الموضوع: دايهاتسو شارمـــــــنت 83

المشاركة الأصلية كتبت بواسطة jojooo

انا امتلك سيارة دايهاتسو شارمـــــــنت 83 من اول يد اى حد يعوز مساعدة انا تحت امرة وكمان احب اتعرف علية

ياااااه منور المنتدى ياباشا انت فين من زمان ؟

انا كمان عندي دايهاتسو شارمنت 83 اوتوماتيك LGX 1600

العربيه طبعا عشان قليله جدا في مصر فماحدش عارف عنها حاجه

ان شاء الله هرفع صور عربيتي ومواصفاتها قريبا

تشرفنا بمعرفتك يا باشا

المشاركة الأصلية كتبت بواسطة jojooo

الشرف لية انا عملت المشاركة دى وكان املى فى الله كبير
بس كنت حاسس ان فى حد غيرى ممكن يجبر بخاطرى
انا عربيتى
دايهاتسو شارمنت LE
عدلت فيها العفشة بس علشان السبات مع السرعات العالية
على فكرة انا جبت بيها 180 مرة ايام العز والدلع
بس دلوقتى اخرها 165 كم
انا سعيد جيدا

انا سعيد جدا برضو وان شاء الله نفيد بعض خصوصا في الصيانه وقطع الغيار

بالمناسبه عربيتك اوتوماتيك ولا مانيوال ؟ 1600 ولا 1300 ؟

دلوقتي انا هديك تقرير مفصل عن خبرتي في العربيه دي

بخصوص السرعه انا بجيب 160 - 165 مستريح ومرة قفلت العداد 180 بس كان الطريق مساعدني :k49:

التسارع من 0 - 100 في حوالي 14 ثانيه

زمان كنت بستخدم بنزين 90 بس لما سعره زاد بقيت بستخدم 92 ( الفرق في الفلوس بسيط بس لاحظت ان الاداء والاستهلاك افضل كتييير عن ال 90 حتى صوت العربيه بيبقى انعم )

الاستهلاك : انا حسبت الاستهلاك بس مش بدقه اوي ... مره فولت واستخدمت العربيه اسبوع ... شامل اني ابطل وادور كل يوم وبأحمال مختلفه وسرعات مختلفه وزحمه واشارات وخلافه ... طبعا مع الظروف دي بيكون اعلى معدل استهلاك وكان 160 كم في الصفيحه

ومره حسبت الاستهلاك في السفر ولكن بسرعه عاليه 110 - 130 وكان الاستهلاك 260 كم في الصفيحه

المحرك : الحمدلله مازال بحاله جيده مفيش دخنه ... بس مؤخرا بدأت الاحظ ان الزيت بيقل حاجه بسيطه اوي
بستخدم زيت سوبر 20 - 50 SL جربت انواع كتير بس حاليا استقريت على شل الاصفر وبغيره على 3000 - 3500 كم

والحمدلله مفيش اي اعطال تذكر في المحرك
فقط صيانه دوريه بوجيهات وبلاتين وكوندنسر
غيرت الاسبراتير وقواعد الماتور
غيرت الدينامو

الفتيس : اوتوماتيك واجهت فقط مشكلة تسريب للزيت والحمدلله طلع اويل سيل
بستخدم اي زيت باور كله شغال

العفشه :
غيرت المقصات والمساعدين وصلحت علبة الدريكسيون ( على فكره علبة الدريكسيون عاده مش باور بس ليها زيت تقيل اسمه فالفلينا ابقى زوده عشان مالقتش فيه ولا نقطه )

الفرامل :
غيرت طنابير اماميه وخلفيه ( الاماميه جديده مصري والخلفيه جديده ياباني )
غيرت الماستر العمومي

التبريد :
ردياتير الفبريكه بس غيرت طرمبة الميا وكلاتش المروحه
مفيش سخونه عالاطلاق الحمدلله ولكن مشكلتي الازليه مع السياره هي السخونه في الصيف لما بقف في اشارات طويله وزحمه

الكماليات :
فيها تكييف وشغال كويس ولكن فيه تسريب من مكان ما لكني مطنش ومابقتش بستخدم التكييف ( بس ناوي ان شاء الله اصلح المشكله دي )
سي دي كينوود و 4 سماعات كينوود
سنتر لوك ( صيني )
زجاج كهربا بتاعها ( بس فيه واحد مكنته بايظه )

المميزات :
العربيه ماشاء الله على الرغم من قدم الموديل الا انها تتمير بالاتي :
1-عمليه واعتماديه كويسه جدا
2-اقتصاديه في التشغيل : سواء في الوقود او اسعار قطع الغيار المعقوله
3-سهلة في القياده وناعمه وابعادها مريحه
4-حمالة أسيه وياما شالت وسافرت ( الغردقه والعريش ومطروح وغيرها )
5- أداءها جيد ... سواء قوة المحرك او الصالون والشنطه او الكماليات

العيوب او المشاكل التي تواجهني حاليا :
1- قطع الغيار غير متوفره ... الحاجات الاستهلاكيه موجوده عادي لكن الحاجات المعمره اللي عادة مش بتتغير صعب تلاقيها ... انا حاليا عندي ماسورة الميا اللي طالعه من طرمبة الميا بتلاقيها جنب الماتور كده فوق فرن الشكمان مخرومه وقلبت الدنيا مش لاقيها ... اضطريت ألحم الخرم ... لقيتها اتخرمت من حته تانيه

2- طبعا مشاكل العمر الافتراضي ربقى ... فيه بارومه عملت فيها اللي ممكن اعمله لكن فيه شوية حاجات تعتبر دواخل ماعملتهاش
الحاجات اللي ممكن تبوظ فجأة عشان عمرها ... يعني مثلا الردياتير يتخرم فجأة وانت في مشوار ... الدينامو او المارش ... خرطوم يتخرم

3- الدريكسيون عاده مش باور
4- الكنبه الخلفيه ضيقه شويه


معلش طولت عليك بس لسه تحت كل بند فيه تفاصيل اكتر ممكن نتناقش فيها بعدين

اماكن قطع الغيار ( معلش دي اهم نقطه لازم نقولها ) :

التوفيقيه وشارع زكي ... فيها محلات ياباني كتير
شارع دمشق بس عمري ما استفدت منه معظمهم نصابين
ابن الحكم في الزيتون
اكيد فيه في الحرفيين بس ما نزلتش هناك قبل كده
الشرقاوي جسر السويس
علي زيدان الدقي

فيه حاجات كتير في الوكاله لو عايز مستعمل

اتمنى اكون قلت حاجه مفيده

بعض الصور من النت