يا جماعه فى كلمتين مقدرتش انام غير لما اقولهم:-
احنا ليه بنتقابل؟؟
مش هيقدر يجاوب على السؤال ده غير اللى حضر مقابله وبالذات عيد ميلاد المنتدى!
مش هيقدر يوصف الاحساس بالحب والود اللى بدون مصلحه او مقابل غير اللى عاشه!
كله بيحب كله...كبير وصغير ...تخين(احم احم) ورفيع...معاه بى ام ولا جى مواصلات...مسلمبن وأقباط
كله فرحان بكله...كله عايز اليوم ما يخلص!.....بس للأسف بتلاقى الوقت جرى واليوم خلص!!!!!
ايه ده دحنا لسه قاعدين!!!
والله الوقت بيجرى زى نسمه صيف جميله...
والصحبه مفيش احسن من كده...ناس من خيره الناس تفخر بأنك تعرفهم...مش اكلت معاهم عيش وملح!
احساس يشبه احساسك وانت قاعد فى البلكونه على النيل ساعه العصارى ومشغل الراديو وصوت كوكب الشرق منخشش فى نفوخك والحان عبد الوهاب بتلعب فى دماغك واخر سلطنه مع انت عمرىمع كوبايه الشاى...(.اللى شوفته..ترلم...اللى شفته...ترلم)!!!!!!!!!!
ياااااااااااااااااااه الضحكه الصافيه اللى مضحكتهاش من زمان !
كل واحد على طبيعته!
لا متكتف قدام رئيسه ولا مقفل قدام مرءوسيه!!
مش عايز ترجع يوم من ايام اعدادى مش شايل هم حاجه؟
مش عايز تغسل هموم حياتك؟
مش هتدفع رسوم دوره تنميه مهارات بشريه ولا هتشترى كتاب لأبراهيم الفقى ولا روبنسون رايدر!
كل ما عليك تحضر مقابله المنتدى وهتقلب معاك ادمان!!!!
بس ادمان مفيد!
هننتج افكار نحاول ندعم بيها الكيان اللى جمعنا كلنا (نايل موتورز) !
هنفكر إزاى نحولها من منتدى قايم على مجهود اشخاص بيبذلوا اقصى ما فى وسعهم وفى الظل ولا رياء ولا سمعه!نحوله لمؤسسه حتى وإن كانت غير هادفه للربح!
مؤسسه خدميه نفخر كما كنا ولا زلنا دائما بالانتماء لها!
انا طولت قوى بس انا اتكلمت من قلبى وانا اعرف ان الكلام اللى بيطلع من القلب بيوصل القلب!!!
اخيرا هستعير كلمتين من ناس عزيزه عليا قوى!
اول كلمه عن لسان الحاج احمد ابراهيم ( aif ) (لما تقابل ناس لا تربطك بهم اي مصلحة او شغل او قرابة .... مجرد حب ف الله ... بيبقى لها طعم خاص )
تانى كلمه على لسان حبيب قلبى شنورى (انا لما عملت كده كنت متأكد ان فلان ده لو مكانى وانا اللى مكانه كان هيعمل معايا اكتر من كده)
المفضلات