-
استشارة لخبراء البيتلز
السلام عليكم
استشارة صغيرة لخبراء البيتلز
انا امامي عربية بيتلز موديل 1971
1300 cc
كل حاجة فيها تمام ماعادا
خبطتين خفاف فى الرفرفين اللى قدام
والدهان الخارجي سيئ للغاية
فأرجوا منكم تقدير التكلفة المبدئية للدهان الجديد والسمكرة
وهل لو الدهان الحالي محبب يبقي في مشكلة فى صاج العربية ولا هذا سوء دهان من الصنايعي
علي فكرة العربية على 10000 جنيه دا اول كلام لسة مفصلتش
فرأيكم اخدها بكام
وشكرااا
محمد سالم
-
استاذ محمد سالم
اهلا بحضرتك فى وسط اخوانك عشاق البيتلز
واحب اهنيك لاختيارك للسياره دى اللى ان شاء الله هتعجبك جدا
ومش هتندم عليها ابدا بالعكس هتعشقها زينا
حضرتك بتقول ان العربيه كل حاجه فيها تمام يعنى اكيد كشفت عليها عند مبكانيكى متخصص وحمك عليها انها كويسه
ارجو انك لو ماكنتش عملت كده انك تاخدها لميكانيكى بيتلز ويشوفها
مبدئيا السعر ممتاز بالنسبه للى ذكرته عنها
بالنسبه لشغل السمكره والدوكو تكاليفهم تتفاوت من 800 حتى 1300 جنيه تقريبا
حسب الصنايعى اللى هتتعامل معاه ونوع الشغل
وربنا يوفقك ومبروك مقدما
-
ربنا يخليك يا استاذ هاشم
وشكرا على سرعة ردك
اخوك محمد سالم
-
الأستاذ محمد سالم
مبروك و ربنا يباركلك فيها و يكفيك شرها
السعر حسب الحالة و لو حالتها كعفشة و ماتور و سقف و رقبة سليمة يبقى السعر ممتاز جداً
و طبعاً كلام أخويا و حبيبى هاشم ... سليم 100% بالنسبة للسمكرة و الدوكو
و حاول تنزل معاه ألف جنية لو قدرت
و أخبار الصالون و الفرش إيه ؟ لأنه ممكن يكلفك حوالى من 1000 إلى 1200 جنية !!!
-
الاساسيات المهمة عندك الشاسيه من تحت و الرقبة
و هى العربية بعد كده بيبقى فيها 3 حاجات
الموتور و الفتيس و الدنجل و دول اتقل حاجات فى العربية و لو فيهم مشكلة حاتغلبك او على الاقل حاتصرف عليهم
و الصاج الخارجى امره سهل لو انت اتأكدت من اللى فات كله
اهم حاجة طبعا ان يكون فى حد متخصص بيتلز يبص عليها و ليكن ميكانيكى بيتلز و ليس اى ميكانيكى
و بعد كده تصلى صلاة استخارة و تتوكل على الله
-
الف شكر للاخ احمد والاخ ايهاب
بالنسبة لحالة الفرش جيدة
وكبس الموتور 75 %
والرقبة والدنجل تمام
وإن شاء الله هنزل معاه 1000 جنيه
اشكركم جميعا على نصائحكم الغالية
-
ربنا يوفقك ويباركلك فيها
وتنضم لاسرة عشاق البيتلز
-
يا ترى اخبارك ايه و عملت ايه فى العربية اشتريتها و لا لسه
-
-
السلام عليكم
ارجوا ان تكونوا بخير جميعا
واسف علي تأخير ردي
بالنسبة للعربية اللى قلتلكم عليها
استفدت جدا من معلوماتكم
وفعلا العربية كويسة
وخلاص اتفقنا على كل حاجة انا وصاحب العربية
وطلبت منه شهادة مخالفات علشان نسجل واديله الفلوس
اتحجج بماءة حجة علشان يسجل الاول وياخد الفلوس
بحجة ان العربية معلهاش مخالفات وانه راجل غني ولو طلع عليها بعد كدة هيبقي يديني الفلوس
وكنت خلاص هستسلم
لولا واحد صاحبي عنده معرفة كشف على رقم العربية لقي عليها اكتر من 2000 جنيه مخالفات
رحت خالع منه علي طول
اما بالنسبة لشراء بيتلز فللاسف حظي معاها وحش اوى
كل ما اشوف عربية الاقيها كل الكهرباء بايظة
والعدادات
وخصوصا عداد البنزين مش عارف ليه
دا غير ان الفرمل معتبرنها من الكماليات زى التكييف
يعنى فى فرامل يد يبقي مفيش فرامل عادية او العكس
ولو الاتنين موجودين بتبقي ضعيفة
والناس تقوللي عادى دى امرها سهل
دا غير اللي يقوللي العربية ممتازة بس الغيارات لحد التالت بس والرابع بايظ
واللي يقوللي ايه يعنى الدريكسيون فيه بوش
دا غير تقوس العجل الخلفي بالنسبة ليهم حاجة عادية
للاسف انا شفت 9 بيتلز من النت والمعارف
وكنت باخد معايا مهندس صاحبي بيشتغل فى شركة تأمين في معاينة العربيات
لحد ما الراجل زهق مني وبقي يكنسل عليا لما اكلمه
والحمد لله اني مخدتش ميكانيكي بيتلز معايا كان زماني صرفت ثمن العربية عليه
لان كل واحد بيبيع عربية يقولك ممتازة ومفيهاش اى حاجة ولما اروح بلاقي بلاوى وكنت هدفع للميكانيكي على الفاضي
وخفت انزل السوق من النصب اللي باسمع عنه وورق العربيات المضروب
فقلت أأجل شوية
معلش طولت عليكم
____________
محمد سالم
Content Relevant URLs by
vBSEO 3.6.0 PL2