الاوبترا نظامها ايه من الأخر !!!

**mohamedhamdy82** · 21-09-2007 10:22 PM

انا ان شاء الله نويت اشترى اوبترا وكنت عاوز اعرف شويه معلومات عنها .. فياريت اللى يقدر يفدنى ما يتأخرش عليا فى الرد .. خصوصا من مالكى الاوبترا ....
انا هسأل بعض الأسئله وعاوز اللى يرد عليا يقول رأيه وبعد كده يقول نسبه مئويه تؤيد الرأى اللى هيقوله ده .. الأسئله دى مهمه بالنسبه ليا وهتساعدنى انى احول النيه اللى عندى دى الى فعل بإذن الله انا حاسس ان العربيه دى كويسه وان شاء الله هتعمل مبيعات كويسه .. بصراحه كده هى فى تمن كام عربيه تانيين زى الصنى والسيتى والجين 2 والياريس .. بس فى رأيى الشخصى ان شايفها افضلهم ....بس انا عاوز اعرف كام حاجه عنها علشان انا كنت محتار بينها وبين الصنى وكنت عملت موضوع قبل كده علشان اخد رأى الاعضاء .. بس ان شاء الله هتوكل واشترى اوبترا .. ده بعد صلاه الاستخاره والاجابات على اسألتى اللى ممكن تكون بتدور فى أذهان ناس تانيه بردو ...وشكرا ليكم مقدما ....
1- هل العربيه صاجها جامد ( حلو يعنى ) ولا خفيف ؟؟ كام فى % ؟
2- هل تقفيل العربيه نضيف ولا فيه غلطات ؟؟ كام فى % ؟
3- هل العربيه سحبها حلو ؟ كام فى % ؟
4- ما رأيك فى سحب السياره اثناء تشغيل التكييف هل تتأثر تأثر كبير ام لا ؟؟ كام فى % ؟
5- بالنسبه للجير بوكس المانيوال ما رأيك فى اداءه ؟؟ كام فى % ؟
6- بالنسبه لعفشه السياره ما هو رأيك فيها ؟؟ كام فى % ؟
7- ما هو رأيك فى ارتفاع السياره عن الارض ؟؟ وهل تتأثر بالوزن ؟ بمعنى لو معاك ناس كتير فى العربيه او حاجات فى الشنطه بتحف فى المطبات ام لا ؟؟ كام فى % ؟
8- ما هو رأيك فى عزل الاصوات عن العربيه سواء الموتور او الطريق ؟؟ كام فى % ؟
9- ما هو رأيك فى الخامات المستخدمه داخل السياره ونظام الصوت ؟؟ كام فى % ؟
10- ما رأيك فى ثبات العربيه على الطريق ؟؟ كام فى % ؟
11- ما هو رأيك فى معدل استهلاك البنزين ؟؟
12- هو ضمان العربيه قد ايه ؟؟
13- ايه رأيك فى التوكيل واذا كنت عملت صيانه ايه رايك بوضوح ؟؟
14- لو كان عندك فكره عن اسعار قطع الغيار يا ريت ما تبخلش علينا ؟؟
15- اخيرا ما هو رأيك فى اداء السياره ككل ؟؟؟؟؟

**mohamedhamdy82** · 22-09-2007 02:08 PM

سبحان الله ..... كل دى مشاهدات ومحدش عاوز يرد عليا ؟؟
26 واحد دخلوا شافوا الموضوع وماحدش يعلق خالص ؟؟
على فكره دى اخر حاجه كنت اتوقعها من المنتدى بصراحه !!!!

**Ahmed Hassan** · 22-09-2007 02:10 PM

المشاركة الأصلية كتبت بواسطة mohamedhamdy82

سبحان الله ..... كل دى مشاهدات ومحدش عاوز يرد عليا ؟؟
26 واحد دخلوا شافوا الموضوع وماحدش يعلق خالص ؟؟
على فكره دى اخر حاجه كنت اتوقعها من المنتدى بصراحه !!!!

أصبر على رزقك

الردود جايه جايه

**ibrahim** · 22-09-2007 02:23 PM

نفسي اللي يردوا يبقوا اصحاب العربية بس علشان منضللش حد :twisted:

**Powert** · 22-09-2007 02:24 PM

الناس مش عارفة ترد عليك تقولك اية

لانك عايزة الاجابة ب % ودي صعبة جداً لانك تاخد نسبة مؤية لازم تقارنها بعربية تانية

وانا شايفك حاطط الصنى والسيتى والجين 2 والياريس ودول بيختلفوا اختلاف كبير في الاداء وفي الخامات برضة

حدد عربية واحنا نقولك اذا كانت احسن ولا لأ

وانا هجاوبك على اللي اعرفة

**Powert** · 22-09-2007 02:45 PM

1- هل العربيه صاجها جامد ( حلو يعنى ) ولا خفيف ؟؟ كام فى % ؟

هو أقوى من الدايو عموماً

2- هل تقفيل العربيه نضيف ولا فيه غلطات ؟؟ كام فى % ؟

لو بتتصنع محلى اكيد تقفلها هيكون مش حلو انا معرفش هي بتتصنع محلى ولا لأ بس أظنش انها محلى

3- هل العربيه سحبها حلو ؟ كام فى % ؟

العربية اللي كانت معايا وكنت واخدتها من قريبي كانت اتوماتيك وكانت سحبها حلو جداً

4- ما رأيك فى سحب السياره اثناء تشغيل التكييف هل تتأثر تأثر كبير ام لا ؟؟ كام فى % ؟

لم الاحظ فرق مع تشغيل التكييف وده يمكن لاني كنت مشغله على طول

6- بالنسبه لعفشه السياره ما هو رأيك فيها ؟؟ كام فى % ؟

العفشة هادية ومش بتحس باي حاجة على الطريق

- ما هو رأيك فى ارتفاع السياره عن الارض ؟؟ وهل تتأثر بالوزن ؟ بمعنى لو معاك ناس كتير فى العربيه او حاجات فى الشنطه بتحف فى المطبات ام لا ؟؟ كام فى % ؟

الارتفاع جيد جدا ومعرفش بتتأثر بالوزن ولا لأ لان اللي كان معايا 4 افراد وكنت سايق طريق سريع

8- ما هو رأيك فى عزل الاصوات عن العربيه سواء الموتور او الطريق ؟؟ كام فى % ؟

جيدا جدا فوق ال 90% عزل ممتاز

- ما هو رأيك فى الخامات المستخدمه داخل السياره ونظام الصوت ؟؟ كام فى % ؟
الخامات جيده جدا وبنسبة لنظام الصوت معجبنيش لان اللي قاعد ورا الصوت بيكون عنده الصوت ضعيف
مع ان في عنده سماعات ورا

- ما رأيك فى ثبات العربيه على الطريق ؟؟ كام فى % ؟

ثمات رائع وممتاز

11- ما هو رأيك فى معدل استهلاك البنزين ؟؟

استهلاكها مش كبير هي عاملة زي النوبيرا

13- ايه رأيك فى التوكيل واذا كنت عملت صيانه ايه رايك بوضوح ؟؟

اعرف عنه ان اسعاره عالية بس خدمتة ممتازة وشغلة ممتاز
15- اخيرا ما هو رأيك فى اداء السياره ككل ؟؟؟؟؟

العربية هي عبارة عن نسخة حديثة من النوبيرا ومع اختلاف الشكل والكماليات

بس مافيش اختلاف في الاداء كبيير لانهم ماتور واحد

ملحوظة : العربية اللي كانت معايا مش بتاعتي بتاعت واحد قريبي وانا كنت بسوقها منه

وكنت ساعتها في الساحل الشمالى الصيف اللي فاتت واللي قبله كمان وكنت بسوقها على الطريق

السريع وبصراحة عجبتنى جدا وعجباني اكتر من النوبيرا