Fantasia '09 Manual by 145.000 L.E
السلام عليكم
في البدايه احب اوجه الشكر لكل من ساعدني في منتدى سكودا للوصول الى قرار نهائي بخصوص الفانتازيا الجديدة
والله ياجماعة انا شاكر ليكم جدا.....
ثانيا اسف لتأخري في سرد تفاصيل تجربتي مع السيارة لأنها لسة ماترخصتش
عشان لسة ماجبتش ورقة الافراج الجمركي وهجيبها بكرة ان شاء الله وارخص على اخر الاسبوع
بس انا بداية هتكلم عن استلامي لها من الفرع الرئيسي بالمقطم
بصراحة المبنى هناك خيالي وجامد جدا
فيه تقريبا 4 صالات عرض كبار
صالة لكل موديل على مااعتقد ده غير الدور التاني اللي فيه مكاتب والدور التالت اللي فيه ( مش عارف ايه بالضبط ) بس متهيألي اجنحة او مطعم معرفتش اوصل لحاجة
والدور الاول طبعا مكاتب التسليم وقاعة المؤتمرات وصالات العرض
والساحات الخارجية والمخزن للسيارات الموجودة
ملاحظة لاحظتها ، ان في اكتر من 80 سيارة من موديلات A5,a4,roomester,fabia,mini Fabia
في حين كان هناك 5 سيارات فانتازيا على الاكثر ودول كلهم للتسليم وغيرهم 3 للعرض
المهم ، اوا ماوصلت استقبلني الاستاذ / وائل وده مسؤول التسليم الاداري
يعني خلص الورق والمبايعة والحاجات دي وكان زوق جدا وشربت نسكافيه كماااااااان
وبعدها استدعى الاستاذ / ياسر وده اللي هيسلمني العربية قاللي نغسلها ولا لأ ، قلتله لأ ،،
وبعدها قعد معايا انا ووالدي في صالة العرض شرحلي كل حاجة عن العربية والاستخدام والصيانة وده كله نظري
وبعدها طلعنا بره وجربنا كل حاجة في العربية وبعدين طلع كمان معايا جربتها في المنطقة المحيطة
وسلمني بعدها شنطة اسعافات جاية مع العربية من بره مش بتاعة مصر هنا
وعلى فكرة كل المواصفات اللي موجودة في البورشور موجودة بالكامل
وفي فتحات تكييف خلفية والكاسيت بيشغل Mp3
وفيها مثبت السرعة وحساس مطر وضبط ضغط الاطارات وتعتيم اتوماتيكي للمرايا
واضاءة خارجية جانبية من المرايا عند فتح الابواب
يعني فيها حبة حاجات زيادة عن موديلات ال A5 المانيوال
وبعدها مشيت من هناك ورحت المعادي اتغديت واستنيت على مازحمة المواصلات تخف عشان انتم عارفين الطريق الزراعي وغباؤه والحمد لله مشيت من المعادي على 9 كده وسمعت ماتش ليفربول وتشيلسي في الراديو كمااااان
انا متأسف لو كنت نسيت حاجة
ولو حد عنده اي استفسار انا تحت امره
وعلى فكرة سمعت منهم ان حجز الدفعة التالتة هيفتح اول مايو ان شاء الله بس برضه الاسعار وقتها ، نفس الحركة اللي عملوها فيا ،، بس مجملا هما ناس زوووق جدا جدا جدا مش زي استاذ غبور لما كنت بستلم الماتريكس
ادعولي بالخير وفي امان الله