مازدا 6 الجديدة 2008

**وائل عطية** · 20-09-2007 10:54 AM

وبعدين معاك يا أحمد
يابني أنا ماصدقت خلصت من التعقيد اللي عملتهولي امبارح
كفاية حرام عليك :lol:
عندك فكرة عن الأسعار ودي نزلت أو هاتنزل مصر ولا لأ؟

**Sharky** · 20-09-2007 11:37 AM

وبعدين معاك يا أحمد
يابني أنا ماصدقت خلصت من التعقيد اللي عملتهولي امبارح
كفاية حرام عليك

:mrgreen: :mrgreen: :mrgreen:

عندك فكرة عن الأسعار ودي نزلت أو هاتنزل مصر ولا لأ؟

أكيد مش حتنزل مصر لإن العربية دى بتبدأ من 1800 سىسى و طبعا الفئة دى جماركها عالية فى مصر يعنى علشان تنزل فى مصر متهيألى مش حتقل عن 280.000 الف جم .

**ahmed_eladawy** · 06-10-2007 05:34 PM

ربنا يخلص مازدا من غبور ويرزقنا بتوكيل ابن حلال :mrgreen:

**Sharky** · 06-10-2007 05:37 PM

ربنا يخلص مازدا من غبور ويرزقنا بتوكيل ابن حلال

+1

**Ahmed Hassan** · 14-10-2007 05:50 AM

انا كنت داخل اكتب عن تجربتي انهارده مع عربيه مازدا 6 لقيت الموضوع ده!!!

العربيه انا مش متأكد هيه موديل 2005 و لا 2006 هيه كانت مع واحد صاحبي و بنمر جمرك (جايه من السعوديه) العربيه 2000 سي سي مانيوال.. و الغريب جدا في الموضوع انها ازاز كهرباء قدام بس... كاسيت من غير سي دي... جنوط 15 بس مش سبور... و المصيبه الكبرى مفيهاش ABS دورت على اللمبه بتاعت الـ ABS في التابلوه ملقيتهاش!! قولت اكيد اللمبه محروقه... و فتحت الكابوت ملقيتش اي اثر ليه :|

بس عى العموم فيه 2 اير باج :mrgreen: (خلاص كده معنتش هلوم على الصني المصري تاني ابدا)

التابلوه هوه اللي في الصور فوق بس مكان الـ navigation system فيه الكاسيت و مكان السي دي مقفول. و مفيش زرار الـ start يعني بتدور بمفتاح عادي
و التكييف بكر عادي "غير البكر الاوتو اللي في الصوره)

انا مسوقتش.. سيبته هوه اللي يسوق بس بصراحه اتجننت (اظاهر الواحد نسي الاحساس بالعربيات الـ 2000 سي سي) العربيه مش طايقه نفسها!!! يعني انته تطلع على الأول عادي و بهدوء... و شيلت رجلك من على الدبرياج و بعدين تزود بنزين العجل يفضل يفوت لغايه متنقل و تجيب تاني!!! أول متجيب تاني العجل يفوت تاني!!! تحرق تاني و تجيب تالت العجل يفوت بردو مع النقله!!! كل ده بيحصل من غير مجهود خاااالص!! يعني في عربيات ممكن "تأمرك" اول و تاني و تالت كمان بس بتحتاج مجهود من السواق و "الأمركه" بتكون بسيطه خصوصا على التاني و التالت,,, لكن العربيه دي بتعمل كده عادي خالص... كأن ده الطبيعي!!!!

نسيت اقولوكوا انه جاب 70 على الأول و بعد كده مكنتش عارف ابص على العداد لأني بصراحه بخاف لما اركب جنب اي حد سايق!!!

انا بصراحه انفعلت جدا من التجربه دي... ربنا يوعدنا و يخفضوا الجمارك بقى علشان نتشتري العربيات الـ 2000 سي سي بتمن العربيات الـ 1600 اللي بنشتريها دلوقت!!

قولوا آمين