ظبط الكربراتير للبيتل

**Ahmed Mubarak** · 21-04-2009 09:25 PM

اخوانى الاعزاء
بصراحه انا لعبت فى المسمارين اللى فى جنب الكربراتير الشمال وعلى حد علمى ان فى واحد فيهم بتاع البنزين والثانى هواء
وبعد اللعب والحمد لله لقيت ان رائحه العادم تكاد تكون رائحه بنزين بالبلدى بنزين ني

لو حد يعرف كيفية الظبط ياريت يقولنا حتى تعم الفائدة على الجميع

جزاكم الله كل خير

**amo400** · 21-04-2009 10:35 PM

باشا ظبت الهواء مع البنزين ديه لعبة الميكانيكى و انصحك عدة اللعب بها لازم تكون احترفت صوت الماتور عشان تعرف تظبتها و فيه معانا ناس جامدة جدا هاترد عليك اتفضل يا استاذ احمد حسن و استاذ هاشم

**ابوهاشم** · 22-04-2009 12:16 AM

السلام عليكم ورحمة الله وبركاته
ايمن باشا ازى حضرتك عامل ايه
ربنا يباركلك احنا يادوب بنحاول نفيد بعض بمعلوماتنا المتواضعه
استاذ احمد مبارك عامل ايه ياباشا
معلش انت استعجلت وغامرت مغامره للمعرفه ودخلت فى حاجه تبدو سهله نظريا
ولكنها عمليا صعبه وتحتاج لخبره كبيره
ومع الاسف ميكانيكية بيتلز كتير اتعاملنا معاهم ومش بيعرفو يظبطو الكاربراتير وكهرباء الاسبراتير كويس
الوحيد من الميكانيكيه اللى لما بيظبطلى السرفيس عموما بحس انى راكب عربية زيرو
هو الحاج محمد على بتاع جسر السويس
حقيقة هو متميز عن غيره بعمل السرفيس مع تحفظى برضه ان فى حاجات كتير هو مش متمكن فيها وانصحك انك تروحله يظبطلك الكاربراتير تانى
ومش معنى كلامى انك ماتحاولش تعمل حاجه بايدك تانى
بالعكس دى حاجه كويسه جدا انك تتعلم تعمل حاجات كتير فى العربيه بايدك
احسن من الذهاب للصنايعيه على حاجه فارغه واستنزاف للفلوس
بس حاول انك تفهم كويس كل حاجه بتحاول تشتغل فيها وماتغامرش فى حاجه
مش متمكن منها وربنا يوفقك

**Ahmed Mubarak** · 22-04-2009 03:29 PM

شكرا يا استاذ هاشم
طبعا هو فضول منى انى اللعب فى المسامير دى بس ان كنت فاكر الموضوع بسيط لكن بصراحه الموضوع كبير لانى رجعت للمانيوال بتاع الاصلاح ولقيت انه لازم يكون فى Rpm وتجيب المسمار لاخره وبعد كدة تلفة نص لفه وحاجات كتير فانا هاروح للحاج محمد على وهو يظبطها احسن
وجزاكم الله كل خير

**amo400** · 23-04-2009 01:02 AM

هاشم باشا كما عوتنا ربنا يبركلك

**ahit** · 23-04-2009 03:18 AM

السلام عليكم و رحمة الله و بركاته

شكراً يا أيمن باشا على التقديم الجميل اللى أخجلت بيه تواضعنا بجد
و طبعاً كلام هاشم حبيبى مظبوط بس أحب أضيف حاجتين

الأولى : محمد الأسمر الميكانيكى اللى فى جسر السويس أمام سنترال مصر الجديدة أستاذ ظبط الماتور و التاكيهات بجد لأنى إتعاملت مع محمد على و مع محمد الأسمر و الإثنين كويسين و اللى يستريح لحد فيهم يتعامل معاه.

الثانية : ممكن تجرب اللى هاقولك عليه قبل الذهاب للميكانيكى و شوف النتيجة يمكن تنفع معاك :

* بطل العربية و إقفل المسمارين و بعدين إفتح المسمار الكبير واحد و نص لفه كاملة و المسمار الصغير 2 لفة كاملة و بعدين دور العربية و لف المسمار الصغير كأنك بتقله بشويش لغاية لما تلاقى الماتور هايبطل منك أو بطل , و الماتور مبطل إفتح المسمار الصغير نص لفة و بعدين جرب العربية و السحب و لو صوت الماتور عالى ممكن توطيه من المسمار اللى فى الوش فى الكربراتير اللى راكب فيه السوسته.

**ihab** · 23-04-2009 11:31 AM

النقطة فى انك مش بتضبط الكربراتير و بس
انت المفروض بتضبط الكهرباء ( الاسبراتير ) و بتضبط الكرابراتير
لان انت كده بتضبط نسبة الوقود اللى داخل مع الهواء بالاضافة الى توقيت الاشعال

**Ahmed Mubarak** · 23-04-2009 02:15 PM

جزاك الله كل خير
ان شاء الله هاحاول ان اجرب قبل ما روح لحد وان شاء الله هالقولكم على عملته بالظبط

وعلى فكرة دى نفس الطريقه اللى الميكانيكى بيظبط بيها , قبل كدة مكنتش واخد باللى بس بعد الشرح الممتاز بتاع الاستاذ احمد حسن فهمت الميكانيكى بيعمل ايه والشرح بتاعه يكاد يكون ذى اللى فى كتالوج الاصلاح .
جزاكم الله كل خير

**ابوهاشم** · 23-04-2009 07:27 PM

المشاركة الأصلية كتبت بواسطة ahit

* بطل العربية و إقفل المسمارين و بعدين إفتح المسمار الكبير واحد و نص لفه كاملة و المسمار الصغير 2 لفة كاملة و بعدين دور العربية و لف المسمار الصغير كأنك بتقله بشويش لغاية لما تلاقى الماتور هايبطل منك أو بطل , و الماتور مبطل إفتح المسمار الصغير نص لفة و بعدين جرب العربية و السحب و لو صوت الماتور عالى ممكن توطيه من المسمار اللى فى الوش فى الكربراتير اللى راكب فيه السوسته.

ايه الكلام الجامد ده
احنا كده وصلنا لافضل ميكانيكى بيتلز فى مصر
واخونا وحبيبنا كمان احمد حسن يعنى مش عاوزين توصيات من حد
وانا اول واحد هتعامل معاه

**ahit** · 25-04-2009 02:21 AM

المشاركة الأصلية كتبت بواسطة hashem1999

ايه الكلام الجامد ده
احنا كده وصلنا لافضل ميكانيكى بيتلز فى مصر
واخونا وحبيبنا كمان احمد حسن يعنى مش عاوزين توصيات من حد
وانا اول واحد هتعامل معاه

يا حبيبى أنا تحت أمرك و شوف الوقت اللى يريحك و نتقابل و نعمل اللى إنت عاوزه على قد خبرتى المتواضعة و المكتسبة منكم جميعاً

الموضوع: ظبط الكربراتير للبيتل

LinkBack

أدوات الموضوع

عرض

ظبط الكربراتير للبيتل - انشر الموضوع فى :

-

-

-

-

-

-

-

المواضيع المتشابهه

تنظيف الكربراتير للبيتل

== تجربتى مع زيت فيسكو ngv للبيتل ==

طقم شمبر للبيتل

عايزاشترى فتيس للبيتل

مشكلة فى الاسبراتير للبيتل

الكلمات الدلالية لهذا الموضوع

المفضلات

المفضلات

ضوابط المشاركة