﴿ إِنَّ مَعَ الْعُسْرِ يُسْراً ﴾
بدأ يوم الجمعة وبعد الصلاة قولت يلا بقى نتفسح
ننزل على المنشية وبعدين أودى العيال ملاهى ومراجيح عند شارع 45
خرجت بالعربية على الكورنيش ودايس بقى
وبدأت المشاكل
كل ما امسك فرامل أو أهدى بالعربية
ألاقى العربية بتنتش تنتيشة خفيفة وتمشى عادى
قولت يارب استرها
وبعد كوبرى استانلى بشوية وقبل مكتبة الاسكندرية
عند الإبراهيمة نتشت والمحرك طفى !!!
يادوب لحقت نفسى بالقصور الذاتى وركنت على اليمين على الكورنيش
فتحت الكابوت لاقيت المياه فى القربة زايده وبتنزل من القربة
بس مش بتغلى ولا حاجه والحرارة كانت طبيعية فى معدلها الطبيى بين الـ 80 والـ 90
موضوع المياه ده كان غلطه منى كنت مزود القربة على الآخر ومعدى علامة الماكسيمم قبل ما اطلع من طنطا
قولت الجو حر
وكان فيه تسريب بسيط من الراداتير من يوم ما الواد بتاع الراداتير عمله
علشان كده زودتها على الآخر
شكيت ان المياه تكون وقعت على السبراتير بوظت حاجه
بس الاسبراتير مكنش مبلول
قولت اقف شوية فى الحر فاتح الكابوت ممكن الدنيا تنشف وتشتغل
فضلت حوالى ساعه بجرب مفيش فايده
طيب اعمل ايه !!!
قولت اتصل بحبيب الكل سمسم الباشمهندس حسام نبوى
قالى إتأكد من طرمبة البنزين وشوف فيه بنزين بيطلع من فلتر البنزين ولا مفيش
وممكن يكون سده فى الكربراتير أو مشكة كهرباء
وكان مشغول وطالع المطار
بصراحة اتصل بيا كذا مرة واطمن عليا
ربنا يديم المعروف
فكيت الخرطوم بعد فلتر البنزين لاقيت البنزين بيتدفق مش عاوز يبطل
الغريب انه بيتدفق بدون ما اشغل المارش !!!
هوه طرمبة البنزين عندنا نظامها ايه كهرباء ولا ايه ؟؟؟
طب وبعدين اعمل ايه
والدى كان موجود فى اسكندرية ومعاه الفليشيا
اتصلت بيه وقولتله تعالى علشان ندور على ميكانيكى ولا تسحبنى
قالى جايلك
طلع عن سيدى بشركان فيه حادثه مهببه هناك والطريق مشلول وانتظرت حوالى ساعه مفيش فايده
وبعدين بقى فى الحظ المدوحس ده
اصرف ازاى !!!!
ببص بعينى ورا لاقيت عربية لادا على بعد 20 متر فاتحه كابوتها هيه كمان ههههههههههه
قولت اشوفها يمكن ألاقى ميكانيكى هناك ولا حاجه
روحت لاقيت فعلا فيه ميكانيكى
قولت ياكرم الله حسيت انى لاقيت لقية
وتذكرت الآية الكريمة
﴿ إِنَّ مَعَ الْعُسْرِ يُسْراً ﴾
بالنسبة للادا طلع فيه مشكلة فى كارونة اللادا وعاوزه كساحه
قولتله طيب تعالى ياريس معايا شوف الشاهين ديه مالها مش راضية تدور
فتح الكابوت وبمفتاح 13 لف الاسبراتير شوية والعربية اشتغلت
بس صوتها غريب ومبرجله وبتسقف على الآخر
وفوجئت بيقولى العربية كده تمام !!!!
تمام ازاى يا أسطى قالى الكهرباء عاوزه تتقدم ولا تتأخر
قولتله بس التسقيف فظيع
قالى ما انت بتسخدم بنزين 80
قولتله ما انا طول عمرى بستخدم 80 ومفيش تسقيف نهائى مهما كبست عليها
قالى العربية عاوزه مشط اسبراتير
قولتله ده المشط اللى فيها لسه جديد مركبة من حوالى 3 شهور
وجبت التركى الماريلى أغلى نوع بـ 125 جنيه
بس قولت فى بالى ممكن تكون المياه اللى طلعت من القربة نزلت على المشط بوظته
قالى على العموم العربية ماشية وزى الفل اهيه
قولتله ياعنى امشى بيها كده مش هتعقف منى !!!
قالى مشى عادى وابقى غير المشط فى اى وقت
قالى انت رايح فين قولتله المنشية قالى خد معاك لحد البنزينة اللى قبل مكتبة اسكندرية علشان ورشتى هناك
وبالمرة اطمن ان العربية كويسة
أخدته وصلته واديته 10 جنيه
( لو كان الميكانيكى بتاعى مكنتش اديته حاجه لحد ما نحل المشكلة تماماً أو بالكتير 5 جنيه) لإنى مش مقتنع انه عمل حاجه وحاسس انها هتعطل تانى قريبا
بس قولت كويس انى لاقيت حد يشغلى العربية ويمكن أحتاجه تانى
وفعلاً بعد ما نزل مشيت كام متر وقصاد السلالم بتاعت مكتبة الإسكندرية بالظبط لاقيتها بطلت تانى
نزلت رجعتله جرى وروحتله الورشة عند البنزينة بقوله ياريس العربية عطلت تانى
قالى يبقى المشط كده لازم يتغير قولتله لو متأكد انه مشط نغيره
قالى هتجيب مشط من الأزريطة بعد مكتبة اسكندرية وتروح لأى ميكانيكى هناك يركبهولك واديله 20 جنيه
علشان انا هروح اتغدى
قولتله ماشى بس تعالى دورهالى علشان اروح الأزريطه
جه معايا ولفف الاسبراتير تانى دارت مبرجله طبعا
وقالى هات 10 جنيه كمان بقى يابيه
هههههههههه
عملت نفسى مسمعتش وطبقتله 5 جنيه واديتهومله قالى ماشى
مشيت خطوتين وعند أول يوتيرن لفيت ورجعت وروحت ورا المكان اللى بيعملوا فيه المعارض السورية والحاجات ديه
جنب مكتبة الاسكندرية
وإتفاجأت بمفاجأة سارة جدا
لاقيت قدامى محل فيات 2000 اللى الاعضاء بتتكلم عليه
وبيقولوا ان عنده قطع الغيار الأصلية
بس اللى اعرفه من كلام الأعضاء انه فى القاهره قرب رمسيس
فوجئت ان ليه فرع فى اسكندرية
قولت اشطى هلاقى قطع الغيار الأصلية
وبأرخص سعر لإنى باخد من المستورد الرئيسى
مع العلم ان محل قطع الغيار اللى بشترى منه فى طنطا بلاقى مكتوب على كراتين كتيره عنده
فيات 2000
قولت تمام انا اتعلمت حاجات كتيرة النهاردة بسبب الحركة ديه
وكويس ان العربية معملتش كده على الطريق الزراعى
يتبع ....