التكييف محيرنى ومحدش فاهم حاجة خاالص

**د.محمود صلاح** · 27-04-2009 06:49 PM

التكييف عندى فى الكرولا 93 - فى عمان - شغال حلو فى الاوقات الباردة واول النهار والليل , اما فى عز الظهر لما مؤشر الحرارة يعلى شويه تلاقيه مش مطلع هواء بارد مع ان الكمبريسور شغال , والمواسير سليمة ومافيش تسريب والغاز سليم ومليان كويس..

ولما رحت للهنود اللى مش فاهمين حاجة قالوا غير الكمبريسور لأنه لما كب مياه عليه طلع هواء بارد....

واحد تانى قال لى السربنتينة مسدوده لما الفريون بيسخن مع الحرارة بيتسد وراح كابب مياه على السربنتينة - وكنت فى عز الظهر والمكيف مش مطلع هواء بارد - لقينا المكيف بدأ يبرد ....

مش عارف اصدق مين فيهم حاسس انهم مش فاهمين حاجة وبيعكوا

... واحد تالت فال غير الفلتر اللى تحت التابلوه

**mahmoudfs** · 27-04-2009 07:20 PM

اخي العزيز
في ترمستات بين الردياتر الداخلي و الخارجي و ظيفتهادخال الغاز البارد ومنع الغاز الساخن من الدخول الى الرديتر الداخلي . ممكن يكون خربان او بدو ضبط !!. المشكله انه اذا لعب حد في البرغي تبع الترمستات خلص خرب لانه صعب جدا ترجيعه مثل ما كان من الشركه.
تحياتي
mahmoudfs

**samirayad** · 06-05-2009 07:17 AM

اما فى عز الظهر لما مؤشر الحرارة يعلى شويه تلاقيه مش مطلع هواء بارد مع ان الكمبريسور شغال , والمواسير سليمة ومافيش تسريب والغاز سليم ومليان كويس..

وممكن تكون فعلا محتاج .....تشوف زيادة حرارة ميه تبريد المكنه دى سببها أيه ( لأن مكثف التكييف بيكون فى الغالب قدام ردياتير المحرك )......

_ ومع زيادة حرارة المحرك عن الوضع الطبيعى بيكون الهواء المطرود بالمراوح من حول ردياتير المكنه فى أتجاه مكثف التكييف من الخارج سخن زياده عن اللازم .....وبالطبع ده بيأثر على أنتقال الفريون وهو فى حاله غازيه الى الوسط الخارجى ( وبيفضل جزء كبير منه فى صوره غازيه ) مما يقلل من كفاءة دورة التكييف مع حرارة الجو الخارجى ......

_ دا بالأضافه أنى أنصح بتسليك الردياتير بتاع المحرك ....وكذلك غسيل ونظافة مكثف دورة التكييف من الخارج ( من حول زعانف التبريد ) فى محاولة رفع كفاءة دورة التكييف ................

_ كل هذا يادكتور محاولات ....قبل اللجوء الى التدخل الجراحى وخلافه .....وقد تولد نتيجه طيبه بأذن الله........

**kimo** · 09-05-2009 05:29 PM

المشاركة الأصلية كتبت بواسطة HeMa_LanCeR

المطلوب من حضرتك تنظيف السربنتينه جيدا
وتنظيف الفلتر
والكشف علي نسبه الفريون علشان ممكن يكون واخد رطوبه وبكده هيكون مش بكفأه عاليه

راى سليم بس شوية توضيح خلى فنى الصلاح يفك السربنتينة اللى امام الريداتير وينفخ جة الكويل بتاعها بالهواء هيطلع منها زيت هو دة السبب ويركب ويضبط الشحنة تانى ويراجع مستوى الزيت فى الكمبورسور

**memobeeh** · 09-05-2009 10:41 PM

أتصور ان حضرتك ممكن تستفتي الأخ ده بالتليفون وهو شاطر -يشهد الله- في مجاله وهو: المركز اسمه مركز صبحي لتكييف السيارات وعنوانه 5 شارع الشيخ عبد الوهاب النجار-تريومف مصر الجديدة. تليفون 24147352 موبايل 0122236515 مهندس مدحت حبيب.

**د.محمود صلاح** · 11-05-2009 07:45 PM

اليوم قررت نسف المشكلة وحلها من جذورها ... روحت لأشطر هندى فى المنطقة ( عمان ) وفكينا المكيف حته حته , وغيرت الكمبريسور والتيرموستات الاوتوماتيك ونظفنا السربنتينه بتاعة المكيف وغيرت سير الكمبريبسور عشان كان بيسرسع , كل هذا بناءا على توجيهاتى للهندى من آراء حضراتكم عاليه , وأيضا غيرت المكثف (dryer ) التكبفة الاجمالية حوالى بما يوازى 500 ج , وتمت التجربة فى عز الحر ,,,,, ثلاجة والحمد لله وكمان بيفصل ويشتغل عشان يريح الموتور والكمبيريسور ,,

شكرا على النصح والإرشاد وربنا مايوقعكم فى حيرة

**samirayad** · 11-05-2009 09:12 PM

ألف مبروك ...........

**kantalub** · 13-05-2009 09:26 PM

شئ جميل انك تلاقي المشكلة تتحل بسهولة ومن غير اي توابع والأجمل لما غيرك ينصحك وتطلع النصيحة تمام وزي الفل .. ربنا يلهمنا دايما الصبر علي كل مشاكل الدنيا .. دمت في طاعة الرحمن ..