيارها متوفرة ومعقولة الأسعار .

**Migo123** · 17-09-2007 12:57 PM

.بصراحه الماتريكس أفضل ...
قطع غيار ارخص
سعر اعادة بيع افضل
أوسع واريح

**Powert** · 17-09-2007 01:06 PM

الأوبترا ازاي 6 سلندر يا اسلام دي 1600 سي سي

الاوبترا 4 سلندر بس

**Adham** · 17-09-2007 04:12 PM

لا ياباشا الاوبترا احسن من 100 ماتريكس طبعا

اسمها شيفرولية برضة مش هونداي
و سيدان و وواسعه من جوة و شنطتها كبيرة

الماتريكس دي اسم عالفاضي و الناس اقبلت عليها اقبال غريب كنوع من التقليد و مقتنعين انها الشيروكي بتاع الهيونداي و كلة بيركب فيها مواسير حديد دفندر و مش فاهمين انها كدة اي خبطة حاتبقى في الشاسية عدة وممكن علب الشاسية تتقطع من الدفندرات اللي متثبتة فية

و الماتريكس شنطها ضيقة جدا و لو مسافر او عاوز تنقل حاجة الشنطة ماتكفيش شنطين كبار و هاندباج

انا الاوبترا فهي للتصحيح اربعه سلندر 1600 سي سي موتور قوي و صاج قوي و شاسية اقوى من الماتريكس وواسعه من جوة لأن انت 196 سم يبقى محتاج عربية واسعه
و الماتريكس لو قعدت فيها دماغك حاتضرب في السقف لانها كراسيها غبية متشعلقة لفوق زي كراسي الميكروباص

اعمل تست درايف للعربيتين او عن طريق حد تعرفة و جرب بنفسك و ربنا يوفقك لما فية الخير

**mohaismail** · 17-09-2007 05:57 PM

لآ وجهة تظرى الاوبترا افضل مليون مرة ومفيش وجه مقارنة بصراحة وكفاية التوكيل محترم جداااااااااااا انا معايا نيسان صنى وبتعامل مع العوض جروب فى الصيانة وهما موزع معتمد لنيسان وللمنصور ناس محترمة جداا

**Ahmed Anwer** · 17-09-2007 06:02 PM

أنا زيكم شايف الأوبترا أحسن
بس علي فكرة غبور مش زبالة أوي كده زي مابتكتبوا عليه في كل المواضيع

**أبو عبدالله** · 17-09-2007 06:06 PM

اسمها شيفرولية برضة مش هونداي

ده المقصد منه انها مهما كان تبع جنرال موتورز اللي بتخترع الجديد وليست مقلدة

رايي الأوبترا

**MMamdouh** · 17-09-2007 06:33 PM

انا شايف ان الماتركس دى تستحق جايزة...مفيش عرية شكلها اوحش من كدة اتباعت مبيعات خرافية بالشكل دة فالعربية تستحق اشادة يا جماعة

حد فيكم شاف ماتركس بيضاء؟ و لو شفت حتلاقيها واحدة ولا اتنين بالكتير... عارفين ليه مفيش منها ابيض؟؟ عشان شكلها حيبقى مكروباص بجد و الناس حتشاورلك طول ما انت ماشى و تسمع اسئلة زى "تحرير" و "هرم" و "مؤسسة" و كدة و اخر ما تزهق حتركبهم و تتخانق معاهم على الاجرة

خلينا نتكلم جد: الماتركس شكلها وحش اوى... لا هى 4x4 و لا هى مينى فان ولا اى حاجة و قعدتها وحشة جدا... انا قعدت فى واحدة حسستنى انى قاعد على كرسى حمام و فكرتنى بالاتوس (اللى من صنع هيونداى) اللى الناس بتقول عليها مكواة... دا غير ان شنطتها ضيقة مووووت و مش حتعمل معاك اى حاجة فى السفر... و اعتقد ان شكلها الغريب دة رفع مركذ ثقل العربية فامش حتبقى ثابتة على الطريق على سرعة... عموما انا لما شديت مع واحد بماتركس دخل ملف شمال على سرعة شوية و العربية كانت حتلف منة و انا دخلتة عادى خالص (انا معايا لانوس)

طيب دلوقتى العربية شكلها وحش و قعدتها وحشة و مفيهاش شنطة (مقارنة بحجم العربية الكبير) و احتمال كبير ثباتها ميبقاش قد كدة... طيب ليه؟؟؟؟؟ :?

الاوبترا مش اختراع جديد... هى ببساطة تطوير للنوبيرا و بالتالى عارفين انها بتستحمل و موتورها قوى و ثابتة على الطريق و الكل شافها واسعة و شنطتها كبيرة و الوكيل راجل محترم و قطع الغيار متوفرة و مش عايز اقول لو زنقت اوى ممكن تجيب قطع غيار دايو تركبها فى الشفرولية و حتمشى لان كلها عربيات GM

عموما القرار النهائى ليك و انصح قبل ما تقرر تركب العربيتين و تقارن الصالون و الشنطة و يا سلام لو قدرت تسوق العربيتين شوية عشان تعرف حساس العربية على الطريق عامل ازاى

MMamdouh

الموضوع: اوبترا ولا ماتريكس؟

LinkBack

أدوات الموضوع

عرض

-

-

-

-

المواضيع المتشابهه

مطلوب عربيه ماتريكس او تيجو او اوبترا في حدود ٥٥

مطلوب ماتريكس او اوبترا

اوبترا 2007 ام ماتريكس 2006

حد عايز يبيع عربية لانسر او اوبترا او ماتريكس

اوبترا ولا ماتريكس الجديدة

الكلمات الدلالية لهذا الموضوع

المفضلات

المفضلات

ضوابط المشاركة